Spasel li kʼusi leke: Skʼan me jnopbetik lek skʼoplal

Mi oy bu chabat ti muʼyuk bu ayemot-oe, ¿kʼusi van chapas?

1. 1. ¿Mi te chabat ti bu chanop ti jaʼ sbelele?

2. 2. ¿Mi chatsʼakli batel yantik ta skoj ti chanop ti xojtikinik li bee?

3. 3. ¿Mi chakʼel GPS o mapa, o mi chajakʼbe junuk avamigo ti xojtikin lek li bee?

Mi jaʼ la atʼuj li baʼyel xchiʼuk xchibale, oy onoʼox bu chakʼot, pe maʼuk te chakʼot ti bu chakʼan chabate. Pe mi jaʼ la atʼuj li yoxibale, jaʼ me te chakʼot ti bu chakʼan chabate.

Li jkuxlejaltike xkoʼolaj kʼuchaʼal jun xanbal. Jkotoltik oy ta koʼontontik ti jaʼuk jtamtik batel li sbelel muyubajele. Pe sventa jtatik taje, skʼan jnoptik lek li kʼusi ta jpastike. Jaʼ yuʼun, tsots skʼoplal ti oyuk kʼusi sbeiltasutike.

Junantik li kʼusi ta jnop ta jpastike maʼuk toj tsots skʼoplal, pe oy junantike tsotsik skʼoplal, yuʼun xuʼ sjel li jkuxlejaltike. Taje jaʼ me te chkakʼtik ta ilel li kʼusi lek o li kʼusi chopol chkiltike. Li kʼusi chkʼot ta nopel kuʼuntike xuʼ me jtabetik sbalil o muʼyuk xchiʼuk xuʼ staik ta makiel li kutsʼ kalaltik eke. Li kʼusitik skʼan jnopbetik skʼoplale jaʼik liʼe:

• Li chiʼinejbail ta vayele xchiʼuk li nupunele

• Ti meleluk xijkʼopoje, li abtelale xchiʼuk li takʼine

• Ti kʼu yelan ta tsʼitesel li alab nichʼnabiletike

• Ti kʼu yelan skʼan jtsaktik ta venta li yantike

Li ta chantos laj kalbetik skʼoplale, ¿kʼuxi xuʼ xanaʼ ti xuʼ xamuyubaj-o yuʼun li kʼusi chkʼot ta nopel avuʼune xchiʼuk ti xuʼ xmuyubaj-o li avutsʼ avalale?

Jkotoltik skʼan jnopbetik skʼoplal liʼe: «¿Kʼusi tskoltaun sventa lekuk kʼusi xkʼot ta nopel kuʼune?».

Li ta revista liʼe, te chavakʼ venta kʼuxi xuʼ skoltaot xchiʼuk kʼu yuʼun xuʼ xapat avoʼonton ta sventa li kʼusi chal Vivlia yoʼ lekuk kʼusi xkʼot ta nopel avuʼune.