Мынам кулэме уг поты вал!

КЫЗЬЫ АЗЬЛО УЛӤ

Мон вордӥськи Паддингтонын, Лондонлэн трос калыко ёросаз. Мон улӥ анаеным но куинь апайёсыным. Атае ми доры лыктэ но, кошке но вал. Со трос вина юыса улӥз.

Пичи дыръям ик анае дышетӥз монэ изьыны выдэмлэсь азьло вӧсяськыны. Мынам вал пичи Библие, кудаз Псаломъёсын книга гинэ вал. Мон ачим гуръёс малпай но Псаломъёсты кырӟай. Одӥг книгаысь мон лыдӟи кылъёсты, кудъёсыз мынам йырам бергазы: «Вуоз нунал, куке ӵуказе уз луы». Собере мон уйбыт изьытэк потӥ — вуоноез сярысь малпанъёс нокызьы но йырысьтым ӧз потэ. Мон малпай: «Адями малы ке но улэ ук? Малы мон вордӥськи?» Мынам кулэме уг поты вал.

Мыным тунсыко потӥз ваньмыз, мар периосын герӟаськемын вал. Мон кулэмъёсын но вераськыны турттӥ. Школаысь эшъёсыным мон шайвылэ ветлӥ. Озьы ик ми учкимы кӧшкемыт фильмъёсты. Со кышкыт ке но вал, ми учкимы.

10 арес дыръям ик мон умойтэм сюрес вылэ султӥ. Мон тамак но марихуана кыскыны кутски. 11 арес дыръям нырысьсэ вина веръяй. Шӧмыз мыным ӧз кельшы, но кельшиз, кызьы мон асме собере шӧдӥ. Мон яратӥсько вал крезьгуръёс кылзыны но эктыны. Уйёсы клубъёсын шулдыръяськыса гинэ улыны турттӥсько вал. Уйин дорысьтым пегӟисько но ӵукнаяз гинэ бертӥсько вал. Ӵем дыръя мукет нуналаз мон школае ӧй ветлы, малы ке шуоно асме урод шӧдӥ. Нош куке мон школае мынӥсько вал, урокъёс вискын вина юыса улӥ.

Школаез мон туж урод йылпумъяй. Анае улэме сярысь номыр уг тоды вал бере, солэн туж вожез потӥз. Ми керетӥмы но, мон дорысьтымы кошки. Кӧня ке дыр ӵоже мон Тони нимо пияше дорын улӥ. Со лушкаськыса улӥз, наркотикъёсын вузкариз но лек адями вал. Ӝоген мон пияно луи но 16 арес дыръям пи вайи.

КЫЗЬЫ БИБЛИЯ МЫНЫМ ЮРТТӤЗ

Нырысетӥзэ Иеговалэн Адӟись-Ивортӥсьёсыныз мон пумиськи, куке бызьымтэ анайёслы приютын улӥ. Кивалтӥсьёс мыным но пиелы отын комната сётӥзы. Иеговалэн Адӟись-Ивортӥсьёсыз луись кык кышномуртъёс ялан ветлӥзы куд-ог егит анайёс доры. Одӥг пол мон но вераськоназы пыриськи. Мынам возьматэме потэ вал, Адӟись-Ивортӥсьёс шонертэм малпасько шуыса. Нош соос вань юанъёсылы Библиысь валамон валэктонъёс сётӥзы. Соос туж лякытэсь вал, соин ик мыным соос туж кельшизы но, мон соосын Библиез дышетыны соглаш кариськи.

Ӝоген мон Библиысь тодӥ сое, мар мынэсьтым улонме воштӥз. Пичи дырысеным ик мон кулонлэсь кышкасько вал. Нош табере мон тодӥ, Иисус улӟытон сярысь дышетӥз шуыса! (Иоанн 5:28, 29). Озьы ик мон тодӥ, Инмар монэ яратэ шуыса (1 Пётр 5:7). Тужгес но мынам сюлмам пыризы Иеремиялэн 29:11 гожтэм кылъёс: «Мон тодӥсько тӥ пумысен Аслэсьтым малпанъёсме-мылкыдъёсме,— шуэ Кузё-Инмар,— ӟеч каронлы со малпанъёс, уродлы ӧвӧл — тӥледлы азьпал улон но оскиськон сётон понна». Табере мынам осконэ вань рай музъем вылын пырак дауръёс ӵоже улыны (Псалтирь 36:29).

