Тодӥськоды-а тӥ?
Нырысетӥ даурысь сӥнагога: Та суредын нырысетӥ даурысь сӥнагогалэн куд-ог люкетъёсыз возьматэмын. Со интыяськемын вал Гамла карын, кудӥз Галилей зарезьлэсь уйпал но шундыӝужан пала 10 иськемын вал. Суред син азе пуктыны юрттэ, кыӵе луыны быгатэ вал вашкала сӥнагога.
Кызьы кылдӥзы сӥнагогаос?
«СӤНАГОГА» кыл кылдэмын грек кыллэсь, кудӥз «кенеш» яке «ӵош люкаськыны» шуэмез возьматэ. Та туж тупась ним, малы ке шуоно вашкала дырысен иудейёс сӥнагогаосы люкасько вал, дышетскон но Инмарлы йыбыртъян понна. Еврей Гожтэмъёсын сӥнагогаос сярысь пырак уг вераськы, нош Христиан Грек Гожтэмъёсысь адӟиське, асьме вакытысь нырысетӥ даурын соос вал ини шуыса.
Тросэз тодосчиос малпамъя, нырысетӥ сӥнагогаос кылдӥзы, куке иудейёс вавилон пленын вал. «Иудей энциклопедиын» гожтэмын: «Иудейёслы, кудъёсыз храмтэк кылизы но мурт шаере сюризы, буйгатскон кулэ вал; куддыръя соос ӵош люкаськылӥзы, кӧс нуналъёсы, вылды, но Гожтэмъёсты лыдӟизы». Куке иудейёс мозмытэмын вал, соос азьланяз но люкаськылӥзы, луоз, вӧсяськон но Гожтэмъёсты лыдӟон понна. Сӥнагогаос кылдылӥзы котькытын, кытын еврейёс улӥзы.
Асьме вакытысь нырысетӥ даурлы Быдӟым зарезь котырысь шаеръёсын, Ближний Востокын но Израильын улӥсь иудейёс пӧлын сӥнагогаосын религиен но адямиослэн улонэнызы герӟаськем ужъёс мынӥзы. Тани мар вера Иерусалимысь Еврей институтысь Ли Левин профессор: «Отчы дышетскыны но священной сиён сиыны лыктылӥзы, отын судъёс мынӥзы, иудейёслэн коньдонзы возиськиз но пумиськонъёс ортчытӥськизы, кытын политикаен но адямиослэн улонэнызы герӟаськем юанъёс эскериськизы». Со ватса: «Валтӥсь саклык висъяськиз Инмарлы йыбырттонэн герӟаськем ужъёслы». Соин ик валамон луэ, малы Иисус сӥнагогае ӵем лыктылӥз (Марк 1:21; 6:2; Лука 4:16). Отын со адямиосты дышетылӥз но буйгатылӥз. Христиан кенеш кылдэм бере, апостол Павел но сӥнагогаосын трос тодытылӥз. Соос, кинъёслэн Инмарен матысь кусыпъёс воземзы потэ вал, ӵемысь отчы ветлӥзы. Соин ик Павел, кыӵе ке каре вуыса, ӵем дыръя нырысь ик сӥнагогае мынэ вал (Ап. уж. 17:1, 2; 18:4).