Лыдӟисьёслэн юанъёссы
Мае сииз израиль калык луоё кыр дуннеын, манна но бӧдёноос сяна?
Луоё кыр дуннеын 40 ар ӵоже улыкуз, израиль калык манна сиысагес улӥз (Пот. 16:35). Озьы ик Библиын гожтэмын кык учыръёс, куке Иегова соосты бӧдёно сӥлен сюдӥз (Пот. 16:12, 13; Лыд. 11:31). Но та сяна калыклэн мукет но сиёнэз вал.
Кылсярысь, куддыръя Иегова израиль калыкез вуттылӥз сыӵе «дугдон интые», кытын соос ву но сиён понна будосъёс шедьтыны быгато вал (Лыд. 10:33). Одӥгез сыӵе инты — Елим оазис. «Отын дас кык ошмесъёсысь ву потыса улӥз, сизьымдон финикпуос будӥзы» (Пот. 15:27). Одӥг книгаын со сярысь вераське: «Финикпуос трос интыосын будо... Луоё кыр дуннеын улӥсь трос миллион адямиос ӵем дыръя финикпуэз куто, сиён но вӧй поттон понна, озьы ик улон инты лэсьтон понна» (Plants of the Bible).
Озьы ик израиль калык дугдылӥз, вылды, бадӟым оазисе, кудзэ туннэ Фаран шуыса нималоa. Со шур дурын интыяськемын. Одӥг книгаын та инты сярысь вераське: «Солэн кузьдалаез — 130 иськем. Сӥнай мукожын со одӥгез тужгес но кузь, чебер но тодмо инты». Озьы ик со книгаын гожтэмын: «Фаран оазис интыяськемын ог 45 иськем кемын со интылэсь, кытын шур зарезе усе, но зарезьлэсь ог 600 метрлы вылӥынгес. Солэн кузьдалаез — 5 иськем пала. Отын трос финикпуос будо. Та оазис туж чебер. Соин ик сое Едем садэн ӵошато. Вашкала дырысен трос адямиос отчы ветло со финикпуосты адӟыны» (Discovering the World of the Bible).
Финикпуос Фаран оазисын
Египетысь кошкыкуз, израиль калык сьӧраз басьтӥз котэм нянь, нянь шумес, озьы ик ю тысь но вӧй, вылды. Ваньмыз та кемалы ӧз тырмы, луоз. Со сяна, «туж трос ыжъёс, кечъёс, ишакъёс, скалъёс, ошъёс соосын ӵош мынӥзы» (Пот. 12:34—39). Луоё кыр дуннеын ву но сиён туж ӧжыт вал бере, тросэз пудозы кулӥз. Озьы ик куд-ог пудозэс соос сиизы, нош куд-огзэ курбонлы вайизы, зэмос луисьтэм инмаръёслы но (Ап. уж. 7:39—43)b. Та шоры учкытэк, луоё кыр дуннеын вань улытозяз, израиль калыклэн пудоез вал. Та адӟиське Иеговалэн кылъёсысьтыз, кудъёссэ со вераз, куке соос солэсь ӧз кылзӥське: «Тӥляд пиосты 40 ар ӵоже луоё кыр дуннеын пудо возьмасьёс луозы» (Лыд. 14:33, ВД). Соос пудо возьмасьёс вал бере, соослэн йӧлзы но сӥльзы вал, дыр. Но со туж ӧжыт вал, луоз, 40 ар ӵоже ог 3 миллион адямиез сюдон поннаc.
Соку маин сюдэ но люкта вал израиль калык аслэсьтыз пудозэ?d Вашкала дыръя луоё кыр дуннеын зоръёс но будосъёс тросгес вал, вылды. «Гожтэмъёсты валан» книгаын (ӟуч), «Аравия» статьяын, вераське: «Ог 3500 ар талэсь азьло Аравияын ву тросгес вал. Шуръёслэн мур куасьмем ӧръёссы возьмато, азьло зор вуос соосты тырмытыны быгато вал шуыса». Озьы ке но луоё кыр дунне шимес инты вал (К. Зак. 8:14—16). Иегова паймымон амалэн ву ӧй сётысал ке, адямиос но пудоос кулысалзы (Пот. 15:22—25; 17:1—6; Лыд. 20:2, 11).
Кызьы вераз Моисей, израиль калыкез маннаен сюдыса, Инмарлэн соослы валэктэмез потэ вал, «адями нянен гинэ уг улы, Кузё-Инмарлэн ымысьтыз потӥсь котькудӥныз кылыныз со улэ» шуыса (К. Зак. 8:3).
a Учке 1992-тӥ арын 1-тӥ куартолэзь понна поттэм «Возьмаськон башняез» (ӟуч), 24-тӥ но 25-тӥ бамъёсты.
b Библиын гожтэмын кык учыръёс, кызьы луоё кыр дуннеын Иеговалы пудо-животъёсты курбонлы вайылӥзы. Нырысетӥез — куке Инмар Ааронэз но солэсь пиоссэ священникъёс карыса ужаны-тыршыны пуктӥз, нош кыкетӥез — Пасха дыръя. Кыкез ик та учыръёс луизы асьме вакытлэсь азьло 1512-тӥ арын, израиль калыклэн Египетысь потэмез бере ог ар ортчыса (Лев. 8:14—9:24; Лыд. 9:1—5).
c Луоё кыр дуннеетӥ 40 ар ӵоже ветлонэзлэн пумаз израиль калык мукет калыкъёсын ожмаськиз но трос сюрс пудозэс аслыз карылӥз (Лыд. 31:32—34). Озьы ке но, Сӥзем музъеме пырытозяз, израиль калык манна сииз (Иис. Н. 5:10—12).
d Номыр уг возьматы, пудоос но манна сиизы шуыса. Малы ке шуоно Иегова косӥз, израиль калык пӧлысь котькудӥз аслыз сиымон мында гинэ мед бичалоз шуыса (Пот. 16:15, 16).