¿Buchʼu jaʼ li jkʼulej vinik xchiʼuk li Lasaroe?

Li kʼusi chal Vivliae

Li Lasaro xchiʼuk jkʼulej vinike jaʼ jun loʼil laj yal Jesus ti muʼyuk kʼot ta pasel ta melel (Lukas 16:19-31). Li chaʼvoʼ viniketik taje jaʼ laj yalbe skʼoplal chaʼtsop krixchanoetik: 1) Jaʼ li jtoyba jnitvanejetik ta relijion ta skʼakʼalil Jesuse. 2) Jaʼ li buchʼutik bikʼit laj yakʼ sbaik ti la xchikintaik li kʼusi laj yal Jesuse.

Li ta mantal liʼe ta jtabetik echʼel li stakʼobiltak liʼe:

• ¿Kʼusi laj yal Jesus ta stojolal li jkʼulej vinik xchiʼuk li Lasaroe?

• ¿Mi melel van li loʼil taje?

• Li loʼil liʼe, ¿mi chakʼ ta aʼiel ti oy ta melel li kʼatinbake?

• ¿Kʼusi chalbe skʼoplal li loʼil taje?

¿Kʼusi laj yal Jesus ta stojolal li jkʼulej vinik xchiʼuk li Lasaroe?

Ta kapitulo 16 yuʼun Lukase, li Jesuse laj yalbe skʼoplal chaʼvoʼ viniketik ti jelel ta jyalel kʼu yelan xkuxlejalike.

Chalbe skʼoplal jun jkʼulej vinik ti tskʼupin li xkuxlejale. Pe nopem xaʼiik chakʼik jun jkʼanlimoxna vinik li ta stiʼ snae, Lasaro sbi xchiʼuk oy tajek ta yoʼonton tslajes yaʼi li kʼusitik chlilij yalel ta xmexa li jkʼulej vinike. Vaʼun, kʼalal echʼ batel kʼakʼale, cham li Lasaroe. Vaʼun, ikʼat batel yuʼun anjeletik ta xokon Abraan. Cham li jkʼulej vinik eke xchiʼuk laj yichʼ mukel. Li loʼile chakʼ ta aʼiel ti xkoʼolaj kʼuchaʼal oy to kʼusi kuxul kom yuʼunik kʼalal chamemik xa oxe. Li jkʼulej vinike yakal chil svokol kʼalal xtiltun li kʼokʼe. Jaʼ yuʼun, laj yalbe Abraan ti akʼo takbatuk tal li Lasaro sventa stsʼaj sniʼ skʼob ta voʼ yoʼ xtal sikubtasbatuk yokʼ ta jpʼajel voʼ. Pe li Abraane laj yal ti moʼoje, yuʼun jel xa li xkuxlejalike. Yuʼun oy jun natil xab ta oʼlol yuʼunik ti muʼyuk buchʼu xuʼ xjelav batele.

¿Mi melel van li loʼil taje?

Moʼoj. Jaʼ noʼox jun lokʼolkʼop laj yal Jesus sventa oy kʼusi chakʼ ta chanel. Li buchʼutik chchanbeik skʼoplale chalik ti muʼyuk la kʼot ta pasel ta melele. Jun skʼelobile, li Vivlia la slokʼes Lutero ta1912 li ta subtituloe chal ti jaʼ noʼox la jun lokʼolkʼope xchiʼuk li Vivlia ta Jerusalén chal li ta tsʼib ta yok vune ti jaʼ noʼox la jun lokʼolkʼop li loʼil taje. Jaʼ xkaltik, ti muʼyuk kʼot ta pasel ta melele.

¿Mi jaʼ la skʼan laj yal Jesus ti oy kʼusi kuxul chkom mi li jchame? ¿Mi jaʼ van chalbe skʼoplal ti oy buchʼutik chbatik ta kʼatinbake? Xchiʼuk, ¿mi tey van ta vinajel li Abraan xchiʼuk Lasaroe? Moʼoj, yuʼun oy srasonaltak ti mu jechuke.

¿Kʼu yuʼun jech chkaltik?:

• Ti teuk tikʼil ta kʼokʼ yakal chil svokol li jkʼulej vinike, ¿kʼuxi xa onoʼox ti mu xtakij li voʼ ta sniʼ skʼob Lasaroe?

• Akʼo mi mu x˗ul li voʼ ta sniʼ skʼob li Lasaroe, ¿mi tsta˗o van yoʼonton uni jpʼajel voʼ li jkʼulej vinik ti te oy ti bu xtiltun kʼokʼe?

• ¿Kʼuxi xa noʼox ti te ta vinajel Abraan ti jamal laj yal Jesus ti muʼyuk toʼox junuk buchʼu muyem batel ta vinajele? (Juan 3:13).

Li loʼil liʼe, ¿mi chakʼ ta aʼiel ti oy ta melel li kʼatinbake?

Moʼoj. Akʼo mi maʼuk melel, pe oy buchʼutik chalik ti jaʼ la skʼan xal ti chbatik ta vinajel li buchʼutik lekike xchiʼuk chbatik ta kʼatinbak li buchʼutik chopolike.a

Pe mu sta˗o ti jech chkaltike.

Li kʼusi chalik ta sventa li kʼatinbake mu jechuk chal li Vivliae. Li Vivliae muʼyuk chal ti yakal tskʼupin xkuxlejalik ta vinajel li buchʼutik lekike xchiʼuk ti jaʼ yakal chil svokolik ta kʼatinbak li buchʼutik chopolike. Yuʼun xi jamal chal li Vivliae: «Li buchʼutik kuxulik toe snaʼojik ti ta xchamike, pe li buchʼutik chamemike mu xa kʼusi snaʼik jsetʼuk» (Eklesiastes 9:5).

¿Kʼusi chalbe skʼoplal li loʼil taje?

Li kʼusi chakʼ ta aʼiel li loʼil liʼe, jaʼ ti oy chaʼtsop krixchanoetik ti jel ta jyalel li xkuxlejalike.

Li jkʼulej vinike jaʼ skʼan xal li jnitvanejetik ta relijion ta Juda ti «xpichʼet yoʼontonik ta takʼin» (Lukas 16:14). Akʼo mi laj yaʼiik li kʼusi laj yal Jesuse, pe muʼyuk la xchʼunik. Li jnitvanejetik ta relijione mu kʼusi xtun˗o laj yilik li krixchanoetike (Juan 7:49).

Li Lasaroe jaʼ skʼoplal li buchʼutik la xchʼamik li kʼusi laj yal Jesuse. Li jnitvanejetik ta relijione la spʼajik li krixchanoetik taje.

Li chaʼtsop krixchanoetik taje jel ta jyalel xkuxlejalik.

• Li jnitvanejetik ta relijione la snopik ti lek ch˗ilatik yuʼun li Jeovae. Pe ta melele xkoʼolaj kʼuchaʼal ti chamemike. Ta skoj ti muʼyuk la xchʼamik ti kʼu yelan chanubtasvan li Jesuse laj yichʼik pʼajel yuʼun li Diose, yuʼun maʼuk jech laj yichʼik ta mukʼ ti kʼu yelan tskʼan yoʼontone. Jech xtok, li mantal la xchol Jesus xchiʼuk li yajchankʼoptake chopol laj yaʼiik (Mateo 23:29, 30; Echos 5:29-33).

• Akʼo mi pʼajbilik li krixchanoetik yuʼun li jnitvanejetik ta relijione, ep buchʼutik la xchamik li mantal laj yal Jesuse. Koliyal taje jelbat˗o xkuxlejalik xchiʼuk lek ilatik˗o yuʼun li Diose (Juan 17:3).