Jchanbetik stalelal li tukʼil anjeletike

1, 2. 1) ¿Kʼusi jelelutik-o xchiʼuk li anjeletike? 2) ¿Kʼusi xijkoʼolaj-o xchiʼuk li anjeletike?

KʼALAL laj kojtikintik mantale, lijkʼot ta yutsʼ yalal li Jeovae, ti skʼanoj sbaike xchiʼuk ti jelajtik stalelalike. Taje maʼuk noʼox te skʼoplal li ermanoetik xchiʼuk ermanaetik ta spʼejel balumile, yuʼun te skʼoplal ek li anjeletik ti ta smiyonal xa noʼox oye (Dan. 7:​9, 10). Kʼalal chkalbetik skʼoplal li anjeletike, xuʼ van xtal ta joltik li kʼusitik jelelutik-o xchiʼukike. Yuʼun li stukike pasbilik xa onoʼox kʼalal muʼyuk toʼox pasbil li krixchanoetike (Job 38:​4, 7). Ta skoj ti jpasmulilutike, mu jtatik ta be li anjeletike, yuʼun li stukike tsots sjuʼelik, chʼulik xchiʼuk tukʼik (Luk. 9:26).

² Manchuk mi jelelutik xchiʼuk li anjeletike, oy kʼusi xijkoʼolaj-o xchiʼukik. ¿Kʼusi ti xijkoʼolajutik-oe? Jaʼ ti xuʼ jchanbetik li stalelal Jeova ti toj kʼupilik sbae, ti jnop jtuktik li kʼusi ta jkʼan ta jpastike, oy jbitik ta jujuntal, jeltos jtalelaltik xchiʼuk jeltos kʼusi jbainojtik spasel li ta yabtel Jeovae. Jech xtok, li anjeletike oy ta yoʼontonik chichʼik ta mukʼ li Jpasvaneje. Li voʼotik eke jaʼ jech oy ta koʼontontik (1 Ped. 1:12).

3. ¿Kʼusi xuʼ jchantik ta stojolal li tukʼil anjeletike?

³ Kʼuchaʼal laj kakʼtik xa ventae, oy kʼusitik xijkoʼolaj-o xchiʼuk li anjeletike. Toj lek stalelalik, jaʼ yuʼun tstij koʼontontik sventa oyuk kʼusi jchantik ta stojolalik. Li ta xchanobil liʼe, ta jkʼeltik batel kʼuxi xuʼ jchanbetik ti bikʼit yakʼoj sbaike, ti skʼanojik li krixchanoetike, ti tsʼikem talel yuʼunike xchiʼuk ti tsots ch-abtejik sventa sakuk noʼox li tsobobbaile.

LI ANJELETIKE BIKʼIT YAKʼOJ SBAIK

4. 1) ¿Kʼuxi chakʼik ta ilel li anjeletik ti bikʼit yakʼoj sbaike? 2) ¿Kʼu yuʼun bikʼit yakʼoj sbaik li anjeletike? (Salmo 89:7).

⁴ Li anjeletik ti tukʼ yakʼoj sbaike bikʼit chakʼ sbaik. Akʼo mi ep xa kʼusi xchanojik, tsots sjuʼelik xchiʼuk ti pʼijik tajeke, chchʼunbeik li smantaltak Jeovae (Sal. 103:20). Muʼyuk xtoyetik xa kʼalal tspasbeik li yabtel Jeovae mi jaʼuk ta skoj ti tsots sjuʼelike. Xmuyubajik noʼox kʼalal tspasbeik yabtel Diose akʼo mi muʼyuk ta jnabetik-o kʼusi sbiik (Jen. 32:​24, 29; 2 Rey. 19:35).a Muʼyuk tskʼanik ti jaʼuk xa xichʼik ichʼel ta mukʼe. ¿Kʼu yuʼun ti bikʼit yakʼoj sbaik li anjeletike? Yuʼun skʼanojik li Jeovae xchiʼuk ta sjunul yoʼontonik yichʼojik ta mukʼ (kʼelo Salmo 89:7).

