Skarta li jtsop jbeiltasvaneje

Uni ermanoetik:

¡Toj labal xa noʼox sba li kʼakʼaletik kuxulutike xchiʼuk xi jmuyubaj tajek! Jaʼ jun muyubajel chkaʼikutik ti «coʼol» chi jtun ta yalbel batel mas skʼoplal slekilal li Jtotik ta vinajel Jeovae, ti muʼyuk jech ilbil-oe (Sof. 3:9; Juan 14:12).

Pe maʼuk skʼan xal ti yuʼun muʼyuk xa tsots chkil jvokoltik ti xi jmuyubaj tajek chi jtun ta stojolal li Jeovae. Li kabteltik lik ta septiembre yuʼun 2009 kʼalal ta agosto yuʼun 2010 oy buchʼutik la avil avokolik ta nikel, ta nojelal ta voʼ, ta tsatsal ikʼal voʼ xchiʼuk yan vokoliletik (Mat. 24:7). Toj ep li buchʼutik chil svokol jujun kʼakʼal ta skoj li chamele xchiʼuk li malubele. Jkotoltik skʼan xkuch kuʼuntik batel li epal vokoliletike (Mat. 24:8). Jech xtok, li ta epal mukʼtik lumetike ep ermanoetik tikʼajtik ta chukel ta skoj li xchʼunel yoʼontonike, jech kʼuchaʼal ta Armenia, Corea del Sur xchiʼuk Eritrea (Mat. 24:9).

¿Kʼusi skoltaojutik sventa junuk noʼox koʼontontik akʼo mi ep jvokoltik? Jaʼ li kʼusi la svules ta joltik li teksto sventa li jabil 2010, ti xi chale: Li kʼanelale tstsʼik yuʼun skotol. Mu xlaj-o skʼoplal (1 Cor. 13:7, 8). Jaʼ jech, ta skoj ti jkʼanoj jbatik ta jujuntale xchiʼuk ti jkʼanojtik li Jeovae jaʼ tskoltautik sventa xkuch kuʼuntik batel.

Ep li buchʼutik tskuy sbaik ta yajtsʼaklom Cristoe labal to sba chilik ti bu to kʼalal yakalutik xcholel batel li mantale xchiʼuk ti nopoltik noʼox ta jvulaʼantik li krixchanoetike. Junantike, manchuk mi mu xchʼamik li kʼusitik jchʼunojtik xchiʼuk li chanubtaseletike, toj labal chilik, jaʼ yuʼun xi chalbutike: «Voʼonkutik ta jpaskutik jechuk li abtelal yakaloxuk spasel avie». ¿Kʼusi chkoltaatik-o li yajrextikotak Jeova sventa xcholik-o mantal jujun kʼakʼale? Jaʼ li kʼanelal xtoke. Mu jkʼantik ti ta chʼayel xbat skotol li krixchanoetik jech kʼuchaʼal mu skʼan li jTotik ta vinajele (2 Ped. 3:9). Li svinajeb ti oy ta koʼontontik akʼo sutes yoʼonton li krixchanoetike, jaʼ ti epaj to li jcholmantaletik li ta kabteltik lik ta septiembre yuʼun 2009 kʼalal ta agosto yuʼun 2010, yuʼun kʼot ta 7,508,050 jcholmantaletik. ¿Mi oy van yan relijion ti ta sjunul yoʼontonik tskoltaik ta mantal li krixchanoetik ta skoj ti skʼanojike?

Tspat tajek koʼontontik ti chkiltik yakal chkʼot ta pasel batel li albil kʼop la stsʼiba j-alkʼop Isaías liʼe: «Ta slajebtic batel cʼacʼale ta xlic yichʼ lec yip yan velta li vits yoʼ bu oy sna Mucʼul Diose; jaʼ toyol chcʼot yuʼun li yantic vitsetique; li yajvaltac jujun banamile te chtal stsob sbaic ta stojol» (Isa. 2:2-4). Li ta epal krixchanoetik ti chbatik ta sna mukʼul Dios Jeovae, te skʼoplal li 294,368 krixchanoetik ti laj yichʼik voʼ li ta kabteltik lik ta septiembre yuʼun 2009 kʼalal ta agosto yuʼun 2010 xchiʼuk ti ta sjunul koʼontontik la jchʼamtike. Yoʼ mu xpʼajik ta spetsʼtak li Satanase, jaʼuk stij koʼontontik sventa jkoltatik-o li kʼanelal oy kuʼuntik ta stojolalike (1 Ped. 5:8, 9).

Li sNaʼobil slajel Cristo ti laj yichʼ pasel ta 30 yuʼun marso ta 2010 ayik 18,706,895. Li kʼuyepal ayik taje jaʼ svinajeb ti epal miyon krixchanoetik xuʼ to xtalik sventa jmoj xkichʼtik ta mukʼ li melel Diose. Xi jmuyubaj ti muʼyuk to bu slajesoj Dios li kʼusitik chopol chkʼotanuk ta pasele. Li kʼanelale jaʼ me tskoltautik sventa xkuch-o batel kuʼuntik yoʼ to mu xtal li kʼakʼal taje (2 Tes. 3:5).

Li mukʼta tsobajeletik ta oxib kʼakʼal ti jaʼ sbi: «Nopol oyukutik-o ta stojolal Jeova» —ti laj yichʼ pasel ta spʼejel Balumile, ti jutuk mu skotoluk laj yichʼ pasel ta 2010— la skoltautik sventa lekuk-o xkil jbatik xchiʼuk li Jeovae. Jech kʼot ta pasel li kʼusi laj yal li jtsʼibajom yuʼun salmo liʼe: «Xcuxet noʼox yoʼntonic li jun ta lum ti jaʼ Dios yuʼunic li Mucʼul Diose» (Sal. 144:15). Mi jpatoj lek koʼontontik ta stojolal Jeovae kʼusuk xtal ta jtojolaltik, muʼyuk ta jxiʼtatik (Sal. 23:4). Ta stojolal li xNichʼone, li Jeovae poʼot xa xtal «slajesbe stsatsal yabtel li pucuje» (1 Juan 3:8). ¡Ta jkʼantik xa ti xkʼot li kʼakʼal taje! Pe yoʼ to mu xtale toj ep to kabteltik skʼan pasel (1 Cor. 15:58).

Pato avoʼontonik ti ta jkʼoponkutik-o Dios «scotol ora» ta atojolalike (Rom. 1:9). Avokolikuk, «tey me comanic o ta stojol ti scʼuxul yoʼnton ti Diose. Junuc avoʼntonic malaic ti scʼacʼalil ti ta xtal ti Cajvaltic Jesucristoe» xchiʼuk kʼelik-o me batel li kuxlejal sbatel osile (Jud. 21, Ti Achʼ Rextomento yuʼun ti Jesucristoe, ta skʼop Chamula).

¡Oyoxuk tajek ta koʼontonkutik!

Avermanotakik,

Li Jtsop Jbeiltasvanej yuʼun li yajRextikotak Jeovae