Ta sjunul yoʼonton bat tunikuk ta Micronesia

LI Katherine, ti likem ta Estados Unidose laj yichʼ voʼ kʼalal vaklajuneb toʼox sjabilale. Toj tsots skʼoplal laj yil li cholmantale; pe akʼo mi jech, li bu chchol mantale muʼyuk onoʼox tsta krixchanoetik ti oy ta yoʼontonik li aʼyeje. Xi chvul ta sjole: «La jkʼelilan sloʼil xkuxlejal krixchanoetik ti la spasik orasion sventa oyuk buchʼu xtakbatik batel sventa xkoltaatik yoʼ xojtikinik li Diose. Li voʼone oy tajek ta koʼonton ti jech xkʼot ta pasel ta jtojolale, pe muʼyuk onoʼox jech kʼot ta pasel».

Kʼalal ep xaʼox jabil echʼ ti te noʼox chchol mantale, li Katherine lik snop ti chbat koltavanuk ta cholmantal ti bu mas lek chaʼiik li mantale. Pe oy kʼusi la svul-o yoʼonton. Kʼalal laj yikta komel ta baʼyel velta li yutsʼ yalale toj ep laj yat yoʼonton. ¡Pe kʼajomal noʼox chib xemana jalij! ¿Mi xkuch van yuʼun ti jal chchʼak sba ta stojolal li yutsʼ yalale? Akʼo mi jech, ta skoj ti oy tajek ta yoʼonton ti tskʼupin yaʼi skoltael li krixchanoetik ti tskʼan xojtikinik li Jeovae jaʼ tijbat-o yoʼonton. Kʼalal laj xaʼox snop junantik ti bu tskʼan chbate, tsʼibaj batel ta Betel ta Guam, ti jaʼ takbat talel li kʼusitik tskʼan tsnaʼe. Li ta julio ta 2007 kʼalal 26 xaʼox sjabilale, bat tunuk ta Saipán, jun lum joyol ta nab ta Pacífico, ti te van 10,000 kilometro snamal xil li snae. ¿Kʼusi van kʼot ta pasel ta stojolal?

CHIB ORASION TI LAJ YICHʼ TAKʼELE

Kʼalal mu toʼox jaluk skʼotel li ta achʼ tsobobbaile, li Katherine la sta jun ants ti Doris sbi ti te van 45 sjabilal ti la xchʼam xchanel Vivliae. Kʼalal laj xaʼox xchan li baʼyel oxib kapitulo li ta livro ¿Kʼusi chchanubtasvan ta melel li Vivliae?, lik yat yoʼonton li Katherine. Xi chal li stuke: «Li Dorise toj lek xaʼi xchan li Vivliae, xchiʼuk mu jkʼan ti oy kʼusi chopol xkʼot ta pasel ta jkoje. Muʼyuk bu jech nopoltik noʼox jchanubtas junuk krixchano xchiʼuk la jnop ti skʼan xchanubtasat junuk ermana ti mas xtojobe xchiʼuk ti jmojuk sjabilalike». Jaʼ yuʼun la skʼanbe Jeova ti akʼo sta junuk ermana ti xuʼ xakʼbe komel li buchʼu chchanubtas ta Vivliae. Vaʼun la snop chalbe Doris ta sventa li kʼusi kʼot ta nopel yuʼune.

Xi chvul ta sjol li Katherine: «Kʼalal skʼan toʼox xkalbee, li Dorise laj yalbun ti oy snuptanoj jun svokole. La jchikintabe li kʼusi chale, vaʼun laj kalbe ti kʼu yelan laj kaʼi jba kʼalal la skoltaun Jeova kʼalal jechtik la jnuptan eke». Jaʼuk li Dorise la stojbe ta vokol Katherine xchiʼuk xi laj yalbee: «Jaʼ tstunesot li Jeovae. Kʼalal lakʼot li ta jnae, li voʼone te xaʼox van jayibuk ora yakalun skʼelel li Vivliae. Jaʼo chi-okʼ xchiʼuk xivokolet ta jkʼanbe Dios ti oyuk buchʼu stakbun talel sventa skoltaun ta yaʼibel smelolal li Vivliae. Vaʼun jaʼo la atijbun li stiʼ jnae. ¡Li Jeovae laj yaʼibun li j-orasione!». Kʼalal chvul ta sjol li kʼusi kʼot ta pasel ti toj tsots skʼoplal taje, mu xaʼi chlokʼ yaʼlel sat li Katherine. Xi chal ta jamale: «Li kʼusi laj yalbun li Dorise jaʼ li stakʼobil j-orasione, li Jeovae laj yakʼbun kaʼi ti lek xa chapalun sventa jchanubtas-oe».