5. ¿Kʼuxi laj yakʼ ta ilel jun anjel ti bikʼit yakʼoj sba kʼalal la stukʼibtas li jtakbol Juane? (Kʼelo xtok li lokʼole).

⁵ Kalbetik skʼoplal jun anjel ti bikʼit yakʼoj sbae. Li kʼusi la spase jaʼ chakʼ iluk ti bikʼit yakʼoj sbaik li anjeletike. Taje kʼot ta pasel tetik van ta sjabilal 96, kʼalal jaʼo oy kʼusi laj yakʼbe yil jtakbol Juan ti toj labal sbae. Li anjel taje mu jnabetik sbi (Apok. 1:1). ¿Kʼu yelan laj yaʼi sba jtakbol Juan kʼalal laj yil li kʼusitik toj labal sbae? La skejan sba sventa xichʼ ta mukʼ, pe li anjele xi laj yal ta anile: «¡Moʼoj! ¡Mu xapas jech! Yuʼun jchiʼil noʼox jbatik ta mosoil xchiʼuk li avermanotake [ . . . ]. ¡Jaʼ ichʼo ta mukʼ li Diose!» (Apok. 19:10). ¡Labal sba li kʼusi laj yale! Yuʼun li anjele mu skʼan ti xichʼ kʼupil kʼoptael xchiʼuk ti xichʼ ichʼel ta mukʼe. Ta anil noʼox laj yalbe jtakbol Juan ti jaʼuk noʼox xichʼ ta mukʼ li Jeovae. Jech xtok, muʼyuk laj yakʼ ta ilel ti jaʼ mas toyol skʼoplal li stuke. Akʼo mi jal xa chtun ta stojolal Jeova li anjele xchiʼuk ti mas tsots sjuʼele, bikʼit laj yakʼ sba, yuʼun xi laj yalbee: «Jchiʼil noʼox jbatik ta mosoil». Manchuk mi la stukʼibtas li jtakbol Juan ti oy xa sjabilale, maʼuk ti tsotsik xa la skʼopone, yuʼun ta slekil yoʼonton laj yalbe. Li anjele laj van yakʼ venta ti jaʼ ta skoj ti toj labal sba laj yil jtakbol Juan ti jech la spase.

6. ¿Kʼuxi xuʼ jchanbetik li anjeletik ti bikʼit yakʼoj sbaike?

⁶ ¿Kʼusi xuʼ jchantik ta stojolal li anjeletik ti bikʼit yakʼoj sbaike? Jaʼ ti bikʼituk xkakʼ jbatik kʼalal ta jpas li kabteltike, maʼuk ti xijtoyet xa chkakʼtik ta ilel ti oy kʼusi xijtojob spasele (1 Kor. 4:7). Mu me jnoptik xtok ti mas xa mukʼ jkʼoplaltik ta skoj noʼox ti jal xa tunemutik tal ta stojolal Jeovae o ta skoj ti oy kʼusitik jbainojtike. Yuʼun kʼalal oy xa kʼusi mas jbainojtike, skʼan mas bikʼit xkakʼ jbatik (Luk. 9:48). Jaʼ yuʼun, oy ta koʼontontik ti xijtunutik ta stojolal yantik jech kʼuchaʼal tspas li anjeletike; mu jkʼan xkakʼtik ta ilel ti voʼotik xa mas tsots jkʼoplaltike.

7. ¿Kʼuxi xuʼ xkakʼtik ta ilel ti bikʼit chkakʼ jbatik kʼalal oy buchʼu chkalbetik mantal o ta jtukʼibtastike?

⁷ Xuʼ me xkakʼtik ta ilel xtok ti bikʼit kakʼoj jbatik kʼalal chkalbetik mantal o ta jtukʼibtastik junuk ermano o junuk kalab jnichʼnabtike. Yikʼaluk van skʼan jamal xkaltik li kʼusi skʼan spase. Pe jech kʼuchaʼal li anjel ti ta slekil yoʼonton la stojobtas li Juane, jaʼ me jech skʼan ta slekiluk koʼontontik xijtojobtasvan ek. Mi ta jkʼantik ti mu jpʼeluk xa xkaltik ta stojolal li yantike, ta Vivlia me ta jlokʼestik li kʼusi chkaltike, ta slekil koʼontontik ta jpastik xchiʼuk chij-ichʼvan ta mukʼ (Kol. 4:6).

