¿Mi yaloj xa onoʼox Vivlia kʼu yelan stalelal krixchanoetik li avie?

Li kʼusi chal Vivliae

Jech. Li Vivliae yaloj xa onoʼox ti tsok stalelal li krixchanoetike, yuʼun muʼyuk xa chakʼik ta ilel slekil talelalik, jaʼ yuʼun muʼyuk xa jun yoʼonton kuxulik (2 Timoteo 3:1-5).a Pe li Vivlia xtoke laj yal ti mu jechuk stalelal skotol li krixchanoetike. Ta skoj ti koltabilik yuʼun Diose, epal krixchanoetik chakʼik persa ti jechuk snopik xchiʼuk ti jechuk xakʼik ta ilel stalelalik kʼuchaʼal lek chil li Diose (Isaias 2:2, 3).

Li ta xchanobil liʼe, ta jtakʼbetik batel li sjakʼobiltak liʼe:

¿Mi yaloj xa onoʼox Vivlia ti kʼu yelan stalelal xchiʼuk kʼu yelan tsnop li krixchanoetik avie?

Li Vivliae chalbe junantik stalelal li krixchanoetik avi ta skoj ti jaʼ noʼox skʼanoj sba stukike. Jech kʼuchaʼal ti mu snaʼ spajes sbaike, ti jaʼ noʼox skʼanojik li kʼusi kʼupil sba chaʼi stukike, ti jaʼ muʼyuk tskʼanik li Diose (2 Timoteo 3:2-4).

Yakal xa chkʼot ta pasel li albil kʼop liʼe: li krixchanoetik avie, jaʼ noʼox tsnop skʼop stukik, li kʼusi tskʼanike, ti xmuyubajikuke, li kʼusi staoj ta xkuxlejalike xchiʼuk yantik. Yileluke jaʼ mas batem ta yoʼontonik li kʼusi tskʼan stukike xchiʼuk yantik tsok-o batel. Epal krixchanoetike jaʼ noʼox tsnop skʼoplal stukik, muʼyuk tskʼanik li kʼusitik lekike xchiʼuk muʼyuk chakʼ ta ilel slekil talelalik xchiʼuk xnel noʼox chaʼiik. Yuʼun mu snaʼ stojik ta vokol ta sventa li kʼusitik oy yuʼunike xchiʼuk li kʼusi tspasik yantik ta stojolalike (2 Timoteo 3:2, 3).

Li Vivliae chal ti kʼalal tskʼan sba stukike, jaʼ yibel yan chopol talelaletik, jech kʼuchaʼal liʼe:

Batem ta yoʼontonik takʼin. Ep buchʼutik jaʼ batem ta yoʼontonik li takʼine, yuʼun tsnopik ti jaʼ to la lek xkuxlejalik mi oy ep stakʼinik xchiʼuk ep kʼusi x˗ayan yuʼunike (2 Timoteo 3:2).
Xtoyet chaʼi sbaik. Ep buchʼutik «stuk noʼox lek chaʼi sbaik, jpʼel xalik» xchiʼuk «xtoyet xa tajek chaʼi sbaik» (2 Timoteo 3:2, 4). Chakʼik tajek ta ilel xchiʼuk tstoy skʼoplalik ta skoj ti kʼusitik snaʼik spasele, stalelalik xchiʼuk ti oy stakʼinike.
Chchopol kʼoptavanik. Ta buyuk noʼox oy krixchanoetik ti «chchopol kʼoptavanik» xchiʼuk «chchopol loʼiltavanik» (2 Timoteo 3:2, 3). Jaʼ xkaltik, li krixchanoetik taje chchopol kʼoptaik yantik o chchopol kʼoptaik li Diose xchiʼuk tsjutbeik smul yantik.
Pimik ta mantal. Ep buchʼutik «muʼyuk stukʼil yoʼontonik», «mi jutebuk oy ta yoʼontonik tspas ta jmoj skʼopik», «j˗akʼvanejetik ta kʼabal» xchiʼuk «pimik ta mantal» (2 Timoteo 3:2-4). Taje jaʼo chakʼik ta ilel kʼalal muʼyuk chakʼ sbaik ta tsalele, ti mu skʼan xchapan li skʼopike o ti muʼyuk tspasik li kʼusi yalojike.
Simaronik. Epal krixchanoetike toj simaronik xchiʼuk toj anil ch˗ilinik, ta skoj taje toj chopol stalelalik xchiʼuk muʼyuk jsetʼuk xkʼuxul yoʼontonik (2 Timoteo 3:3).
Mu xchʼunik mantal. Li Jesuse laj yal ti «ch˗epaj [choplejal]» li ta jkʼakʼaliltike, jaʼ xkaltik, ti ep krixchanoetik mu xchʼunik mantale (Mateo 24:12). Jech xtok, laj yal ti oy «vochlajetele» o «avlajetele» (Lukas 21:9, tsʼib ta yok vun).
Muʼyuk tskʼan yutsʼ yalalik. Ta skoj ti oy ep «mu xchʼunbe smantal stot smeʼik» xchiʼuk ti «muʼyuk xa kʼanbail kʼuchaʼal stalel onoʼox jeche», li utsʼ alaliletik avie mas xa chil svokolik ta utsʼintael, ta majel o ta yan kʼusitik (2 Timoteo 3:2, 3).
Yichʼojik ta mukʼ Dios yilel. Jujun kʼakʼal ch˗epaj mas krixchanoetik ti «yichʼojik ta mukʼ Dios [yilele]» (2 Timoteo 3:5). Pe ti melel xkaltike, mu jechuk yakal tspasik, yuʼun jaʼ noʼox chchʼunbeik li jnitvanejetik ta relijion ta skoj ti jaʼ chalik li kʼusi tskʼan chchikintaike.

