¿Mi mas van lek ti xakʼan bu jotukal sventa chachol mantal atuke?

1. ¿Kʼu yuʼun lek ti oyuk bu jotukal xuʼ chachol mantal atuke?

¹ Mi oy ep yosilal bu chchol mantal li atsobobbaile, xuʼ van xavichʼ akʼbel jvokʼuk ti bu mas nopol ta anae, taje jaʼ ti bu xuʼ chachol mantal atuke. Li stsʼakleb Kabteltik sventa Dios sventa fevrero ta 2007 ta pajina 5 parafo 3, laj yal ti kʼalal oy bu jotukal xuʼ chachol mantal atuke tskoltaot «sventa lek cha tunes ti kʼu sjalil cha chol mantale». Xi to chal xtoke: «Xuʼ van chavalbe yan jchol mantal ti akʼo xbat xchiʼinote».

2. ¿Kʼusi xuʼ xapas sventa xalokʼ ta cholmantal xchiʼuk yantik kʼalal akʼbilot bu jotukal chachol mantal atuke?

² Skʼan xachol mantal xchiʼuk li yantik xtoke. Mi cha-akʼbat bu jotukal xuʼ chachol mantal atuk ti nopol yoʼ bu cha-abteje xuʼ xachol mantal kʼalal yorail chalokʼ ta veʼele o jaʼo kʼalal mi lalokʼ xaʼox ta abtele. Jech xtok, xuʼ van xavalbe xchiʼinot junuk jcholmantal ti te noʼox nopol ch-abtej eke. Mi te noʼox nopol ta ana li bu akʼbilot sventa chachol mantal atuke xuʼ van xalokʼik ta cholmantal xchiʼuk avutsʼ avalal ta bat kʼakʼal. Pe kʼalal muʼyuk chabat li ta tsobajel sventa cholmantale skʼan me xapas orasion sventa xakʼanbe ti sbeiltasot Jeova kʼalal skʼan toʼox xabate (Filip. 4:6). Jech xtok, skʼan oyuk noʼox spʼisol avuʼun, yuʼun skʼan xalokʼ ta cholmantal xchiʼuk li ermanoetik ta tsobobbaile. Jech xtok, skʼan me xalokʼ ta cholmantal xchiʼuk li agrupo li ta sabado xchiʼuk domingo ti jaʼ mas ep ermanoetik chlokʼike.

3. ¿Kʼusi sbaliltak xuʼ xata kalal oy bu jotukal chachol mantal atuke?

³ Sbaliltak. Kʼalal akʼbilot bu jotukal chachol mantal atuke oy noʼox bu chachol mantal xchiʼuk xuʼ xapas ti jayib ora mas xokolote. Jech xtok xuʼ mas chachol mantal, yuʼun mu persauk nom chabat. Taje jaʼ chkoltavan sventa kʼunuk noʼox ta tael li kʼuyepal chichʼ kʼanel sventa li prekursor auksiliar xchiʼuk regulare. Ta skoj ti jlakʼnatik noʼox li buchʼutik chkʼot ta yoʼontonik mantale nopol noʼox xuʼ xbat jchaʼvulaʼantik xchiʼuk ti jlikesbetik junuk chanubtasel ta Vivliae. Kʼalal muʼyuk toʼox chavakʼ sutel sventa yan xa buchʼu xuʼ skʼan sventa xchol mantal tee, xuʼ van oy xaʼox jayibuk velta acholoj mantal. Jlome yalojik ti kʼalal chij-abtej ti bu jotukal akʼbilutik ta jcholtik mantal jtuktike mas chkojtikintik li jnaklejetik tee xchiʼuk mas xa lek chloʼilajik. ¿Kʼuxi van tskoltaot xchiʼuk avutsʼ avalal sventa lek tsʼakal chacholik mantal ti xakʼanik bu jotukal xuʼ chacholik mantal atukike? (2 Tim. 4:5.)