Tuneso li «sbendision Dios» yakʼojbote

Jkotoltik ta jkʼupintik ti jmoj oyutik xchiʼuk yan ermanoetik sventa jpatbe jba koʼontontike. Pe maʼuk skʼan xal ti jaʼ noʼox ta jta-o spatobil koʼontontik ti jmoj tsobol oyutike. Yuʼun li Vivliae chal ti jaʼ «sbendision Dios» kʼalal ta jtsatsubtasbetik xchʼunel yoʼonton li ermanoetike (Rom. 1:​11, 12). ¿Kʼuxi xuʼ xatunes lek li «sbendision Dios» yakʼojbote?

Patbo yoʼonton yantik ta akʼopojel. Jech kʼuchaʼal liʼe, kʼalal chavakʼ aloʼil ta tsobajele, mu masuk xavalbe aba akʼoplal atuk, jaʼuk xavalbe skʼoplal li kʼusi chachan ta stojolal Jeovae, li Skʼope xchiʼuk ta stojolal li yajtuneltak ti tukʼ chtunike. Jech xtok, kʼalal chachiʼin ta loʼil li ermanoetike, jaʼuk xaloʼilta li kʼusi tstsatsub-o xchʼunel yoʼontonike.

Patbo yoʼonton yantik ta skoj li kʼusi chkʼot ta nopel avuʼun xchiʼuk li kʼusi chapase. Jech kʼuchaʼal liʼe, xuʼ me xpatbat-o yoʼonton ermanoetik kʼalal chilik ti jech-o chatun ta tsʼakal ora akʼo mi ep kʼusitik anuptanoj talele. Jech xtok, xuʼ me xpatbat-o yoʼontonik kʼalal muʼyuk chachʼay junuk tsobajel ta xokol kʼakʼal akʼo mi tsinil tajek avabtel o mi tsots ipote.

¿Mi chpatbat-o yoʼonton yantik li kʼusi chaval o li kʼusi chapase? ¿Mi xavakʼ venta kʼu yelan tspat avoʼonton li yantike?