3-тӥ люкет
Кызьы тодыны быгатӥськомы, Инмар вань шуыса?
1, 2. Мар асьмелы валаны юрттоз, Инмар вань шуыса?
ОДӤГЕЗ амал, кудӥз валаны юрттэ, вань-а Инмар,— со вошъяськисьтэм малпанэз лыдэ басьтон: мар лэсьтэмын, солэн лэсьтӥсез луыны кулэ. Макем шуггес лэсьтэм арбери, сокем кибашлы луыны кулэ лэсьтӥсез.
2 Кылсярысь, учкы котыр ас корка пуштэ. Ӝӧкъёс, пуконъёс, кроватьёс, табаос, кастрюляос, тэркыос но мукет сиён-юон тӥрлыкъёс — ваньмыз со кинэн ке но лэсьтэмын, озьы ик борддоръёс но, выжъёс но, вӧлдэтъёс но. Та арбериосты лэсьтыны сокем секыт ӧвӧл. Таӵе огшоры арбериослы но лэсьтӥсь кулэ бере, шуггес лэсьтэм арбериослы визьмогес лэсьтӥсь кулэ ӧвӧл-а?
Асьмелэн паймымон дуннемы
3, 4. Кызьы асьмелы быдэс дунне валаны юрттэ, Инмар вань шуыса?
3 Котькуд часлэн лэсьтӥсез вань. Соку мар вераны луоз асьмелэн мертаны луонтэм эшшо но шуггес шунды системамы сярысь, кудаз инсьӧрмуос даурысь дауре, одӥг секундлы но бере кыльытэк, шунды котыртӥ бергало? Нош мар вераны луоз асьмелэн Млечной Путь галактикамы сярысь, кудаз 100 миллиардлэсь уногес кизилиос? Куке но уин дугдыса ик учкылӥд-а тон со шоры? Ӧд паймылы-а солы? Нош табере малпаськы вераны луонтэм бадӟым быдэс дунне сярысь, кудаз Млечной Путьлы укшась трос миллиард галактикаос! Со сяна, инсьӧрмуос но кизилиос, дауръёс ӵоже шонер но вошъяськытэк бергамзы понна, шонер ветлӥсь часъёсын ӵошатэмын.
4 Часъёслы гинэ но лэсьтӥсь кулэ бере, веранэз ӧвӧл, соослэсь шуггес но паймымонгес дуннелэн малпасез но кылдытӥсез луыны кулэ. Соин ик Библия ӧте асьмемыз: «Инъёслэн вылӥязы, синъёстэс ӝутыса, учкелэ». Но юа: «Кин соосты кылдытӥз?» Собере валэктэ: «Соосты ваньзэс Со [Инмар] нимзыя вера; Инмарлэн быдӟым кужымез, туж бадӟым кужымез, Со дорын номыр но уг ышы-быры» (Исаия 40:26). Озьыен, быдэс дунне кылдытэмын адӟиськисьтэм, кивалтӥсь, визьмо кужымен — Инмарен.
Номырин ӵошатыны луонтэм музъем
5–7. Ма возьматэ, музъемлэн Кылдытӥсез вал шуыса?
5 Макем тодосчиос тросгес музъемез эскеро, сокем умойгес соос валало, со сыӵе паймымон амалэн кылдытэмын вал, отын адямиос улыны мед быгатозы шуыса. Кылсярысь, шундыен музъем вискын сыӵе кусып, кудӥзлы луыса музъем вылэ тырмыт югыт но шуныт вуэ. Одӥг ар куспын музъем быдэсак шунды котыртӥ берыктӥське, со понна пӧртэм шаеръёсын арлэн дыръёсыз вошъясько. Озьы ик музъем 24 часлы быдэ ас котыртӥз котыртӥське на, соин ик котьку но уез нунал воштэ. Солэн атмосфераысьтыз газъёслэн тупась суретсы асьмелы шоканы юрттэ но инсьӧрысь радиацилэсь уте. Озьы ик отын вань будосъёслы кулэ луись вуэз но муэз.