LI ANJELETIKE SKʼANOJIK LI KRIXCHANOETIKE

8. 1) Jech kʼuchaʼal chal ta Lukas 15:​10, ¿kʼu yelan chakʼik ta ilel ti skʼanojik krixchanoetik li anjeletike? 2) ¿Kʼu yelan tskoltautik ta cholmantal li anjeletike? (Kʼelo xtok li lokʼol ta pajina 1).

⁸ Li anjeletike kʼanvanemik xchiʼuk tstsakik ta venta ti kʼu yelan chaʼi sbaik li krixchanoetike. Yuʼun xmuyubajik kʼalal oy buchʼu tsutes yoʼontone, jaʼ xkaltik, kʼalal oy buchʼu tsut ta stojolal Jeovae, kʼalal oy buchʼu tskʼan chojtikin Jeovae xchiʼuk kʼalal oy buchʼu tsjel xkuxlejal yoʼ xtun ta stojolal Diose (kʼelo Lukas 15:10). Li anjeletike oy kʼusi tsots skʼoplal tspasik li ta cholmantale (Apok. 14:6). Akʼo mi muʼyuk chcholbeik mantal li krixchanoetike, xuʼ sbeiltasutik batel ta stojolal junuk krixchano ti oy ta yoʼonton chnopaj ta stojolal Jeovae. Pe mu xuʼ xkaltik ti jaʼ xa anjeletik chkoltavanik ta skotol veltae, yuʼun li Jeovae xuʼ stunes xchʼul espiritu sventa skolta li krixchanoetike o ti sbeiltas li yajtuneltake (Ech. 16:​6, 7). Akʼo mi jech, li Jeovae ep ta velta jaʼ tstunes li yaj-anjeltake. Xuʼ jpʼel ta koʼontontik ti te oyik sventa tskoltautik ta cholmantale. (Kʼelo li rekuadro «Takʼbat li s-orasionike»).b

9. ¿Kʼuxi xuʼ jchanbetik anjeletik ti skʼanojik li krixchanoetike?

⁹ ¿Kʼuxi xuʼ jchanbetik anjeletik ti skʼanojik li krixchanoetike? Jaʼo kʼalal chkaʼitik ta tsobajel ti oy buchʼu sut talel ta mantale, xuʼ me xijmuyubaj ta stojolal jech kʼuchaʼal tspas li anjeletike. Ta slekiluk me koʼontontik jchʼamtik li ermanoe xchiʼuk kakʼbetik yil ti jkʼanojtike (Luk. 15:​4-7; 2 Kor. 2:​6-8). Yan kʼuxi xuʼ jchanbetik stalelal li anjeletike jaʼ ti xkakʼ kipaltik li ta cholmantale (Ekl. 11:6). Jech kʼuchaʼal tskoltautik ta cholmantal li anjeletike, xuʼ me jkoltatik ta cholmantal li kermanotaktik eke. Jech kʼuchaʼal liʼe, ¿mi xuʼ van jchiʼintik ta cholmantal li buchʼu jaʼ to och ta jcholmantale o ti jkoltatik junuk ermano ti ip noʼoxe o ti oy xa sjabilale?

10. ¿Kʼusi chakʼ jchantik li kʼusi kʼot ta stojolal Sarae?

