Li kʼusitik tsjakʼ jkʼelvunetike

¿Buchʼutik li mayoletik ti ch-abtejik ta temploe xchiʼuk kʼusi sbainojik?

Ep kʼusitik sbainojik ta templo junantik jlevietik ti maʼuk paleetike, chtunik ta mayolal o ta polisia. Oy jun bankilal yuʼunik te ta templo ti jaʼ ch-albatik li kʼusi skʼan spasike. ¿Kʼusi yabtel tspasik li vaʼ mayoletike? Xi chal kaʼitik Filón ti jaʼ juda vinike: «Junantike jaʼ chchabiik li stiʼ temploe, li yantike jaʼ chchabiik ti bu chʼul tajeke. Tskʼelik ti mu buchʼuuk noʼox x-och batel ta smantal stuke o ti mu yolbajuk jech tspase. Junantik xtoke xtal xbatik ta jujujot xokon templo sventa xchabiik xchiʼuk tsjelilan sbaik ta kʼakʼal akʼobal».

Kʼalal tskʼanik koltael li Sanedrine, xuʼ skʼanbeik vokol li vaʼ mayoletike. Akʼbatik permiso yuʼun li ajvalil ta Roma sventa xuʼ sjelbun yespadaike.

Li Joachim Jeremias ti chchanbe skʼoplal Vivliae xi laj yal kʼalal laj yichʼ tsakel batel li Jesuse: «Li Jesuse la sjakʼbe mayoletik kʼu yuʼun muʼyuk la stsakik batel kʼalal jaʼo te chchanubtasvan ta temploe. Ti muʼyukuk te ch-abtejik ta templo li vaʼ mayoletike, muʼyuk jech la sjakʼbe jechuk li Jesuse» (Mat. 26:55). Oy xa onoʼox jun velta ti tskʼan ox tstsakik li Jesuse, li Joachime laj yal ti jaʼik onoʼox li vaʼ mayoletike (Juan 7:32, 45, 46). Ta mas tsʼakal xtoke, li bankilal j-abtel ta templo xchiʼuk yajmayoltake laj yichʼik albel ti xikʼik batel ta Sanedrin li yajchankʼoptak Jesuse. Xuʼ van jaʼik onoʼox li vaʼ mayoletik ti la xjochik batel ta spat templo li Pabloe (Ech. 4:1-3; 5:17-27; 21:27-30).