¿Mi xuʼ van xachol mantal ta domingo?
1. ¿Kʼusi xuʼ jchanbetik Pablo xchiʼuk xchiʼiltak li kʼusi la spasik ta Filipose?
1 Li kʼusi kʼakʼalil chkux toʼox yoʼontonik jutuk mu skotoluk li judioetik ta Filipose, jaʼ li ta sabadoe. Li vaʼ kʼakʼale jaʼo te oyik li Pablo xchiʼuk xchiʼiltak ta misioneroal li ta jteklum taje. Ti lajuk xkux yoʼontonik ek li kʼakʼal taje muʼyuk kʼusi i-albatik ti jechuke. Pe li stukike laj yakʼik venta ti ta spat xokon li jteklume oy krixchanoetik ti te yakal tskʼoponik Diose, muʼyuk te noʼox smeyoj skʼob ikomik, yuʼun ibat xcholbeik mantal. Ta skoj taje, lek laj yaʼi mantal xchiʼuk yutsʼ yalal li Lidiae, vaʼun laj yichʼik voʼ. ¡Kʼu to yepal xmuyubaj Pablo xchiʼuk xchiʼiltak ti jech ikʼot ta pasele! (Hech. 16:13-15.) Ta skoj ti jaʼo ep krixchanoetik chkux yoʼontonik ta domingo li avie, ¿kʼu yuʼun mu xalokʼ ta chol mantal?
2. ¿Kʼusitik tsalem yuʼunik li yajtuneltak Dios sventa muʼyuk xa kʼusi chkichʼtik albel kʼalal ta jcholtik mantal ta domingoe?
2 Vokol toʼox li chol mantal ta domingoe. Ta 1927 li yajrextikotak Jeovae laj yichʼik tijbel yoʼontonik sventa xcholik mantal ta domingo. Pe li kʼusi ikʼot ta pasele jaʼ ti muʼyuk lek x-ilatik yuʼun li j-abteletike. Li ta Estados Unidose ep buchʼutik laj yichʼik chukel ta skoj ti tstoy la sbaik ti muʼyuk chkuxik ta domingoe, ti chbat la sabeik sjol li krixchanoetike xchiʼuk ti muʼyuk la spermisoik sventa chchonik li vunetike. Pe muʼyuk laj yikta sbaik. Li ta jabiletik x-echʼ tal ta 1930, li jcholmantaletik ti te nopol noʼox xil sba li stsobobbailike, la spasik toʼox kampanyaetik ti jaʼ sbi «campañas de las divisiones» sventa xlaj xcholik-o mantal li bu yosilal chol mantal yuʼunike. Ta skoj ti toj ep xa noʼox li jcholmantaletike, li j-abteletike laj yikta sbaik, yuʼun mu xa noʼox xlaj ta tsakel batel laj yilik. Kʼuchaʼal chkiltike ep svokol la snuptan li ermanoetik ta skoj li chol mantal ta domingoe, ¿mi mu tstijuk avoʼonton ti muʼyuk xa buchʼu kʼusi chalbutik kʼalal ta jcholtik mantal jech li avie?
3. ¿Kʼu yuʼun lek ti jcholtik mantal ta domingoe?
3 Sta-o lek jcholtik mantal li jun kʼakʼal taje. Ep krixchanoetik muʼyuk ch-abtejik li ta domingoe, yuʼun jaʼo chkux yoʼontonik. Li buchʼutik oy srelijionike xuʼ van jaʼo mas lek chaʼiik chloʼilajik ta sventa Dios li kʼakʼal taje. Pe ¿kʼusi xuʼ jpastik mi jaʼo oy jtsobajeltik li ta domingoe? Ta skoj ti jmeltsanoj xa onoʼox jbatike, ¿kʼu yuʼun mu jkʼeltik mi xuʼ xijlokʼ ta chol mantal kʼalal mi laj xaʼox o kʼalal skʼan toʼox li tsobajele? Mi anaʼoj ti chaviʼnaje xuʼ xakuch batel avot.
4. ¿Kʼu yuʼun xuʼ xijmuyubaj mi chijlokʼ jlikeluk ta chol mantal ta domingoe?
4 Manchuk mi chijlokʼ jlikeluk ta chol mantal li ta domingoe, xakʼ to me yorail sventa jkuxtik jutuk. Kʼalal jech ta jpastike xuʼ me xkuxet noʼox koʼontontik ta skoj ti ta jpasbetik yabtel Diose (Pro. 19:23). Xchiʼuk xuʼ van xijmuyubaj ta skoj ti jtatik junuk krixchano jech kʼuchaʼal Lidiae.