Li kʼusitik tsjakʼ jkʼelvunetike

¿Kʼusi skʼan xal kʼalal xi laj yal li jtakbol Pabloe: «Chamemun ta stojolal li mantale»? (Gal. 2:19).

▪ Xi la stsʼiba li Pabloe: «Chamemun ta stojolal li mantale. Pe ti jech kʼot ta pasele jaʼ sventa xikuxi yoʼ xitun ta stojolal Dios» (Gal. 2:19).

Li kʼusi la stsʼiba Pabloe jaʼ noʼox stsʼak li kʼusi tsots skʼoplal laj yalbe batel li tsobobbailetik ta Galasiae. Junantik ermanoetike jech xa ox tsnopik kʼuchaʼal li jecheʼ jchanubtasvanejetik ti chalik ti skʼan chʼunel skotol li Mantal akʼbat Moises sventa xuʼ xijkolutike, jech kʼuchaʼal ta sventa li sirkunsisione. Pe li Pabloe snaʼoj ti Diose muʼyuk xa tskʼanbe yajtuneltak ti xichʼik sirkunsisione. Laj yalbe lek smelolal ti jecheʼ li kʼusi chakʼik ta chanele xchiʼuk la skolta li ermanoetik sventa xakʼ xchʼunel yoʼontonik ta sventa li pojelale (Gal. 2:4; 5:2).

Li Vivliae jamal chal ti muʼyuk xa kʼusi chaʼi jsetʼuk li buchʼu chameme (Ekl. 9:5). Kʼalal laj yal Pablo ti chamem «ta stojolal li mantale», jaʼ skʼan xal ti maʼuk xa ventainbil yuʼun li Mantal akʼbat Moisese. Jpʼel ta yoʼonton ti jaʼ xa kuxul sventa xtun ta stojolal Dios ta skoj ti yakʼoj xchʼunel yoʼonton ta sventa li pojelale.

Li Pabloe jel xkuxlejal «ta stojolal li mantale». ¿Kʼusi skʼan xal taje? Yaloj xa ox «ti maʼuk tukʼ xa chichʼ albel skʼoplal li jun krixchano ta skoj ti tspas li kʼusi chal mantale, jaʼ noʼox ta sventa li xchʼunel yoʼonton ta stojolal Jesukristoe» (Gal. 2:16). Pe oy onoʼox kʼusi tsots skʼoplal laj yakʼ kʼotuk ta pasel li Mantale. Xi laj yalbe jgalasiaetik li Pabloe: «Laj yichʼ akʼel sventa xakʼ ta ilel li muliletike jaʼ to mi vul ta lokʼel li nitilulal albil xa onoʼox skʼoplale» (Gal. 3:19). Jaʼ jech jamal vinaj ti mu xchʼun yuʼunik kʼusi chal Mantal li jpasmulil krixchanoetike xchiʼuk ti chtun yuʼunik junuk pojelal ti lek tukʼ xchiʼuk ti jun noʼox velta chichʼ pasele. Li kʼusi chal Mantale jaʼ koltaatik-o sventa xakʼik venta ti jaʼ «nitilulal» li Jesuse. Mi laj yakʼ xchʼunel yoʼontonik ta stojolale, xuʼ tukʼ x-ilatik yuʼun li Diose (Gal. 3:24). Tukʼ laj yichʼ ilel li Pabloe, yuʼun laj yakʼ xchʼunel yoʼonton ta stojolal Jesus koliyal li kʼusi chal Mantale. Jaʼ yuʼun, cham xkaltik «ta stojolal li mantale» xchiʼuk jaʼ xa kuxi yoʼ xtun «ta stojolal Dios». Muʼyuk xa ventainat yuʼun li kʼusi chal Mantale, jaʼ xa lik ventainatuk yuʼun li Diose.

Li Pabloe jaʼtik jech la stsʼibabe batel karta li jromaetike: «Kuni ermanotak, lachamik xa ta sventa Mantal ek ta skoj li sbekʼtal Kristoe [...]. Jaʼ yuʼun, kolemutik xa ta stojolal Mantal li avie, yuʼun chamemutik xa ta sventa li kʼusi toʼox xchukojutike» (Rom. 7:4, 6). Li versikuloetik liʼe xchiʼuk li Galatas 2:19 chak’ ta ilel ti maʼuk laj yalbe skʼoplal Pablo ti chcham kʼuchaʼal jun jmulavil ta skoj ti muʼyuk chchʼun li kʼusi chal Mantale. Moʼoj, yuʼun jaʼ skʼan xal ti chkol lokʼel ta stojolal li Mantale. Jaʼ xkaltik, ti muʼyuk xa buchʼu chventainat yuʼun li Mantale. Kolemik xa ta skoj ti yakʼoj xchʼunel yoʼontonik ta sventa li pojelal laj yakʼ Kristoe.