6 Ваньмыз вылӥын верам но мукет факторъёс огъя ӧз ужасалзы ке, улон но ӧй луысал. Юнме шорысь кылдӥзы-а соос? Одӥг журналын вераське: «Сыӵе шонер кылдэм югдуръёс асьсэ понназы кылдыны ӧз быгатысалзы, дыр» (Science News). Зэм, ӧз быгатысалзы. Соос юри малпаса лэсьтэмын Кылдытӥсен.
7 Чебер корка пырыса, трос сиён-юонэз, шунтон но омырез чылкытатон системаосты но ӟеч водопроводэз адӟысалыд ке, мар тон малпасалыд? Ваньмыз со ас понназ кылдӥз-а? Ӧз. Тон одно ик малпалод, визьмо адями туж сюлмаськыса малпаз но лэсьтӥз сое. Озьы ик музъем но сюлмаськыса малпамын но улӥсьёсызлы ваньзэ кулэзэ сётон понна лэсьтэмын вал. Коркаен ӵошатыса, отын ваньмыз умойгес но устогес лэсьтэмын.
8. Мар эшшо возьматэ на, Инмар асьмемыз яратэ но асьме сярысь сюлмаське шуыса?
8 Озьы ик малпаськы ваньмыз сярысь, мар улонэз шулдыргес каре. Учкы пӧртэм ческыт зыно чебер сяськаос шоры, кудъёсыз адямиослы шумпотон ваё. Со сяна, вань на трос пӧртэм ческыт сиён-юонъёс, суредано кадь чебересь нюлэсъёс, гурезьёс, тыос но мукет. Нош мар вераны луоз шунды пуксёнъёс сярысь, кудъёсыз улонамы эшшо но трос шумпотон ваё? Кыӵе шумпоттэ асьмемыз кучапиослэн но коӵышпиослэн тумошо шудэмзы! Озьыен, инкуазь асьмелы пӧртэм пумо шумпотонъёс вае, кудъёсызтэк улыны но быгатысалмы. Ваньмыз та возьматэ, музъем адямиосты яратыса но соос сярысь сюлмаськыса кылдытэмын, соос котьку но шумпотыса мед улозы шуыса.
9. Кин музъемез кылдытӥз но малы?
9 Соин ик визьмо йылпумъян лэсьтыны луэ: ваньзэ тае Сётӥсь вань. Сое лыдэ басьтоно, кызьы лыдэ басьтэ Библиез гожтӥсь, кудӥз Иегова Инмар сярысь вера: «Тон инэз но музъемез кылдытӥд». Малы? Со валэктэ: «[Инмар] юнматӥз сое, юнме ӧз лэсьты, улон понна сое кылдытӥз» (Исаия 37:16, 45:18).
Паймымон улэп клетка
10, 11. Маин паймымон луэ улэп клетка?
10 Нош мар вераны луоз луло макеос сярысь? Соослэн но кылдытӥсьсы луыны кулэ ӧвӧл-а? Кылсярысь, учкомы улэп клеткалэсь кӧня ке паймымон аспӧртэмлыкъёссэ. Молекулярной биология удысысь тодосчи Майкл Дентон ас книгаяз гожтӥз: «Туннэ нуналлы тужгес огшоры луло макеос но — бактериослэн клеткаоссы — пӧрмемзыя ортчыт шугесь луо. Бактериослэн клеткаоссы укыр пичиесь ке но... котькудӥз соос пӧлысь быдэс фабрикалы кельше, кудаз сюрслэсь трос мур малпаса лэсьтэм люкетъёс шуг молекулярной механизм кылдыто... Со, адямиен лэсьтэм механизм сярысь, трослы шуггес луэ, но солы тупасез ӧвӧл ни» (Evolution: A Theory in Crisis).
