Ӟеч уж, кудӥз зэмлыкез шедьтыны юрттӥз
ПИЧИ гинэ карын Гуджарат штатын (Индия) Джон нимо пияш улӥз. Солэн атаез 1950-тӥ аръёслэн пумаз Иеговалэн Адӟись-Ивортӥсез луиз. Атаезлэн выль осконэз Джонлы, солэн анаезлы, апаезлы, сузэръёсызлы но вынъёсызлы ӧз яра, малы ке шуоно соос туж оскись католикъёс вал.
Одӥг пол атаез Джонэз кенешысьтызы вын-агайлы конверт нуыны косӥз. Ӵукнаяз Джон, бадӟым корт бочкаез усьтыкуз, чиньызэ туж мур вандӥз вал. Атаезлэсь куронзэ быдэстон понна, со чиньызэ ӟустариен биниз но вын-агай доры кошкиз.
Куке Джон гожтэм адресъя вуиз, ӧсэз усьтӥз вын-агайлэн кышноез. Со но Иеговалэн Адӟись-Ивортӥсез вал. Конвертэз басьтыкуз, со пияшлэсь вандӥськем чиньызэ адӟиз но выльысь биньыны ӵектӥз. Эмъюмъёссэ поттыса, сузэр вандӥськем интызэ антисептикен зыраз но чиньызэ биниз. Собере со Джонэз пӧсь чаен куноятӥз но лякытэн соин Библия сярысь вераськыны кутскиз.
Сузэрлэсь сюлмаськемзэ адӟыса, Джон мукет сямен учкыны кутскиз Адӟись-Ивортӥсьёс шоры. Со юаз со сярысь, мар пумысен соос атаеныз пӧртэм сямен малпало вал: Христос Инмар луэ-а но кулэ-а христианъёслы Дева Мариялы вӧсяськыны. Сузэр гуджарати кылэз тодэ вал, соин ик Джонлэн юанъёсызлы солэн вордскем кылыныз валэктыны быгатӥз. Со возьматӥз Джонлы, мар со сярысь верамын Библиын, но сётӥз солы «Эта благая весть о Царстве» брошюраез.
Берлогес, со брошюраез лыдӟыса, Джон валаз, зэмлыкез шедьтӥз шуыса. Со мынӥз священник доры но солы со юанъёсты ик сётӥз. Священник туж ӝог пурӟиз но, Джонэз Библиеныз лэзьыса, кесяськыны кутскиз: «Тон Шайтан луид! Возьматы, кытын Библиын верамын, Христос Инмар ӧвӧл шуыса. Возьматы, кытын верамын, милемлы Мариялы вӧсяськоно ӧвӧл шуыса. Возьматы!» Джон туж паймиз но вераз солы: «Католической черке пыдме но уг лёгы ни!» Сётэм кылзэ со быдэстӥз.
Джон Библия дышетыны кутскиз, осконзэ юнматӥз но зэмос Инмарлэн ужась-тыршисез луиз. Дыр ортчыса семьяысьтызы мукетъёсыз но Адӟись-Ивортӥсьёс луизы. 60 ар ортчиз ини, но Джонлэн бур киысьтыз азьчиньыяз вандэм бервылыз али ке но адӟиське на. Со шоры учкыса, Джон тодаз вае сузэрлэсь ӟеч ужзэ, кудӥзлы луыса со Инмарлы ужаны-тыршыны кутскиз (2 Кор. 6:4, 6).