Иеговалэн Адӟись-Ивортӥсьёсыз мыным сюлмысь яратэмзэс возьматӥзы. Тодӥсько на, куке мон нырысетӥзэ пумиськоназы лыктӥ, соос пӧлын ӟеч мылкыд вал шуыса. Ваньзы монэ туж шуныт пумитазы! (Иоанн 13:34, 35). Черкын, кудаз мон ветлӥ, адямиос асьсэды чылкак мукет сямен возизы. Нош Адӟись-Ивортӥсьёс, югдуре шоры учкытэк, асьсэды монэн лякытэн возизы. Соос мыным дырзэс но саклыксэс висъязы, уж вылын юрттӥзы. Мон шӧдӥ, бадӟым яратӥсь семьяе сюри шуыса.

Библиез дышетыса, мон валай, Инмарлэн курон-косонъёсызъя улон понна, мыным воштӥськоно шуыса. Мыным секыт вал ке но, мон быгатӥ тамак кысконме куштыны. Со дыре ик мон валай, крезьгуръёс, кудъёссэ мон кылзӥсько, марихуанаез кыскыны мылкыдме ӝуто шуыса. Соин ик сыӵе крезьгуръёсты кылзэмысь мон дугдӥ. Вина юэме медаз поты шуыса, мон уйин клубъёсы ӧй ветлы ни но азьвыл эшъёсыным ӧй шулдыръяськы ни. Мон эшъяськыны кутски соосын, кинъёс мыным умой адӟем карон возьматӥзы но Инмарлэн курон-косонъёсызъя улыны юрттӥзы (Мадёнъёс 13:21).

Со дыре ик Тони но Иеговалэн Адӟись-Ивортӥсьёсыныз Библиез дышетыны кутскиз. Куке Адӟись-Ивортӥсьёс, Библиез кутыса, юанъёсызлы валэктонъёс сётӥзы, со валаз, зэмлыкез шедьтӥз шуыса. Со быдэсак аслэсьтыз улонзэ воштӥз. Со дугдӥз азьвыл эшъёсыныз эшъяськемысь, йыружъёс лэсьтэмысь но марихуанаез кыскемысь. Милям потэ вал Иеговаез шумпоттэммы. Соин ик гожтӥськыны малпамы, пимы анаен но, атаен но мед будоз шуыса. 1982-тӥ арын ми кузпалъяськимы.

Тодӥсько на, кызьы мон «Возьмаськон башня» но «Сайкалэ!» журналъёсысьa статьяос утчай, кытын вераськиз адямиос сярысь, кудъёсыз мон сямен улӥзы но воштӥськыны быгатӥзы. Сыӵе учыръёс монэ туж шумпотто вал! Соос мынэсьтым мылкыдме ӝутӥзы, азьланяз но воштӥськонъёс лэсьтыны. Мон Иеговаез туж кури, со монэ медаз кельты шуыса. 1982-тӥ арын, пӧсьтолэзе, ми Тониен пылатӥськимы но Иеговалэн Адӟись-Ивортӥсьёсыз луимы.

КЫЗЬЫ УЛОНЭ ВОШТӤСЬКИЗ

Иегова Инмарен эшъяськыса, мон улэп кыли. Ми Тониен шӧдӥмы, кызьы Инмар милемлы секыт дыръёсы но юрттӥз. Ми дышимы Иегова вылэ оскиськыны но тодӥськомы, со котьку милемын вал но семьямы сярысь сюлмаськиз шуыса (Псалтирь 54:23).

Мон шумпотӥсько, ми пимылы но нылмылы Иеговаез яратыны юрттӥмы шуыса, озьы ик соос асьсэлэсь но нылпиоссэс Иеговаез яратыны дышето шуыса.

Табере мон уйёсы изьыны быгатӥсько. Вуоноез сярысь яке кулон сярысь малпанъёс монэ уг сюлмаськыто ини. Ми Тониен котькуд арняе кенешысь кенеше ветлӥськомы, огъя оскисьёсмес юнматон понна. Соосын ӵош ми мукет адямиослы юрттӥськомы Иисус Христослы оскыны, соос но пырак дауръёс ӵоже улыны мед быгатозы шуыса.