11 Котькуд нимаз басьтэм клетка сярысь со вера: «ДНК иворез умойгес возьыны быгатэ, мукет пӧртэм тодмо луись системаос сярысь; со сокем усто, адями сярысь вань информациез пушказ возьыса но, секталаезъя одӥг граммлэн трос миллиард люкетэзлэсь капчигес луэ... Асьме азьмынӥсь [изобретениосмы], улэп молекулярной механизмъёслэн быгатыса ужаменызы но шуг лэсьтэменызы ӵошатыса, бездыт адӟисько. Асьмеос валаськомы, ми троссэ лэсьтыны ум быгатӥське шуыса».
12. Мар вераз одӥгез тодосчи клеткалэн кылдэмез сярысь?
12 Дентон озьы ик вераз, тодмо клеткаос пӧлысь тужгес но огшорыезлэн шуг луэмез возьматэ, со шӧдтэк шорысь, ас понназ ӧз кылды шуыса. Солы малпась но кылдытӥсь кулэ вал.
Паймымон йырвиыммы
13, 14. Малы йырвиым улэп клеткалэсь трослы паймымонгес луэ?
13 Собере со тодосчи ик вера: «Млекопитающейлэн йырвиымез, нимаз басьтэм клеткаен ӵошатыса, трослы шуггес. Адямилэн йырвиымаз дас миллиард пала нейронъёс. Котькуд нейронысь дас сюрсысен сю сюрсозь герӟась сӥньысъёс пото, кудъёсыныз со йырвиымысь мукет нейронъёсын герӟаське. Огъя вераса, адямилэн йырвиымаз вань герӟетъёслэн лыдзы сюрс триллион пала луэ».
14 Дентон верамъя, йырвиымысь герӟетъёслэсь одӥг сюэтӥ люкетсэ басьтысалмы ке, отын, Музъем вылысь быдэс коммуникационной системаын сярысь, герӟетсы тросгес луысал на. Озьы ик со юа: «Быгатысал-а кыӵе ке малпамтэ шорысь луэм учыр сыӵе системаосты люканы?» Валамон, ӧз быгатысал. Йырвиымлэн сюлмаськись Малпасез но Кылдытӥсез луыны кулэ вал.
15. Мар верало йырвиым сярысь мукет тодосчиос?
15 Адямилэн йырвиыменыз ӵошатыса, азьмынӥсь компьютеръёс но огшорыесь адӟисько. Мортон Хант, научной гожъясь, вераз: «Асьмелэн йырамы, туала бадӟым эскерись компьютерен ӵошатыса, кӧня ке пол миллиардлы тросгес ивор возиське». Соин ик нейрохирург д-р Роберт Дж. Уайт йылпумъяса вераз: «Мон уг быгатӥськы вераны, Вылӥ Визьнод ӧвӧл шуыса, кудӥз кыӵе ке но муген йырвиымез но йырвизьмез кылдытӥз но паймымон амалэн соосты герӟаз — мар адямилы валантэм луэ... Мыным осконо луэ, ваньмыз та визьмо кылдытэмын, но вань Кин ке, кин со ужрадэз вырӟытӥз». Со сяна, со Кин ке туж сюлмаськись луыны кулэ.
Тунсыко вирберган
16–18. а) Маин вирберган тунсыко луэ? б) Кыӵе малпанэ вуттэ вирберганлэн тунсыко луэмез?
16 Эскеромы озьы ик паймымон вирберганэз, кудӥз питательной веществоосты но кислородэз нуллэ но палась висёнъёслэсь уте. Вирберганлэсь бадӟым люкетсэ кылдытӥсь горд вир клеткаос сярысь одӥг книгаын верамын: «Одӥг вир шапыкын 250 миллионлэсь тросгес нимаз басьтэм вир клеткаос... Мугорын соос 25 триллион пала, дыр,— сомында, кӧня кулэ луысал ньыль теннисэн шудон площадкаез шобыртон понна... Воштӥськонъёс ортчо: секундлы быдэ — 3 миллион выль клеткаос» (ABC’s of the Human Body).
