¿Kʼuxi tskoltautik li kʼusi mu koʼoluk skʼoplale?

Ep krixchanoetik chalik ti jaʼ noʼox la stuk toj lek chanubtasvan li Jesuse. ¿Mi jaʼ jech chanop ek? Mi jeche, achanojbe van jlomuk ti kʼuyelan chanubtasvane, ti kʼusitik lokʼolkʼopal la stunese xchiʼuk ti kʼuyelan la stunes li sjakʼobiltake. ¿Mi anaʼoj ti oy kʼusi yan la stunese? Taje jaʼ li kʼusi mu koʼoluk skʼoplale.

Nopolik noʼox ta jtunestik li kʼusi mu koʼoluk skʼoplale, akʼo mi mu xkakʼtik venta. Xi chkaltik bakʼintike: «Laj yalik ti lek xa tokʼon li lobajele, pe tseik to un» o «Mu toʼox snaʼ xloʼilaj li tsebe, pe li avie lek xa xloʼilaj».

Li kʼusi baʼyel chichʼ alele jaʼ skʼoplal ti kʼuyelan oy li kʼusi ta jloʼiltatike, vaʼun chkaltik ta tsʼakal ti kʼu yuʼun mu koʼoluk skʼoplale, jaʼ ta jtunestik li jpʼel chaʼpʼel kʼop liʼe: pe, akʼo mi jech, manchuk, jaʼuk, yuʼun jaʼ o jaʼ lek. Ta yan xtoke, li kʼusi chkaltik ta tsʼakale, mas to chakʼbe yip li loʼil laj kaltik ta baʼyele o chalbe to jutuk smelolal. Kʼalal jech chijkʼopoje toj lek ta aʼiel xchiʼuk xkaʼibetik smelolal li kʼusi chkalbe jbatike.

Ta jlom kʼopetike muʼyuk tstunesik li kʼusi mu koʼoluk skʼoplale; akʼo mi jech, skʼan jnaʼtik kʼuxi ta tunesel, yuʼun toj ep tstunes li Vivliae. Laj onoʼox stunes li Jesuse. Kalbetik skʼoplal jun chibuk: «Avaʼyojic ti jech iʼalbatic comel ta voʼonee: “Mu me xamulivajic”, xʼutatic. Pero vuʼun chacalboxuc, li bochʼo jaʼ noʼox ta xpichʼ-oʼnta antse [...]», xchiʼuk «Avaʼyojic noxtoc [...] [liʼe]: “Li bochʼo ta stuʼpbe sat xchiʼile, acʼo yichʼ tuʼpbel sat ec. Li bochʼo ta scolesbe stanal ye xchiʼile, acʼo yichʼ colesbel stanal ye ec”, xʼutatic. Pero vuʼun chacalboxuc, mu me xapacbeic sutel li bochʼo chopol cʼusi chaspasboxuque. Me oy bochʼo chasmajboxuc jot xocon abatsʼisatique, acʼo smajboxuc noxtoc li yan jote» (Mat. 5:27, 28, 38, 39).

Jech xtok, te ta jtatik ta yan livroetik ta Vivlia li kʼusi mu koʼoluk skʼoplale. Taje tskoltautik ta yaʼibel smelolal jtosuk mantal o chalbutik kʼuxi ta pasel lek jtosuk kʼusi. Mi totil meʼilote, nopo li kʼusi mu koʼoluk skʼoplal liʼe: «Totil meʼiletic, mu me x[a]jajeticuc ta stojol ti avalab anichʼnabique, yoʼ jech mu soc yoʼnton avuʼunic. Jaʼ lec, ta scʼuxul avoʼntonic tojobanic ta stsʼitesel ti avalab anichʼnabique, yoʼ jech ta xchʼunic ti Cajvaltique» (Efes. 6:4, Ti Achʼ Rextomento yuʼun ti Jesucristoe, ta skʼop Chamula, [ARJ]). Jaʼ noʼox laj yal jechuk jtakbol Pablo ti akʼo yakʼbeik xchan smantaltak Jeova li yalab xnichʼnabike, lek onoʼox tajek ti jechuk laj yale. Pe ¿kʼusi laj yal sventa jamaluk lek xaʼibeik smelolal? Jaʼ laj yal li kʼusi mu koʼoluk skʼoplale: «Mu me x[a]jajeticuc ta stojol ti avalab anichʼnabique», «jaʼ lec, ta scʼuxul avoʼntonic tojobanic ta stsʼitesel».