Li Dorise laj yichʼ voʼ ta 2010 xchiʼuk li avie yakal xa chakʼ jayibuk chanubtasel ta Vivlia. Xi chal li Katherine: «¡Solel ta jtoj ta vokol ti kʼot xa ta pasel li kʼusi oy ta koʼonton ti leʼ xa onoʼox ta jayibuk jabil jech ta jkʼane!». Li avie jaʼ xa prekursora espesial ta Kosrae, jun lum joyol ta nab ta Pacífico.

OXIB VOKOLILETIK TI SKʼAN XICHʼ TSALELE

Mas ta sien ermanoetik xchiʼuk ermanaetik ti te van yichʼojik balunlajuneb kʼalal ta 79 sjabilalike, batemik ta yan lumetik ta Micronesia sventa chbat tunikuk ti bu mas chtun jcholmantaletike. Erica, ti kʼot ta Guam ta 2006 kʼalal 19 toʼox sjabilale, chal ti kʼu yelan chaʼi sbaik li baxbol jcholmantaletike: «Kʼalal oy buchʼu chtun ta prekursor ti bu oy tajek ta yoʼontonik mantal li krixchanoetike, mu xkaʼitik ch-echʼ li kʼakʼale. Solel ta jtojbe ta vokol Jeova ti la skoltaun sventa jech xitun ta stojolal li Jeovae. ¡Jaʼ kuxlejal maʼ taje!». Li avie tskʼupin chtun ta prekursora espesial ta Ebeye, ta jun lum joyol ta nab ti Marshall sbie. Melel onoʼox ti oy vokolil ti chijtun ta yan lume. Jkʼeltik oxtos taje xchiʼuk ti kʼuxi tsal yuʼunik ti buchʼutik bat tunikuk ta Micronesiae.

Lek noʼox sba kuxlejalil. Kʼalal kʼot ta Palaos li Simon ti 22 sjabilal ta 2007, ta anil laj yakʼ venta ti mu xa jechuk yepal tspas kanal jech kʼuchaʼal li ta slumal ta Inglaterrae. Xi chale: «La jchan ti mu skotoluk velta skʼan jman li kʼusi ta jkʼane, li avie skʼan xa jkʼel lek kʼusi veʼlilal ta jman xchiʼuk ta jkʼel lek bu mas yalel stojol. Mi oy kʼusi vokʼ kuʼune, ta jman kʼusitik ti tunesbil xa sventa jmeltsan li kʼusitik vokʼ kuʼune, vaʼun ta jsaʼ ti oyuk buchʼu skoltaun ta smeltsanele». ¿Mi oy van kʼusi chʼay yuʼun ta skoj ti lek xa noʼox sba laj yichʼ batel li xkuxlejale? Xi chal li Simone: «La jchan spasel kʼusitik ti tsots skʼoplal chijkuxi-oe xchiʼuk ti mu masuk takʼin chlaj kuʼune. Ep ta velta kaʼioj ti chchabiun li Jeovae. Ti vukub xa jabil ti liʼ chitune, oy onoʼox kʼusi jlajes xchiʼuk ti bu chivaye». Jech onoʼox, li Jeovae chakʼbe kʼusitik chtun yuʼun li buchʼutik lek noʼox sba xkuxlejal chichʼ batel ta skoj ti tskʼanik ti jaʼ baʼyel chakʼ ta xkuxlejalik li Ajvalilal yuʼun Diose (Mat. 6:33).

Chakʼ at-oʼonton. Xi chal ta jamal li Ericae: «Solel jmoj oyun xchiʼuk li kutsʼ kalale, jaʼ yuʼun chixiʼ mi mu junuk xa koʼonton li ta cholmantale». ¿Kʼusi la spas sventa xkoltaate? Xi laj yal xtoke: «Kʼalal skʼan toʼox xibate, la jkʼel mantaletik ti chalbe skʼoplal sventa at-oʼonton ti toj tunel laj kaʼie. Jun li ta mantaletik taje, laj yalbe skʼoplal jun meʼil ti laj yalbe ta jamal stseb ti chchabiat yuʼun li Jeovae: ‹Li Jeovae jaʼ mas lek ta xchabiot›. Li kʼusi la yalbe stseb taje solel la spastbun koʼonton». Hannah xchiʼuk li smalal ti Patrick sbie chtunik ta Majuro ta jun lum ti joyol ta nab ti Marshall sbie. Sventa mu xat yoʼontone jaʼ mas chakʼ ta yoʼonton li yermanotak ta tsobobbaile. Xi chale: «Ta jtojbe ta vokol Jeova ti jmoj oyik li ermanoetike; yuʼun jaʼ kutsʼ kalal ek. Ti muʼyukuk la skoltaun li Jeovae muʼyuk bu xikoltavan jechuk ti bu tskʼanik mas koltaele».