17 Тунсыко вирберганлэн мукет люкетэз — тӧдьы вир клеткаос сярысь — со книгаын ик вераське: «Горд вир клеткаос одӥг пумо гинэ, нош тӧдьы вир клеткаос трос пӧртэмесь луо, но котькудӥз соос пӧлысь мугорлы пӧртэм амалэн нюръяськыны юрттэ. Кылсярысь, одӥгъёсыз кулэм клеткаосты быдто. Мукетъёсыз вируслы пумит антителоос кылдыто, тодмотэм веществоослэсь кышкытлыксэс быдто яке сиё со бактериосты».
18 Кыӵе паймымон но усто радъямын вирберганмы! Веранэз ӧвӧл, солэн, мар сыӵе умой огинэ люкамын но асьмемыз котыр ласянь уте, луыны кулэ визьмо но сюлмаськись радъясез — Инмар.
Мукет паймымон ужъёс
19. Мае возьматэ синмез адямиен лэсьтэм аппаратъёсын ӵошатон?
19 Адямилэн мугораз трос паймымонэз вань на. Одӥгез соос пӧлысь — син, кудӥз сокем усто малпамын, одӥг камера но соин уз ӵошатӥськы. Инсьӧртодосчи Роберт Ястров вераз: «Син малпамын вал, шӧдске; одӥг телескопез малпась но ӧз быгатысал сое умойгес лэсьтыны». Одӥг изданиын вераське: «Адямилэн синъёсыз, фильмен ӵошатыса, пыр-почгес адӟыны быгато. Соос адӟо куинь измерениын, быдэсак озьы, кызьы вань, вис карытэк... Камераез адями синмен ӵошатыны шонертэм луоз. Адямилэн синмыз — со кылдытэм визьнодэн азьмынӥсь суперкомпьютер, кудӥз быгатэ иворез туж ӝог басьтыны, валаны но сётыны сое, но солэн ужан амалъёсыз адямиен лэсьтэм аппаратлэсь, компьютерлэсь яке камералэсь, трослы умойгес» (Popular Photography).
20. Маин озьы ик паймымон луэ адями мугор?
20 Озьы ик малпаськы, кызьы вань мугор люкетъёсмы, асьмеос косытэк но, куспазы ужало. Кылсярысь, асьмеос трос пӧртэм сиён сииськомы но юиськомы, нош мугормы сое кужымлы пӧрмытэ. Со пӧртэм сиён-юонэз машина баке поныса утча ай, кыдёке-а со кошкоз? Мукетыз паймымон уж — анай-атаезлы кельшись муспотон пиналлэн вордӥськемез — укмыс толэзь куспын гинэ! Нош мар вераны луоз кӧня ке аресъем нылпилэн шуг вераськон кыллы дышемез сярысь?
21. Мар верало визьмо адямиос, мугорлэсь паймымон луэмзэ адӟыса?
21 Адямилэн тунсыко но шуг лэсьтэм люкетъёсыз туж паймыто асьмемыз. Нокыӵе инженер но уз быгаты соосты озьы ик лэсьтыны. Кылдӥзы-а соос ас понназы? Валамон, ӧз. Адями мугорлэсь паймымон палъёссэ учкыса, визьмо адямиос озьы ик верало, кызьы вераз одӥгез псаломъёсты гожъясь: «Тонэ данъясько, малы ке шуоно, мон паймымон кылдытэмын. Тынад ужъёсыд паймымон» (Псалом 138:14).
Вылӥ Пуктӥсь-Лэсьтӥсь
22, 23. а) Малы лыдэ басьтыны кулэ, Кылдытӥсь вань шуыса? б) Мар Библиын шонер верамын Инмар сярысь?
22 Библия вера: «Котькуд коркаез кин ке но пуктэ; нош ваньзэ пуктӥсь-лэсьтӥсь луэ — Инмар» (Еврейёслы 3:4). Котькуд огшоры коркалэн но пуктӥсез вань бере, шуг лэсьтэм быдэс дуннелэн, кудаз трос пӧртэм улӥсьёсыз, озьы ик пуктӥсь-лэсьтӥсез луыны кулэ. Самолётъёс, телевизоръёс но компьютеръёс выллем аппаратъёсты лэсьтӥсь адямиосты лыдэ басьтӥськомы бере, соку кулэ ӧвӧл-а лыдэ басьтыны Сое, кин адямилы сыӵе аппаратъёсты лэсьтыны йырвизь сётӥз?