Xi laj yal ta tsʼakal li Pabloe: «Maʼuc yacalotic ta scontrainel ta stsalel ti jnaclejetic ta banomil ti oy sbecʼtal xchʼichʼelique. Yuʼun jaʼ yacalotic ta scontrainel ta stsalel ti pucujetic ti oy yipic ta spasel ti cʼusi chopole, ti ta icʼ ta xanavique» (Efes. 6:12, Ch). Li kʼusi mu koʼoluk skʼoplal chichʼ alel liʼe, chakʼ ta ilel ti toj tsots li buchʼu yakalutik skontrainele: maʼuk ta jkontraintik li krixchanoetike, yuʼun jaʼ ta jkontraintik li chopol kuxlejaletik ti mu xvinaje.

JTABETIK SBALIL LI KʼUSI MU KOʼOLUK SKʼOPLALE

Kʼalal la stakbe batel karta j-efesoetik li Pabloe, ep kʼusitik laj yal ti mu koʼoluk skʼoplale. Mi ta jkʼeltik leke, jaʼ me tskoltautik ta yaʼibel smelolal li kʼusi la skʼan laj yale xchiʼuk chkaʼibetik lek smelolal li kʼusi skʼan jpastike.

Ep me kʼusi chachan xchiʼuk xamuyubaj noʼox mi la akʼel lek li rekuadro ti chalbe skʼoplal li kapitulo 4 xchiʼuk 5 ta Efesiose. Xi xajakʼbe aba kʼalal yakal chakʼele: «¿Kʼu van yelan chkil? ¿Kʼusi van ta jpas mi jech kʼot ta jtojolale? ¿Bu van jotukal tekstoal ti jaʼ jech jtalelal chil li yantike?». Mi oy bu junukal skʼan xapas chavil li ta akuxlejale, chʼuno me.

Xuʼ me jtunestik ta yichʼel ta mukʼ Jeova ta kutsʼ kalaltik li kʼusi chal li rekuadro xtoke. Ta slikebale kʼelik skotol li kʼusi chale, vaʼun oy buchʼu xuʼ skʼel tal avuʼunik li baʼyel jpole, mi laje vuleso ta ajolik li yan jpole. Ta me xijloʼilajutik lek yuʼun ta sventa ti kʼuyelan xuʼ lek xkakʼ ta jkuxlejaltik li kʼusi chal ti mu koʼoluk skʼoplale. Mi kerem tseboxuk to o mi oy xa ajabilalike, ta me xavakʼik venta ti kʼuyelan skʼan xatukʼibtas atalelalik kʼuchaʼal yajtsʼaklom Cristo sventa lek xavil abaik xchiʼuk avutsʼ avalalik xchiʼuk li yan krixchanoetike.

Kʼalal chavakʼ batel venta ti kʼuyelan ta tunesel li kʼusi mu koʼoluk skʼoplale, ta ora me chata ta ilel li ta Vivliae xchiʼuk te chavakʼ venta ti toj jtunelik li ta cholmantale. Xuʼ van xi xavalbe junuk yajval nae: «Ep krixchanoetik chalik ti oy la kʼusi kuxul chkom mi lijchame, pe kʼelavil li kʼusi chal Skʼop Diose». Xchiʼuk mi oy buchʼu yakal xa chchan Vivliae, xuʼ xi xajakʼbee: «Ep krixchanoetik chalik ti junik noʼox la li Dios xchiʼuk Jesuse; pe ¿kʼusi jchanojtik li ta Vivliae? ¿Kʼusi chanop li voʼote?».

Jaʼ jech chaʼa, ep kʼusi mu koʼoluk skʼoplal chal Vivlia ti tskoltautik sventa xijtun ta stojolal li Jeovae xchiʼuk ti jchanubtastik ta Vivlia li krixchanoetike.