¿Mi xuʼ van jtabetik sbalil li jkuxlejaltike?

¡MELEL tajek li kʼusi chal li teksto taje! Li jkuxlejaltik avie jaʼ noʼox «puru vocol, puru abtel». Jaʼ yuʼun, xuʼ van ta jakʼbe jbatik mi xuʼ van jtabetik sbalil li jkuxlejaltike.

Jkʼelbetik skʼoplal li xkuxlejal Mariae. Toj lek onoʼox baxbol li Mariae, pe avi ti 84 xa sjabilale mu xa xuʼ yuʼun xlokʼ li ta snae. Akʼo mi lek to x-abtej li snopbene, li sbekʼtale mu xa jechuk ch-abtej. Kalal jech taje, ¿kʼuxi xa noʼox xuʼ stabe sbalil li xkuxlejale?

¿Mi jech chkʼot ta atojolal ek? Xuʼ van oy ajakʼojbe aba junuk velta mi oy sbalil ta melel li akuxlejale. Xuʼ van chachʼajub yuʼun bakʼintik li avabtel ti skotol velta jech chapasulane xchiʼuk ti mu xakʼ venta yantik ti avakʼoj persa spasele. Akʼo mi oy kʼusi lek kʼotem ta pasel li ta akuxlejale xuʼ van chavul-o avoʼonton li kʼusi chkʼot ta pasel ta jelavele, ta skoj ti atuk chavaʼi abae o ta skoj ti chlik kʼop ta avutsʼ avalale. Xuʼ van chamem junuk avutsʼ avalal. Taje jaʼ jech kʼot ta pasel ta stojolal jun vinik ti André sbie. Li stot ti toj lek xil sba xchiʼuke ta anil noʼox ipaj xchiʼuk ta anil noʼox cham, ta skoj taje lajem tajek kom xchiʼuk chal ti muʼyuk la kʼusi xuʼ spas sventa xkuch batel yuʼun li svokole.

Kʼusiuk vokolil ta jnuptan ta jkuxlejaltik o chijlub li ta abtele jkotoltik ta onoʼox jakʼbe jbatik mi oy sbalil li jkuxlejaltike. Li stakʼobile ta jtatik ta xkuxlejal jun vinik ti oy xa ta chaʼmil jabil kuxi liʼ ta Balumile: taje jaʼ li Jesucristoe. Manchuk mi ep kʼusitik la snuptan, muyubaj xchiʼuk oy sbalil laj yaʼi li xkuxlejale. Xuʼ jech jpastik ek mi ta jchanbetik li kʼusi la spas ta xkuxlejale.