¿Kʼuxi chil-o svokol yuʼun yantik li buchʼu jaʼ noʼox skʼanoj sba stuke?

Ta skoj ti oy ep buchʼutik ti jaʼ noʼox tskʼan sba stukike, oy buchʼutik ch˗ipaj ta snopbenik xchiʼuk tsvul yoʼontonik (Eklesiastes 7:7). Jech kʼuchaʼal li buchʼutik skʼanojik li takʼine, tsloʼlaik xchiʼuk chilbajinik li yantike. Ta skoj ti muʼyuk xa kʼanbail kʼuchaʼal stalel onoʼox jeche, chutsʼintaik li yutsʼ yalalike, ta skoj taje xuʼ x˗ipajik ta vul oʼonton o ti tskʼan tsmil sbaike. Li buchʼutik muʼyuk stukʼil yoʼontonik xchiʼuk ti muʼyuk skʼanojik li kʼusi leke chakʼbeik svokol li buchʼutik chilbajinike.

¿Kʼu yuʼun jutuk mu skotoluk yakal tsok batel stalelal li krixchanoetike?

Li Vivliae chal ta melel ti kʼu yuʼun chopol li krixchanoetike:

Ta skoj ti tsikub ta yoʼontonik li kʼanelale, muʼyuk xa tskʼanik li Diose mi jaʼuk xa tskʼanik li krixchanoetike, yuʼun jaʼ xa noʼox tskʼan sba stukik (Mateo 24:12).
Li Satanase laj yichʼ jipel yalel tal ta balumil (Apokalipsis 12:9, 12). Jaʼ yuʼun, yakʼoj tajek persa ti jaʼ noʼox tskʼan sba stukik li krixchanoetike (1 Juan 5:19).

¿Kʼusi van skʼan jpastik kʼalal chopol tspas stalelal li krixchanoetike?

Li Skʼop Diose xi chale: «Chʼako me aba ta stojolalik» (2 Timoteo 3:5). Pe taje maʼuk skʼan xal ti mu xuʼ jchiʼintik li krixchanoetike, moʼoj, jaʼ ti mu xkamigointik li buchʼutik jaʼ noʼox skʼanoj sba stukik xchiʼuk xchʼakoj sbaik ta stojolal Diose (Santiago 4:4).

¿Mi ta van sok batel stalelal skotol li krixchanoetike?

Moʼoj, yuʼun li Vivliae yaloj xa onoʼox ti oy «buchʼutik tsjikʼ yoʼontonik xchiʼuk ti x˗avetik ta skoj li kʼusitik ibalik sba yakal chichʼ [pasele]» (Esekiel 9:4). Maʼuk xa chbat ta yoʼonton li kʼusi tskʼan stukike, yuʼun chakʼ ti akʼo xbeiltasatik yuʼun li smantaltak Diose. Ta skoj ti kʼu yelan chkʼopojik xchiʼuk tspas sbaike, chakʼik ta ilel ti jelelike (Malakias 3:16, 18). Chakʼik persa ti junuk yoʼonton oyik skotolike, muʼyuk xa chabatik ta paskʼop mi jaʼuk tsmaj sbaik (Mikeas 4:3).

¿Mi ta van sok-o ta j-echʼel stalelal li krixchanoetik ti muʼyuk xa smelolal li kuxlejale?

Moʼoj. Li krixchanoetike muʼyuk tsok˗o ta j˗echʼel stalelalik, yuʼun li Diose poʼot xa slajes li buchʼutik mu xchʼunik mantale (Salmo 37:38). Ta xakʼ ti x˗ayan jun achʼ balumile, jaʼ xkaltik, jtsop krixchanoetik ti jun yoʼonton chkuxiik ta sbatel osile (2 Pedro 3:13; Salmo 37:11, 29). Taje maʼuk noʼox jun vaychil, xuʼ jchʼuntik ta melel ti chkʼot ta pasele. Yuʼun li Vivliae, yakal tskolta krixchanoetik avi sventa sjel stalelalik xchiʼuk ti jechuk xkuxiik kʼuchaʼal lek chil li Diose (Efesios 4:23, 24).

a Li albil kʼopetik ta Vivlia xchiʼuk ti kʼu yelan oy li balumil avie, chakʼ ta ilel ti kuxulutik «li ta slajebal xa kʼakʼale» xchiʼuk «toj echʼ noʼox xibal sba» (2 Timoteo 3:1). Mi chakʼanbe to mas yaʼyejale, kʼelo li xchanobil «¿Kʼuxi jnaʼojtik ti ta slajebal xa kʼakʼal kuxulutike?».