Kʼalal chijnopaj ta stojolal ermanoetike. «Kʼalal achʼ to chijkʼot ta jun lume, jelel skotol —xi chal li Simone—. Bakʼintike chkakʼ persa yalel kʼusi ti chakʼ tseʼeje pe chopol tajek chkaʼi kʼalal chkil ti muʼyuk tstseʼinike.» Xi chal li Ericae: «Ta baʼyele toj jtuk laj kaʼi jba, pe la skoltaun ti la jvules ta jol ti liʼ oyune maʼuk noʼox sventa ta jtabe sbalil, moʼoj, yuʼun jaʼ ta skoj ti ta jkʼan chitun mas ta stojolal li Jeovae». Xchiʼuk xi to chale: «Ta tsʼakale toj lek laj kamigoin jbakutik xchiʼuk li ermanoetike, taje toj ep sbalil laj kil». Li Simone laj yakʼ persa xchanel li palauano kʼope, taje jaʼ koltaat sventa «lec jamal [yoʼonton]» ta stojolal li yantike, ti chkʼot ta yamigotak li ermanoetik ti te nakalike (2 Cor. 6:13). Ta skoj ti oy tajek ta yoʼonton xchanbel li skʼopike jaʼ lik kʼanatuk-o. Ta melel, kʼalal jmoj chij-abtej xchiʼuk li ermanoetik ta tsobobbaile, jaʼ jech jmoj ta jtabetik sbalil, yuʼun kʼalal jech taje lek xkil jba jkotoltik. ¿Kʼusi van matanaletik tstaik li buchʼutik chbat tunikuk ti bu chtun mas jcholmantaletike?

EP CHICHʼ KʼAJEL

Xi la stsʼiba li jtakbol Pabloe: «Li bochʼo ep tstsʼune ep tscʼaj» (2 Cor. 9:6). Li beiltasel taje xuʼ jaʼ te chalbe skʼoplal li buchʼutik mas chtunik ta stojolal li Jeovae. ¿Kʼusitik van skʼajojik li buchʼutik batemik ta tunel li ta Micronesiae?

Li ta Micronesiae xuʼ to xichʼ likesel epal chanubtaseletik ta Vivlia xchiʼuk ti xkiltik xchʼiik ta mantal krixchanoetik ti chchanik li kʼusitik melele xchiʼuk ti chakʼ ta xkuxlejalik li kʼusi chchanike. Li Patrick xchiʼuk Hannah la xcholik mantal ek li ta Angaur, jun lum joyol ta nab ti kʼajomal noʼox 320 jnaklejetike. Naka toʼox chib u te chcholik mantal kʼalal la staik jun meʼil ti stuk oy ti ta anil noʼox la xchʼam xchanel li Vivliae. Solel ta anil la xchʼam ta sjunul yoʼonton li kʼusi melele xchiʼuk ep kʼusitik la sjel ta xkuxlejal. Chal Hannah ti kʼalal tstsuts yuʼunik jujukoj li xchanel Vivliae, kʼalal tsut ta snaik xchaʼvoʼalik ta svisikletaike, tskʼelbe sba satik xchiʼuk xi chalike: «¡Kolaval Jeova!». Xchiʼuk xi to chale: «Jnaʼoj ti laj yikʼ tal onoʼox jechuk Jeova stuk li uni ‹chij liʼe›, kʼalal chijtun ti bu chtun mas jcholmantaletike, li voʼonkutike la jtakutik xchiʼuk la jkoltakutik ta yojtikinel li kʼusi melele. ¡Jaʼ li kʼusi mas chakʼbunkutik muyubajel li ta jkuxlejalkutike!». Jech kʼuchaʼal chal li Ericae, «mu x-alkuʼuntik kʼu yelan chakʼ muyubajel kʼalal ta jkoltatik ta yojtikinel Jeova li krixchanoetike».

MI XUʼ VAN XAKOLTAVAN EK

Oy epal lumetik ti bu chtun mas jcholmantaletike. ¿Mi xuʼ xbat tunan ek sventa xbat koltavanan? Kʼanbo Jeova ti akʼo xakʼbot ta avoʼonton sventa xavepajes mas li abtelal ta sventa cholmantale. Chiʼino ta loʼil moletik ta tsobobbail, li jkʼelvanej ta sirkuitoe o xchiʼuk li ermanoetik ti batemik ta tunel ta junuk lum ti bu tskʼanik mas koltaele. Kʼalal mi lek xaʼox kʼot ta nopel avuʼune, tsʼibajan batel ta Betel ti bu chakʼan chbat tunane xchiʼuk jakʼo li kʼusi chakʼan chanaʼe.a Xuʼ van xakolta li smilal xa noʼox ermanoetik —li kerem tsebetik xchiʼuk buchʼutik malubemik xa, buchʼutik chʼabal yajnilik xchiʼuk li buchʼutik nupunemike— ti ta sjunul yoʼonton chtunik xchiʼuk ti tstaik epal bendisionetike.