¹⁰ ¿Kʼusi xuʼ jpastik mi mu xa xuʼ kuʼuntik cholmantal jech kʼuchaʼal toʼox ta jpastike? Mi jaʼ jeche, xuʼ oy kʼusi yan jpastik sventa jkoltatik ta cholmantal li anjeletike. Kalbetik skʼoplal kʼusi la snuptan jun ermana ta India ti Sara sbie.c Kʼalal 20 xa ox jabil chtun ta prekursorae, tsots ipaj xchiʼuk mu xa stots ta stem. Ta skoj taje, la svul tajek yoʼonton. Pe ta skoj ti la xchanilan li Svivliae, ti koltaat xchiʼuk ti kʼuxubinat yuʼun li ermanoetike, jaʼ koltaat-o sventa stsatsub yoʼonton. Pe laj onoʼox skʼel kʼusi xuʼ spas sventa xchol mantal. Ta skoj ti mu stakʼ xchoti stsʼiba kartae, jaʼ noʼox xuʼ xchol mantal ta telefono. Jaʼ yuʼun, la skʼoponan batel li buchʼutik ta svulaʼan toʼoxe. Li krixchanoetik taj eke laj yalbeik Sara ti oy van yan buchʼutik ti tskʼan chchanik Vivliae. ¿Kʼusi kʼot ta pasel? Kʼalal echʼ jayibuk ue, li Sarae oy xa ox 70 s-estudio, ¡ep tajek! Jaʼ yuʼun, laj yakʼbe jelavel junantik ermanoetik li ta stsobobbaile. Ep ti buchʼutik chichʼik xa estudioe chkʼotik xa ta tsobajel. Ta melel, xmuyubaj van tajek anjeletik ti jech chchiʼinik ta abtel ermanoetik xchiʼuk ermanaetik kʼuchaʼal li Sarae, ti chakʼ yipalik ti bu kʼalal xuʼ yuʼunik li ta cholmantale.

LI ANJELETIKE TSʼIKEM TALEL YUʼUNIK

11. ¿Kʼuxi chakʼik ta ilel ti tsʼikem talel yuʼunik li tukʼil anjeletike?

¹¹ Oy kʼusi lek chakʼik jchantik li anjeletik ti tukʼ yakʼoj sbaike, yuʼun tsʼikem talel yuʼunik. Ta epal jabil yilojik talel li choplejale xchiʼuk ti muʼyuk tukʼ kʼusitik chichʼ pasele. Laj yilik kʼu yelan la stoy sbaik ta stojolal Jeova li Satanas xchiʼuk li epal anjeletike (Jen. 3:1; 6:​1, 2; Jud. 6). Li Vivliae chal ti oy jun anjel la stsak sbaik ta kʼop xchiʼuk jun pukuj ti tsots sjuʼele (Dan. 10:13). Jech xtok, ti kʼu xa sjalil likem talel li kuxlejale, li anjeletike yilojik talel ti juteb noʼox li krixchanoetik ti tsnop chtunik ta stojolal Jeovae. Akʼo mi jech, tukʼ-o yakʼoj sbaik xchiʼuk jech-o xmuyubaj chtunik ta stojolal Jeova. Snaʼojik ti tsta yorail tslajesbe skʼoplal Dios li kʼusitik chopole.

12. ¿Kʼusi xuʼ xapas sventa oyuk stsʼikemal avuʼune?

¹² ¿Kʼuxi xuʼ jchanbetik anjeletik ti tsʼikem talel yuʼunike? Yikʼaluk van oy kichʼojtik kontrainel o ti muʼyuk tukʼ kʼusi chkichʼtik pasbele, pe jech kʼuchaʼal li anjeletike jpatoj koʼontontik ti yakʼojbe xa yorail Dios ti tslajes li choplejale. Jaʼ yuʼun, jech kʼuchaʼal tspas li anjeletike «mu me xkikta jbatik ta spasel li kʼusitik toj leke» (Gal. 6:9). Jech xtok, li Jeovae yalojbutik ti ta skoltautik sventa stsʼik batel kuʼuntike (1 Kor. 10:13). Xuʼ jkʼanbetik xchʼul espiritu sventa oyuk smalael kuʼuntik xchiʼuk ti xijmuyubajuk noʼoxe (Gal. 5:22; Kol. 1:11). ¿Kʼusi xuʼ jpastik mi chkichʼtik kontrainele? Jpat koʼontontik ta stojolal Jeova xchiʼuk mu xijxiʼ. Li stuke te xchiʼukutik-o xchiʼuk chakʼ kipaltik (Ebr. 13:6).

LI ANJELETIKE CHKOLTAVANIK SVENTA SAKUK-O LI TSOBOBBAILE

13. ¿Kʼusi abtelal tsots skʼoplal tspasik li anjeletik li ta slajebal kʼakʼale? (Mateo 13:​47-49).

