Lekubuk batel mas ti kʼu yelan xijtojob ta cholmantale: ta pʼolmajebaletik

Kʼu yuʼun tsots skʼoplal. Ta skoj ti jutuk mu skotoluk krixchanoetik ch-abtejik sjunul kʼakʼale, skʼan xbat jcholbetik mantal ti bu ch-abtejike. Toj jkʼupil sba li cholmantal ta pʼolmajebaletike xchiʼuk xuʼ oy kʼusi lek xkʼot ta pasel, yuʼun li tee ta onoʼox jtatik ta chiʼinel ta loʼil krixchanoetik. Jech xtok, li buchʼutik te ch-abtejike lek chchʼamvanik ta skoj ti tsnopik ti jaʼutik jmanolajele. Jaʼ yuʼun sventa lek kʼusi xkʼot ta pasele, li jcholmantaletike skʼan me xichʼ lek spʼijilik, lekuk slap batel skʼuʼ spokʼik xchiʼuk lekuk smeltsan sbaik batel (2 Kor. 6:3). Li jkʼelcholmantale skʼan me skʼel lek kʼu sjalikil chichʼ cholel mantal li ta pʼolmajebaletike xchiʼuk ti buchʼu chabtelane.

Kʼuxi ta pasel:

Chapano jsetʼuk slikeb aloʼil. Mi solel jal la achiʼin ta loʼil junuk j-abtele, xuʼ me mu xa xchikintabot li ta yan veltae.
Sabo lek yorail kʼalal jaʼo jutuk yabtelike, jech kʼuchaʼal kʼalal jaʼ toʼox chlikik ta abtele.
Akʼo persa xchiʼinel ta loʼil baʼyel li buchʼu yichʼoj ta venta li abtelale xchiʼuk oyuk me slekil avoʼonton. Xuʼ xi xavalbee: «Yakal ta jvulaʼankutik jlikeluk ta yabtelik li krixchanoetik ta skoj ti jaʼ jech xuʼ jtakutik ta chiʼinel ta loʼile». Mi laje, akʼbo yil jlikuk tratado, li revistaetike o yantik vunetik. Jaʼ mas lek ti mu xkalbetik ti xuʼ xakʼik matanal takʼin ta sventa li vunetike yuʼun xuʼ snopik ti jchonolajelutike, jaʼ noʼox xuʼ xkalbetik mi oy buchʼu tsjakʼ kʼuxi chichʼ tael takʼin sventa li kabteltik ta spʼejel Balumile.
Mi lek yoʼonton li buchʼu yichʼoj ta venta li abtelale, kʼanbo permiso sventa xachiʼin ta loʼil jlikeluk li yan j-abteletike. Li ta junantik pʼolmajebaletike, xuʼ van jakʼtik mi stakʼ xkiktatik komel vunetik ti bu chkuxik jlikeluk li j-abteletike.
Oyuk apʼijil xchiʼuk teuk me asat li kʼusi tspasike. Jun skʼelobile, mi yakal chchiʼin ta loʼil yajmanolajelik o oy kʼusi yan tspasike, jaʼ mas lek ti jmalatik xokob sventa jchiʼintik ta loʼile.

Paso jech sjunul u liʼe:

Li ta yichʼel ta mukʼ Jeova ta avutsʼ avalalike chanilanik junuk slikeb loʼil sventa cholmantal yoʼ xatunesik mi labatik ta cholmantal ta pʼolmajebaletike.