MANTAL TA SLIKEBALTIK PAJINA: LI KʼUSI MU XANAʼ TA SVENTA LI STESTIGOTAK JEOVAE
¿Kʼusi xchʼunojik?
Li stestigounkutik Jeovae jchʼunojkutik ti jaʼ yakʼoj ta naʼel Dios «skotol li Tsʼibetike xchiʼuk toj jtunel» (2 Timoteo 3:16). Ta jtuneskutik li Vivlia sventa xkojtikinkutik-o li Jpasvaneje xchiʼuk chkakʼkutik akʼo sbeiltasunkutik sventa xkuxetuk noʼox koʼontonkutik.
Xi chal li Tsʼibetike: «Xata-o albel amukʼulal, ichʼel ta mukʼ xchiʼuk oy ajuʼel Jeova Dios kuʼunkutik, yuʼun voʼot la apas skotol li kʼusitike, oy skotol xchiʼuk laj yichʼ pasel skotol ta skoj ti jech la skʼan avoʼontone» (Apokalipsis 4:11). Jech oxal jaʼ noʼox stuk chkichʼkutik ta mukʼ li Jeova Diose. Jech xtok, ta skoj ti jaʼunkutik stestigoe chkakʼkutik persa yakʼel ta ojtikinel li sbie (Isaías 43:10-12).
Jaʼunkutik yajtsʼaklom Kristo xchiʼuk jchʼunojkutik ti jaʼ ‹Xnichʼon Dios› li Jesuse,a ti tal ta Balumile xchiʼuk ti jaʼ kʼot ta Mesiase (Juan 1:34, 41; 4:25, 26). Kʼalal cham li Jesuse, laj yichʼ chaʼkuxesel xchiʼuk sut batel ta vinajel (1 Korintios 15:3, 4). Ta mas tsʼakale laj yichʼ biiltasel ta Ajvalil sventa spas mantal li ta Ajvalilal yuʼun Diose (Apokalipsis 11:15). Li Ajvalilal taje yakal xa tspas mantal xchiʼuk jaʼ tskʼatajes yan velta ta paraiso li Balumile (Daniel 2:44). Xi chal li Vivliae: «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o» (Salmo 37:11, 29).
«Kʼalal tskʼelik li Vivliae, xkoʼolaj ti yakal chkʼoponatik yuʼun Diose. Kʼalal tsnuptanik vokolile, tsaʼik koltael ta Skʼop Dios. [...] Yuʼun li stukike kuxul-o chilik li Skʼop Diose.» (Jun pale ta relijion katoliko ti Benjamin Cherayath sbie, ta periodiko Münsterländische Volkszeitung, ta Alemania)
Li stestigounkutik Jeovae jchʼunojkutik ti xuʼ xkoltaatik-o krixchanoetik li kʼusi chal Vivliae (Isaías 48:17, 18). Jaʼ yuʼun chkakʼkutik persa yakʼel ta jkuxlejalkutik li kʼusitik chale. Jech kʼuchaʼal liʼe, li Vivliae chal ti mu jsokes jbekʼtaltik xchiʼuk jnopbentike, jaʼ yuʼun muʼyuk chisikʼolajkutik xchiʼuk muʼyuk ta jlajeskutik drogaetike (2 Korintios 7:1). Jech xtok, muʼyuk chiyakubkutik, muʼyuk chimulivajkutik xchiʼuk muʼyuk chi-elkʼajkutik, yuʼun li Vivliae chal ti muʼyuk leke (1 Korintios 6:9-11).
a Li Vivlia xtoke chal ti jaʼ «li jun noʼox Xnichʼon [Dios]» li Jesuse, ta skoj ti jaʼ noʼox stuk ti laj yichʼ pasel yuʼun Dios kʼalal chʼabal toʼox kʼusitik oye. Jech xtok jaʼ li baʼyel spasben Diose (Juan 3:18; Kolosenses 1:13-15).