¿Kʼusi tstij koʼontontik ta xcholel mantal?
1. ¿Kʼuxi stsakojbe sba skʼoplal li kʼanelal xchiʼuk cholmantale?
1 Ti jcholtik li lekil aʼyej sventa Ajvalilal yuʼun Diose jaʼ jun abtelal ti tsots skʼoplal xuʼ jpastik avie. Ta melel, ti jech ta jpastike jaʼ ta jchʼuntik li chib mantal tsotsik skʼoplale, jaʼ xkaltik, ti jkʼantik li Jeovae xchiʼuk li jchiʼiltaktike (Mar. 12:29-31). Li kʼanelale jaʼ li kʼusi tstij koʼontontik sventa baxbolutikuk li ta cholmantale (1 Juan 5:3).
2. ¿Kʼuxi chkakʼtik ta ilel ta cholmantal ti jkʼanojtik li Jeovae?
2 Kʼanelal ta stojolal Jeova. Ta skoj ti jkʼanojtik tajek li kamigotik ti jaʼ li Jeovae, jaʼ tstij koʼontontik ta yalbel skʼoplal li sbie. Leʼ xa van ta vakmil jabile lik yichʼ chopol kʼoptael yuʼun Satanás (2 Cor. 4:3, 4). Jaʼ yuʼun, xchʼunojik ti Diose chakʼbe svokol ta kʼatinbak li jmulavile, ti jaʼ la jun trinidade xchiʼuk ti muʼyuk la ta yoʼonton li krixchanoetike. Jech xtok, oy ep buchʼutik mu xchʼunik ti oy Diose. ¡Jaʼ yuʼun ta jkʼantik tajek ti snaʼik kʼusi melel ta sventa Dios li krixchanoetike! Kʼalal lek baxbolutik ta xcholel mantale chmuyubaj kuʼuntik li Jeovae, pe li Satanase jaʼ ch-ilin-o (Prov. 27:11; Heb. 13:15, 16).
3. ¿Kʼuxi chkakʼtik ta ilel ta cholmantal ti jkʼanojtik li jchiʼiltike?
3 Kʼanelal ta stojolal jchiʼiltik. Kʼalal oy buchʼu ta jcholbetik mantale te chkakʼtik ta ilel ti jkʼanojtike. Ta skoj ti kuxulutik ta skʼakʼalil tsatsal vokolile skʼan xa noʼox me xaʼiik lekil aʼyej li krixchanoetike. Ep buchʼutik xkoʼolajik xchiʼuk li jnaklejetik ta Nínive ta skʼakʼalil Jonás ti «mu to snaʼic bu stsʼetcʼobic xchiʼuc bu sbatsʼicʼobique» (Jon. 4:11). Kʼalal ta jcholtik mantale jaʼ te chchanik kʼuxi xuʼ xmuyubajik xchiʼuk lekuk xkuxiik (Is. 48:17-19). Taje jaʼ chpatbat-o yoʼontonik (Rom. 15:4). Mi chchʼunik xchiʼuk tspasik li kʼusi chchanike «ta xcolic» (Rom. 10:13, 14).
4. ¿Kʼusi mu xchʼay-o xaʼi li Jeovae?
4 Li lekil nichʼnabiletike mu tʼujbiluk noʼox yorail chakʼik ta ilel ti skʼanoj stot smeʼike. Yuʼun skotol ora chakʼik ta ilel ti kʼanvanemike. Jaʼ jech ek, ti jkʼanojtik Dios xchiʼuk jchiʼiltike jaʼ tstij koʼontontik sventa jcholtik mantal ta kʼusiuk noʼox ora. Ta me jcholtik-o batel li mantale (Hech. 5:42). Li kʼanelal chkakʼtik ta ilele mu me bu chchʼay-o xaʼi li Jeovae (Heb. 6:10).