«¡Tsan ta yoʼontonik li cholmantale xchiʼuk mas to la skʼanik!»

JAʼO ta sob viernes ta septiembre ta 1922. Te van vaxakmiluk krixchanoetik te tsobolik ta jun mukʼta salon. Pe ti kʼusie, yantik xa chkʼixnaj talel tajek li kʼakʼale. Li buchʼu sbainoj tslikes li mukʼta tsobajel ti tsots tajek skʼoplale laj yal ti xuʼ xlokʼ batel li buchʼu jech xal yoʼontone, pe jaʼ noʼoxe, mu xa x-akʼe ochuk tal yan velta.

Kʼalal lik li tsobajele lik yichʼ kʼejintael jayibuk kʼejoj, taje «Servicio de alabanzas» sbi yuʼunik. Kʼalal tsutse, muy batel ta plataforma li ermano Joseph Rutherforde. Jutuk mu skotoluk li buchʼutik te oyike te xa chotajtik xchiʼuk mu xa xmalaj chaʼiik ti xlik li mantale. Li ermanoe ta slekil yoʼonton laj yal ti akʼo xchotiik li buchʼutik oy bu chanavik ta skoj ti toj kʼixin tajeke. Vaʼun lik li diskursoe, ¿pe mi oy van buchʼu laj yil li mukʼta pokʼ te balbil ta yakʼol plataformae?

Xi sbi li sdiskurso la sjelubtase: «Nopajem xa tal li Ajvalilal ta vinajele». Jalij lek jun ora xchiʼuk j-oʼlol li sdiskursoe xchiʼuk la xchapbe smelolal ti muʼyuk xiʼik li j-alkʼopetik ta voʼne kʼalal la xcholbeik skʼoplal ti chtal li Ajvalilale. Kʼalal tsutsebal xa li sdiskursoe, xi la sjakʼe: «¿Mi achʼunojik ti lik xa ajvalilajuk li Ajvalil ti yan sba yutsile?». Xi tsots takʼav skotolike: «¡Jech!».

Jaʼo xi laj yal li ermanoe: «Mi jeche, ¡batanik ta cholmantal yan velta voʼoxuk li xnichʼnaboxuk Mukʼul Diose!». Xi to laj yal ta sjunul yoʼontone: «¡Kʼelavilik, ch-ajvalilaj xa li Ajvalile! Voʼoxuk yaj-abteloxuk sventa chavalbeik batel skʼoplal. Jaʼ yuʼun, albeik, albeik, albeik skʼoplal li Ajvalil xchiʼuk li ajvalilal yuʼune».

Kʼalal jech laj yale jaʼo kʼunkʼun tilchʼuj yalel li balbal pokʼ ta yakʼol plataforma ti xi tsʼibabile: «Albeik skʼoplal li Ajvalil xchiʼuk li Ajvalilal yuʼune».

Xi laj yal li Ray Boppe: «Batsʼi limuyubajkutik ta jyalel». Yan li Anna Gardnere, xi chale: «Li tsʼamteʼetike nik to ta skoj ti la jtʼax jkʼobkutike». Xi chal ek li Fred Twaroshe: «Jmoj livaʼi jkotolkutik». Xchiʼuk xi laj yal ek li Evangelos Scouffase: «Xkoʼolaj ti oy kʼusi tsots la stoyunkutik likel ta jchotlebkutike, jech-o vaʼal likomkutik xchiʼuk mu xa stsʼik laj kaʼi li kokʼelkutike».

Ta skotol li buchʼutik te oyike ep xa onoʼox li buchʼutik chcholbeik skʼoplal li Ajvalilale, pe li avie mas xa la sta yip chaʼiik sventa jechuk-o xcholik batel. Xi la yal Ethel Bennecoff ta sventa li Jchanolajeletik ta Vivliae: «¡Tsan ta yoʼontonik li cholmantale xchiʼuk mas to la skʼanik!». Li Odessa Tuck ti naka toʼox 18 sjabilale la xchʼun li takel ta ikʼel liʼe: «¿Bochʼo xuʼ chbat cʼopojuc ta jventatic?». Akʼo mi mu snaʼ bu chbat, bakʼin chbat xchiʼuk ti kʼusi chale laj yal ti jaʼ jech tskʼan tspas kʼuchaʼal li Isaias ti xiʼ laj yale: «Liʼ oyun vuʼune, tacun batel» (Is. 6:8). Xi laj yalbe smelolal li Ralph Lefflere: «Li vaʼ kʼalal ti mu xchʼay-o ta jolile jaʼ te lik ta melel li kampanya sventa yalbel skʼoplal li Ajvalilale. Avie kʼotem xa ta spʼejel Balumil».

Mu ta naʼeteluk ti mu xchʼay-o ta joltik li kʼusi kʼot ta pasel li ta asamblea ta Cedar Pointe (Ohio, Estados Unidos). Xi laj yal li George Gangase: «Kʼalal echʼ li mukʼta tsobajel taje muʼyuk xa bu xkikta-o jba mi ta junuk asambleaetik. Jech kʼuchaʼal xvul ta jol yaʼele muʼyuk onoʼox bu la jchʼay jkojuk». Xi la stsʼiba ek li Julia Wilcoxe: «Kʼalal chalbe skʼoplal jvuntik ta jujukoj li kʼusi kʼot ta pasel ta Cedar Point ta 1922, batsʼi mu xa xlokʼ ta alel kuʼun ti kʼu yelan chkaʼi jbae. Persa onoʼox xi chlokʼ ta koʼonton yalbel li Jeovae: ‹Kolaval ti la avakʼ te oyukun li ta asamblea taje›».

Ta melel, oy van jech kʼotem ta pasel ta jkuxlejaltik ek, ti mu xchʼay ta joltik li kʼusitik echʼ ta asambleae xchiʼuk ti la stijbutik tajek koʼontontike. Lijmuyubaj van tajek li vaʼ kʼakʼale xchiʼuk mas la jkʼantik-o li Jeova xchiʼuk li Ajvalil svaʼanoje. Taje jaʼ tstij koʼontontik sventa xiuk xkalbetik li Jeovae: «Kolaval ti lavakʼ te oyukun li ta asamblea taje».