«Нырысь ик тупа братэныд». Кызьы сое лэсьтоно?

Пукты син азяд, тон Галилеяын Иисус улон вакытэ улӥськод шуыса. Тон Иерусалиме Тылыс пуктон празднике лыктӥд. Каре пӧртэм интыосысь трос калык люкаськиз. Тынад Иеговалы курбон ваемед потэ. Пудо-животэз сьӧрад нуыса, тон мырдэм мынӥськод трос адямиос пӧлтӥ храм доры. Лыктыса тон адӟиськод, отын но трос адямиос шуыса. Соослэн, тынад кадь ик, курбон ваемзы потэ. Но тани вуэ тынад черодэд священникъёслы пудо-животэз сётыны. Ӵапак со дыре тынад тодад лыктэ, братэдлэн тыныд кыӵе ке но кӧтӝожез вань шуыса. Братэд храме лыктэмъёс пӧлын яке кытын ке карын. Иисус валэктӥз, мар тыныд лэсьтоно. (Лыдӟы Матфейлэсь 5:24.) Кызьы тӥледлы кусыпъёстэс тупатоно? Улӥын гожтэм амалъёс пӧлысь бырйы, мар лэсьтоно тыныд но братэдлы.

МАР КАРОД ТОН?

• Братэным верасько соку гинэ, куке солэн мон вылэ куатаськыны зэмзэ но мугез вань

• Малпасько ке, братэ ваньзэ шонертэм валаз яке ми кыкнамы но янгыш шуыса, соку солы сое валэктыны тыршо

• Братме сак кылзо. Малы со мон вылэ куатаськемын, пумозяз уг валаськы ке но, мон верало: «Вождэ эн вай, мон тонэ вӧсь кари. Озьы лэсьтэме уг поты вал»

МАР КАРОЗ БРАТЭД?

• Кенешысь мукетъёсты ас палаз карыны тыршыса, соослы вералоз, кызьы тон сое вӧсь карид

• Тодаз вайылыса ваньзэ, малы со тон вылэ куатаськиз, тонэ янгыше уськытоз но янгышез ас вылад басьтыны косоз

• Валалоз, соин вераськон понна, тыныд зӥбыт-востэм но кышкасьтэм сямо луыны кулэ вал шуыса. Но сюлмысь тонэ простить кароз

Милемлы туннэ пудо-животъёсты курбонлы ваёно ӧвӧл ке но, кызьы Иисуслэн визь-кенешез возьматэ: милям йыбырттонмы Иеговалы ярамон луэ соку гинэ, куке ми вын-агайёсынымы тупаса улӥськомы?