Li Diose chak’be bendision li buchʼu chchʼun mantale

Li j-alkʼop Moisese laj yal ti chakʼbutik sbendision Dios mi ta jchʼunbetik li smantaltake (Deuteronomio 10:13; 11:27). Ta jchʼunbetik smantal Dios, pe maʼuk ta skoj ti chijxiʼ mi xakʼbutik kastigoe. Li Diose toj lek stalelal, jaʼ yuʼun jkʼanojtik. Ta skoj ti jkʼanojtike, ta jchʼunbetik smantal, yuʼun mu jkʼantik ti oyuk kʼusi jpastik ti xuʼ svul-o yoʼontone. «Liʼe jaʼ smelolal ti jkʼanojtik li Diose: ti jchʼunbetik li smantaltake» (1 Juan 5:3).

¿Kʼusi bendisionetik ta jtatik mi ta jchʼunbetik smantal li Diose? Kalbetik batel skʼoplal chaʼtosuk.

1. TA ME XIJPʼIJUB MI TA JCHʼUNBETIK SMANTAL DIOSE

«Voʼon Jeovaun, voʼon Adiosun, voʼon ta jchanubtasot sventa xatabe sbalil atuk, voʼon ta jbeiltasot batel ti bu beal skʼan xatam batele» (ISAIAS 48:17).

Li Jeova ti jaʼ li Jpasvanej kuʼuntike xojtikinutik xchiʼuk chakʼbutik li beiltasel ti chtun kuʼuntike. Mi ta jkʼantik ti akʼo skoltautik li smantaltak sventa lekuk xkʼot ta nopel kuʼuntik li kʼusi ta jpastike, skʼan jsaʼtik ta Skʼop Dios li kʼusi tskʼan akʼo jpastike xchiʼuk ti xkakʼ ta jkuxlejaltike.

2. XIJMUYUBAJ NOʼOX ME MI TA JCHʼUNBETIK SMANTAL DIOSE

«¡Jaʼ mas xmuyubajik li buchʼutik chaʼiik li skʼop Diose xchiʼuk ti tspasik li kʼusi chale!» (LUKAS 11:28).

Li avie, ta smiyonal xa noʼox krixchanoetik xmuyubajik ta skoj ti chchʼunik li kʼusi chal Skʼop Diose. Kalbetik junuk skʼelobil: Jun vinik ti likem ta Españae toj anil snaʼ xkap sjol, chopol kʼusi tspasbe li yantike xchiʼuk jech tspasbe li yajnil eke. La xchan li kʼusi la stsʼiba li j-alkʼop Moises ta sventa ti toj lek stalelal li Jose ti jaʼ xnichʼon li Jakobe. Li Josee laj yichʼ chonel batel kʼuchaʼal jun mosoil xchiʼuk muʼyuk smul laj yichʼ tikʼel ta chukel. Akʼo mi jech, lek-o laj yakʼ ta ilel stalelal, manxo laj yakʼ sba xchiʼuk laj yakʼ ta ilel xkʼuxul yoʼonton (Jenesis kapitulo 37 kʼalal ta 45). Xi laj yal li vinik ti likem ta Españae: «Kʼalal la jnopbe skʼoplal li sloʼil xkuxlejal Josee, la stijbun koʼonton sventa lekuk jtalelal xchiʼuk ti jnaʼuk jpajtsan jbae. Li avie, mas xa ximuyubaj xchiʼuk li kutsʼ kalale».

Li ta Skʼop Diose te ta jtatik yan tojobtaseletik ti kʼu yelan skʼan xkiltik li yantike. Kalbetik smelolal li ta yan mantal chtale.