¿Mi xvul ta ajol?
¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:
• ¿Mi ta van xchaʼkuxi li jun olol ti chamem vokʼe?
Li xkuxlejal jun olole jaʼo chlik ti kʼalal chkom yol li antse. Li Jeovae xuʼ yuʼun ta xchaʼkuxesel li krixchanoetike, manchuk mi bikʼit to o mukʼ xa, yuʼun «scotol xuʼ yuʼun li Diose» (Mar. 10:27). Pe li Vivliae muʼyuk bu tsjambutik lek smelolal kʼusi tspas Jeova ta sventa li neneʼ ti te cham ta yalajeb smeʼe (15/4, pajina 12, 13).
• ¿Kʼusitik ta jchantik ta stojolal li xiniche, li kotome, li kʼulube xchiʼuk li okotse?
Li chantos chonetik ti yichʼoj onoʼox tal spʼijilik taje, chakʼik ta ilel li spʼijilal Diose (Pro. 30:24-27; 30:28, Ch) (15/4, pajina 16-19).
• ¿Kʼu yuʼun lek chalbe skʼoplal Vivlia ti kʼalal tsʼijil noʼoxe?
Ti tsʼijil xie jaʼ svinajeb ti chi j-ichʼvan ta mukʼe, ti oy jpʼijiltike xchiʼuk ti jnaʼtik stʼujele. Jech xtok tskoltautik ta snopel lek (Sal. 37:7; 63:6; Pro. 11:12) (15/5, pajina 3-5).
• ¿Jayvoʼ ajvaliletik ta Judá ti lek ta chanbel stalelalik ti kʼuyelan la spakbeik skʼoplal ta sjunul yoʼontonik li sna Diose?
Li balunlajuneb ajvaliletik ti la spasik mantal ta Judae, jaʼ noʼox chanvoʼ ti la spakbeik skʼoplal ta sjunul yoʼontonik li sna Diose: Asa, Josafat, Ezequías xchiʼuk Josías (15/6, pajina 7-11).
• ¿Mi skotolik van sbainojik ta yakʼbel sveʼel ta mantal yajtuneltak Dios li buchʼutik tʼujbil chbatik ta vinajele?
Moʼoj. Skotol li yajtsʼaklomtak Cristo ti tʼujbil ta chʼul espiritue te skʼoplalik li ta tukʼil j-abtel xchiʼuk ti lek pʼije, pe jaʼ noʼox tskʼelik li abtelal ta sventa veʼlil ta mantal li buchʼutik te skʼoplalik ta Jtsop Jbeiltasvaneje (15/6, pajina 22-24).
• ¿Kʼuxi mu xkoʼolaj ta jnitvanejetik ta relijion li Jesús ta skoj ti kʼanvane?
Li jnitvanejetik ta relijione muʼyuk bu skʼanojik li Diose xchiʼuk spʼajojik li jteklume. Pe li Jesuse skʼanoj tajek li sTote xchiʼuk kʼux ta yoʼonton li krixchanoetike (Mat. 9:36). Jech xtok lek yoʼonton xchiʼuk skʼanoj li yantike (15/7, pajina 15).