¿Mi nopajtik chbat akʼel kʼusitik chal li ta yavil aʼyejetike?

Li moletik, yajkoltaobbatak moletik xchiʼuk yan ermanoetik ti oy yabtelik ta tsobobbaile nopem xaʼi tskʼelik kʼusitik chal li ta yavil aʼyejetik sventa snaʼik mi oy sparteike. Akʼo mi jech, jtunel me kuʼuntik jkotoltik jlom li kʼusitik chal tee. ¿Mi jnaʼojtik bakʼin jtaojtik smesel xchʼubael li Salon sventa Tsobobbaile? ¿Mi oy van stakoj tal jlikuk karta tsots skʼoplal li Betel o li jkʼelvanej ta sirkuitoe? Sventa jtaktik ta ikʼel li buchʼutik ta jchanubtastike, ¿mi jnaʼojtik xa kʼusi sbi li mantal ch-echʼ li xemana liʼe? ¿Mi jelem van yorail junuk tsobajel o li jgrupotik sventa cholmantale? Jutuk mu skotoluk taje muʼyuk xa chichʼ alel li ta tsobajeletike xchiʼuk li moletike mu skotoluk velta xuʼ yuʼunik yalbel skotol li jcholmantaletike. Jaʼ yuʼun, lek me ti nopajtik noʼox x-echʼ jkʼeltik li yavil aʼyejetike. Kʼalal jnaʼojtik xae oy noʼox smelol stukʼil skotol li kʼusitik ta jpastike (1 Cor. 14:40).