12-ТӤ ЛЮКЕТ
Инмарлэн пайда вайись визьлыкез
Мадёнъёсын книга — со Инмарен сётэм пайдаё визь-кенешъёсын бичет; троссэ соос пӧлысь гожтӥз Соломон
МАР милемыз оскытэ, Иегова визьлыко Кивалтӥсь шуыса? Та юанлы валэктон шедьтон понна, эскеромы солэсь визь-кенешъёссэ. Пайдаё-а соос? Соосты улонамы кутӥмы ке, луомы-а ми шудогес? Визьмо Соломон эксэй туж трос мадёнъёс гожтӥз, кудъёссэ улонлэн пӧртэм удысъёсаз кутыны луэ. Тани куд-огез соос пӧлысь.
Инмарлы оскиське. Оскиськон юрттэ Иеговаен матысь эшъёс луыны. Соломон гожъяз: «Вань сюлмыныд Кузё-Инмарлы оскиськы, визьмыд вылэ эн пыкиськы. Быдэс улон-вылонэд ӵоже Кузё-Инмарез тодыны тыршы, Со тынэсьтыд сюресъёстэ шонертоз» (Мадёнъёс 3:5, 6). Ми Инмарлы оскиськимы ке, кивалтэтсэ курыса но солэсь кылзӥськыса, соку милям улонмы юнме уз ортчы. Озьы ми Иеговаез шумпоттомы, но со тушмонэзлэн, Шайтанлэн, янгыше уськытонэзлы ответ сётыны быгатоз (Мадёнъёс 27:11).
Мукетъёсыныз асьтэдыз визьлыко возе. Картъёслы, кышноослы но нылпиослы Инмарен сётэм визь-кенешъёс туннэ тужгес но пайдаё луо. Картъёсты кузпалъёссылы оскымон кыльыны ӧтьыса, Инмар визь-кенеш сётэ: «Егит дыр кышноеныд... майбыр ул» (Мадёнъёс 5:18—20). Бызем кышномуртъёслы Мадёнъёсын книгаын яркыт возьматэмын, кыӵе луэ ӟеч ужъёс лэсьтыса улӥсь кышно, кудзэ картэз но, нылпиосыз но данъяло (Мадёнъёс, 31-тӥ люкет). Нылпиос анай-атайёссылэсь кылзӥськыны косэмын (Мадёнъёс 6:20). Озьы ик Мадёнъёсын книгаын верамын, эшъяськон туж кулэ луэ шуыса, нош ас тодэмъя улон астэ гинэ яратэмез возьматэ (Мадёнъёс 18:1). Нош эшъёсты визьмо бырйыны кулэ, малы ке шуоно соос кызьы умоезлы, озьы ик уродэзлы дышетыны быгато (Мадёнъёс 13:21; 17:17).
Инмарлы ярамон амалэн улэ. Мадёнъёсын книга туж умой визь-кенешъёс сётэ: трос вина юоно ӧвӧл, саклыкез висъяно ӧвӧл солы, мар куашкатэ, нош солы, мар юнматэ, но ужез яратоно (Мадёнъёс 6:6; 14:30; 20:1). Со алэ, Инмарлэн визьлыкез интые асьмелэн визьлыкмы вылэ оскиськимы ке, шугадӟонъёсын пумиськомы шуыса (Мадёнъёс 14:12). Та книга ӧте милемыз сюлэммэс, яке пуш дуннемес, уродэзлэсь утьыны, «малы ке шуоно отысь пото улон ошмеслэн сиосыз» (Мадёнъёс 4:23).
Быдэс дунне вылысь трос миллион адямиос асьсэ вылын шӧдӥзы, та визь-кенешъёслы луыса, соослэн улонзы умойгес луиз шуыса. Соин ик соослэн трос мугъёссы вань Инмарлэсь, Кивалтӥсьлэсь кадь, кылзӥськыса улыны.
Пыкиськемын: Мадёнъёсын книга.