¹³ Li ta slajebal kʼakʼale, li Jeovae oy kʼusi toj tsots skʼoplal yakʼojbe sbain li anjeletike (kʼelo Mateo 13:​47-49). Li avie, ta smiyonal xa noʼox krixchanoetik chichʼik cholbel mantal. Jlome oy kʼusitik tsjel ta xkuxlejalik sventa xchʼiik ta mantal, pe li yantike muʼyuk. Xi onoʼox chal li Vivliae: «Chlokʼik tal li anjeletike, chtal xchʼakik li buchʼutik toj chopolik ti te kapal ta stojolal li buchʼutik tukʼike». Taje, jaʼ jech chkoltavanik sventa sakuk noʼox li tsobobbaile. Manchuk mi jech, oy onoʼox vokoliletik li ta tsobobbaile xchiʼuk maʼuk me skʼan xal ti mu xa stakʼ sutik tal li buchʼutik mu xchʼiik ta mantal o li buchʼutik muʼyuk xa chchanik Vivliae. Li anjeletike tsots ch-abtejik sventa jechuk-o sak skotol li tsobobbailetike.

14, 15. ¿Kʼuxi xuʼ jchanbetik stalelal anjeletik ti sak noʼox yuʼunik li tsobobbailetike? (Kʼelo xtok li lokʼoletike).

¹⁴ ¿Kʼuxi xuʼ jchanbetik stalelal anjeletik ti sak noʼox yuʼunik li tsobobbailetike? Jaʼ ti sakuk noʼox jtalelaltike xchiʼuk ti lekukutik ta mantale. Ta jujuntal me skʼan jkʼeltik buchʼutik ta jchiʼintik sventa jchabi li koʼontontike xchiʼuk ti mu me jpastik li kʼusitik xuʼ xijnamaj-o ta stojolal Jeovae. Vaʼun, jaʼ me jech sak-o kuʼuntik li tsobobbaile (Sal. 101:3). Xuʼ me jkoltatik xtok li kermanotaktik sventa tukʼuk xakʼ sbaik ta stojolal Jeovae. Mi laj kaʼitik ti oy buchʼu tsots la spas smule, ¿kʼusi ta jpastik? Ta skoj ti jkʼanoj li kermanotike, ta jtijbetik yoʼonton sventa akʼo xchiʼin ta loʼil li moletike. Mi muʼyuk xalbe li moletike, voʼotik me oy ta jbatik ti xkaltike. Ta jkʼantik ti xichʼuk noʼox koltael li kermanotik ti kʼunibem ta mantale (Sant. 5:​14, 15).

¹⁵ Oy onoʼox buchʼutik chlokʼ ta tsobobbail ta skoj ti toj tsots tspas smulike. Kʼalal jech chkʼot ta pasele, muʼyuk xa ta jchiʼintik (1 Kor. 5:​9-13).d Taje jaʼ chkoltavan sventa jechuk-o sak li tsobobbaile. Jech xtok, kʼalal muʼyuk ta jchiʼintik ta loʼil li buchʼutik lokʼemik ta mantale, jaʼ jech chkakʼbetik yilik ti jkʼanojtike. Yuʼun kʼalal muʼyuk ta jchiʼintike, jaʼ chkoltavan sventa sutik tal. Kʼalal tsutik tale, xijmuyubaj tajek, xmuyubaj tajek li Jeova xchiʼuk li anjeletike (Luk. 15:7).

16. ¿Kʼuxi chkakʼtik ta ilel ti ta jchanbetik stalelal li anjeletike?

¹⁶ Jaʼ jun mukʼta matanal chkaʼitik ti oy kʼusi xuʼ jchantik ta stojolal li anjeletike xchiʼuk ti ta jchiʼintik ta abtele. Kakʼ kipaltik ti jechuk bikʼit xkakʼ jbatik kʼuchaʼal li anjeletike, ti jkʼantik li krixchanoetike, ti stsʼikuk kuʼuntike xchiʼuk ti oyuk ta koʼontontik ti sakuk li tsobobbaile. Mi ta jchanbetik stalelal li tukʼil anjeletike, jmoj me chkichʼtik ta mukʼ Jeova ta sbatel osil.