¿Buchʼu jaʼ li Diose?
Ep buchʼutik chalik ti xchʼunojik li Diose, pe mu koʼoluk kʼusi tstakʼik kʼalal chichʼik jakʼbel buchʼu jaʼ ta melel li Diose. Junantike chalik ti jaʼ jun chopol jchapanvanej ti lek chaʼi chakʼbe kastigo li krixchanoetik ta skoj li smulike. Yantike chalik ti jaʼ jun jkʼanvanej Dios ti chakʼbutik perton akʼo mi oy kʼusitik chopol ta jpastike. Yantik xtoke, chalik ti toj nom oy ta jtojolaltik ti mu sventa-o li krixchanoetike. Ta skoj ti jelelik tajek li kʼusitik chalike, xuʼ van ep buchʼutik tsnopik ti mu onoʼox xuʼ xkojtikintik li Diose.
¿Mi tsots skʼoplal skʼan xkojtikintik li Diose? Tsots skʼoplal. Yuʼun mi xkojtikintik lek li Diose mas me oy sbalil li jkuxlejaltike (Echos 17:26-28). Kʼalal mas chanopaj ta stojolal li Diose, mas me tskʼanot xchiʼuk tskoltaot (Santiago 4:8). Xuʼ me xakuxi sbatel osil mi laj avojtikin lek li Diose (Juan 17:3).
¿Kʼuxi xuʼ xavojtikin li Diose? Nopo ta stojolal junuk alekil amigo ti lek xavojtikine. ¿Kʼuxi lik avamigoin abaik? Baʼyel la nabe li sbie, ta tsʼakale, laj avakʼ venta kʼu yelan stalelal, li kʼusitik lek chile, li kʼusitik muʼyuk lek chile, li kʼusitik spasoje xchiʼuk li kʼusitik snopoj tspase. Ta skoj ti mas laj avojtikine mas to lekub ti kʼu yelan xavil abaike.
Jaʼ me jech xuʼ xavojtikin Dios mi chasabe li stakʼobiltak liʼe:
¿KʼUSI SBI LI DIOSE?
¿KʼU YELAN LI DIOSE?
¿KʼUSI SPASOJ LI DIOSE?
¿KʼUSI TSPAS LI DIOSE?
¿KʼUSI SBALIL CHATABE KʼALAL CHAVOJTIKIN LI DIOSE?
Li revista liʼe jaʼ sventa xavakʼ venta ti tstakʼ Vivlia li sjakʼobiltak liʼe. Li ta yan mantaletik chtale tskoltaot snaʼel buchʼu jaʼ li Diose xchiʼuk kʼusi sbalil chata mi chakʼot ta yamigoe.