Тодӥськоды-а тӥ?

Мар кароно вал юртэн кивалтӥсьёслы вашкала дыръёсы?

ВАШКАЛА дыръёсы юртэн кивалтӥсь кузёезлэсь ужъёссэ нуэ вал, юртъереныз яке ваньбуреныз кивалтыса.

Куке Иосиф, Иаков патриархлэн пиез, Египетын Потифарлэн ляльчиез вал, Потифар сое аслаз юртэныз кивалтӥсь луыса пуктӥз. Со, «маиз солэн вал, ваньзэ Иосиф кие сётӥз» (Ул.-выл. 39:2—6). Берлогес Иосиф Египетын кужмо кивалтӥсь луиз но ачиз аслаз юртаз кивалтӥсез пуктӥз (Ул.-выл. 44:4).

Иисус Христос улон нуналъёсы музъемен ужасьёс ӵем дыръя уло вал каръёсын, бусыоссылэсь кыдёкын. Соин ик соос пуктылӥзы кивалтӥсьёсты, кудъёсыз чаклазы бусыосазы котькуд нунал ужасьёсты.

Кыӵе куронъёс пуктӥсько вал юртэн кивалтӥсьёс азьын? Асьме вакытысь I даурысь рим гожъяськись Колумелла вералляз, юртэн кивалтӥсе пуктоно шуыса ляльчиез, кудӥз музъемен «умой ужаны быгатӥз». Со ляльчилы сыӵе сямо луоно вал, со «рос-прос но лекъяськытэк кивалтыны» мед быгатоз шуыса. Колумелла ватсаз: «Валтӥсез, мар юртэн кивалтӥсь карыны кулэ: удысын, кудаз со номыре уг тоды, ассэ ваньзэ тодӥсен медаз лыдъя, нош тодыны мед тыршоз сое, мар солы тодмо ӧвӧл».

Инмарлэн Кылаз юртэн кивалтӥсь сярысь вераське возьматон понна, кыӵе ужъёс нуисько христиан кенешын. Кылсярысь, апостол Пётр христианъёслэсь мылкыдзэс ӝутэ Инмарен сётэм быгатонлыкъёссэс уже кутыны, ог-огзылы юрттӥськыса, «Инмарлэсь пӧртэм пумо дэлетъёссэ басьтӥсь коркаен ӟеч» кивалтӥсьёс кадь (1 Пётр 4:10).

Иисус Христослэн мадёназ но, кудӥз гожтэмын Лукалэсь 16:1—8, юртэн кивалтӥсь сярысь вераське. Со сяна, азьпалзэ ивортонын, кудаз Иисуслэн вуоно Эксэй луонэзлэн тодметэз сярысь вераське, Иисус дышетскисьёссэ оскытэ, со «оскиськымон, визьмо ляльчиез» яке «оскиськымон... юртэн кивалтӥсез» пуктоз шуыса. Та кивалтӥсьлэн валтӥсь ужез — христианъёслы берпум нуналъёсы кулэ луись духовной сиён сётыны (Матф. 24:45—47; Лука 12:42). Ми туж шумпотӥськомы, осконмес юнматыны быгатӥськомы шуыса, уже кутыса публикациосты, кудъёссэ дася но быдэс дунне вылын вӧлмытэ оскиськымон юртэн кивалтӥсь!