Jvokʼ ti bu oy sjakʼobile

◼ ¿Kʼusi skʼan spas li buchʼu oy kʼusi tskʼan chiktabe komel ta sbi s-organisasion Jeova kʼalal mi chame?

Kʼalal chijchame mu xa kʼusi xuʼ jpastik xchiʼuk li kʼusitik oy kuʼuntike (Ecl. 9:5, 6). Jech oxal, li jlome ta spasik komel jun testamento o tspasik jun contrato de fideicomiso sventa chal kʼuxi tskʼan xichʼ chʼakel li kʼusitik oy yuʼune (2 Rey. 20:1). Li ta vun ti oy sbalil ta stojolal ajvalile te chal komel buchʼu chkom ta sba skʼelel ti akʼo xichʼ pasel li kʼusi oy ta yoʼonton li buchʼu la stsʼiba stestamentoe. Li buchʼu oy ta sba skʼelele xi chbiiltasate: albacea o administrador fiduciario, bateltike fideicomisario sbi. Li j-abteletik ta jlom lumetike jaʼ chal kʼuyelan chichʼ chʼakel kʼusitik oy yuʼun li jun krixchano kʼalal mi chame. Jaʼ yuʼun, mi jnopoj chkiktabetik s-organisasion Jeova skotol o mi jlom noʼox li kʼusitik oy kuʼuntik kʼalal mi li jchame, skʼan jtsʼibatik komel lek ta vun xchiʼuk skʼan jtʼujtik lek li buchʼu chkom ta sba skʼelel kuʼuntik ti akʼo xichʼ pasel li kʼusi oy ta koʼontontike. Xuʼ xajakʼ batel ta Betel mi oy to kʼusitik chakʼan chanaʼ ta sventa taje.

Li buchʼu chkom ta sba skʼelel taje tsots tajek skʼoplal li kʼusi oy ta sbae. Sventa xichʼ tsobel xchiʼuk xichʼ chʼakel skotol li kʼusitik oy yuʼun li jun krixchanoe, ep kʼakʼal chichʼ xchiʼuk ep vunetik chichʼ pasel, jech skʼan xichʼ pasel manchuk mi ep o mi jutuk li kʼusitik chichʼ chʼakele, akʼo mi ep o mi jutuk stojol. Jech xtok, jutuk mu skotoluk velta li j-abteletike yakʼojik mantaletik ta sventa li kʼusitik skʼan pasele. Li buchʼu xuʼ jtʼujtik sventa spas taje skʼan jaʼuk li buchʼu spas yuʼun li kʼusi ta jkʼantike, ti lek jpatoj koʼontontik ta stojolale xchiʼuk ti jnaʼojtik ti lek xtojobe. Jech oxal mu jnoptik ti buchʼuuk noʼox ta tsobobbail xuʼ skoltautike (kʼelo li mantal «Los beneficios de la planificación patrimonial» ti lokʼ ta ¡Despertad! 8 yuʼun disiembre ta 1998).

Mi la skʼanbot vokol xakʼel ti xichʼ pasel kʼusi oy ta yoʼonton mi cham li jun krixchanoe. Baʼyel paso orasion xchiʼuk «baʼyuc [nopo]» mi spas avuʼun skotol li kʼusitik skʼan pasele (Luc. 14:28-32). Kʼalal mi cham li jun krixchanoe, voʼot me chkom ta aba stsobel li buchʼutik iktabat xrextoike. Jech xtok, oy ta aba xchʼakel li kʼusitik jech kʼuchaʼal chal li smantal ajvaliletik xchiʼuk jech kʼuchaʼal chal li fideicomiso o testamentoe. Li buchʼu komem ta sba spukel li kʼusitik yuʼun li buchʼu chame kʼajomal noʼox jech tspas kʼuchaʼal chal li vun laj yichʼ pasele, akʼo mi ep o mi jutuk kʼusi laj yikta komel li animae. Skotol li kʼusitik chichʼ akʼel komel ta sbi junuk s-organisasion yajrextikotak Jeovae jaʼ sventa chtun yuʼun li slumal Jeovae (Luc. 16:10; 21:1-4).