23 Библия сое лыдэ басьтыса вера: «Со инлэн но, музъемлэн но Кузё-Инмарзы луэ... Ачиз ваньмызлы сётэ: улон но, шокан но,— ваньзэ, мар кулэ» (Апостолъёслэн ужъёссы 17:24, 25). Отын шонер верамын: «Тон, Кузё-Инмаре, данлыкез, сӥ-данэз, кужымез басьтыны ярась, уго Тон ваньзэ кылдытӥд, ваньмыз Тынад эрикедъя улэ-вылэ, кылдытэмын» (Усьтӥськон 4:11).
24. Кызьы тодыны быгатӥськомы, Инмар вань шуыса?
24 Ваньмыз, мар кылдытэмын, Инмар вань шуыса, возьматэ. «Солэсь ужъёссэ чакласа-эскерыса адӟыны луэ синмын адӟыны луонтэм макеоссэ — Солэсь пумтэм вапумъёс улӥсь кужымзэ но Инмар луонзэ» (Римын улӥсьёслы 1:20).
25, 26. Малы мае ке умойтэм амалэн кутон уг возьматы, солэн кылдытӥсез ӧй вал шуыса?
25 Мае ке умойтэм амалэн куто ке, со уг возьматы, солэн кылдытӥсез ӧй вал шуыса. Самолётэз кызьы тупаса улонын, озьы ик ожъёсын кутыны луэ. Сое виылон-быдтон понна кутэмзы уг вера, сое нокин но ӧз лэсьты шуыса.
26 Озьы ик адямиос уродэсь ке, со уг возьматы, соосты нокин ӧз кылдыты, но Инмар ӧвӧл шуыса. Соин ик Библия шонер пусъе: «Паймымон визь ыштон ук та! Горшок лэсьтӥсез горд сюен ӵошатыны луэ шат? Арбери ассэ лэсьтӥсь сярысь тазьы шуоз шат: «Монэ со ӧз лэсьты»? Суред аслаз суредасез сярысь шуоз-а: «Со уг вала»? (Исаия 29:16).
27. Малы асьмеос оскыны быгатӥськомы, Инмар курадӟонъёс сярысь юанъёслы валэктонъёс сётоз шуыса?
27 Кылдытӥсьлэсь визьмо луэмзэ солэн паймымон шуг лэсьтэм ужъёсысьтыз адӟыны быгатӥськомы. Со возьматӥз, со асьме сярысь, зэм ик, сюлмаське шуыса. Кылсярысь, музъемез улыны тупамон кылдытӥз, мугормес но йырвизьмес паймымон кылдытӥз, озьы ик кылдытӥз ваньзэ сое, мар асьмелы шумпотон вае. Соку веранэз ӧвӧл, со аслэсьтыз визьмо но сюлмаськись луэмзэ возьматоз, таӵе юанъёслы валэктонъёс сётыса: малы Инмар курадӟонъёсты али но ӧз быдты? Мар со карыны малпа та пумысен?
[Суред, 5-тӥ бам]
Музъем аслаз утись атмосфераеныз — со паймымон улон инты, кудӥз, асьме сярысь сюлмаськыса, Инмарен кылдытэмын вал
[Суред, 6-тӥ бам]
Музъем адямиосты яратыса кылдытэмын вал, асьмеос шумпотыса мед уломы шуыса
[Суред, 7-тӥ бам]
«Музъем вылысь быдэс коммуникационной системаен ӵошатыса, одӥг йырвиымын герӟетъёсыз тросгес» (молекулярной биология удысысь тодосчи)
[Суред, 8-тӥ бам]
«Син малпамын вал, шӧдске; одӥг телескопез малпась но ӧз быгатысал сое умойгес лэсьтыны» (инсьӧртодосчи)