9-тӥ люкет
Кытысь ми тодӥськомы, «берпуметӥ» нуналъёсы улӥськомы шуыса
1, 2. Кытысь ми тодыны быгатӥськомы, берпуметӥ нуналъёсы улӥськомы шуыса?
МАЛЫ ми оскыны быгатӥськомы, асьмеос улӥськомы со дыре, куке Инмар Эксэйлык адями кивалтэтъёслы пумит ужрад кутоз? Кытысь ми тодыны быгатӥськомы, со дыр, куке Инмар вань уродэзлы но курадӟонъёслы пум поноз, туж матын ини шуыса?
2 Со сярысь Иисус Христослэн дышетскисьёсызлэн но тодэмзы потэ вал. Соос юазы солэсь, кыӵе луоз солэн Эксэйлык кивалтӥсь луыса лыктэмезлэн но «дунне быронлэн» «тодметэз» (Матфей 24:3). Та юанлы валэктон сётыса, Иисус пыр-поч вераз ужъёс сярысь, кудъёсыз быдэс дуннеез зуркатозы но кылдэм югдуръёсын валче возьматозы, адямиос та дуннелэн «берпуметӥ» нуналъёсаз улыны кутскизы шуыса (2 Тимофейлы 3:1). Адӟиськомы-а ми асьме вакытэ со тодметлэн люкетъёсызлэсь огъя быдэсмемзэс? Зэм, адӟиськомы.
Быдэс дунне вылысь ожъёс
3, 4. Кызьы кылем даурысь ожъёс возьмато, Иисуслэн азьло верамез быдэсме шуыса?
3 Иисус азьло ик вераз, «калык калыклы, эксэйлык эксэйлыклы ваче пумит султозы» шуыса (Матфей 24:7). 1914-тӥ арын быдэс дунне оже кыскемын вал, кудӥз азьло луэм ожъёслэсь вань калыкъёслэн но кивалтэтъёслэн оже пыриськеменызы висъяськиз. Та пӧртэмлыкез лыдэ басьтыса, история удысысь тодосчиос одӥг дыре та ожез «Быдӟым ожен» нимазы. Со вал нырысетӥез сыӵе ож калыклэн улоназ, Нырысетӥ мировой ож. Ог 20 000 000 ожгарчиос но огшоры адямиос быризы. Со лыд, мукет азьло ортчем ожъёсын быремъёслэн лыдэнызы ӵошатыса, трослы йылӥз.
4 Нырысетӥ мировой ож возьматӥз берпуметӥ нуналъёслэсь кутскемзэс. Иисус вераз, та но мукет югдуръёс «висёнъёслэн кутсконзы» луозы шуыса (Матфей 24:8). Зэмзэ но, со озьы ик вал, малы ке шуоно Кыкетӥ мировой ож эшшо но кышкытгес вал — ог 50 000 000 ожгарчиос но огшоры адямиос быризы. Огъя вераса, XX дауре ожъёсын ог 100 000 000 пала адямиос быдтэмын вал. Со ньыль поллы тросгес, азьвыл 400 ар куспын вань быремъёслэн лыдзы сярысь! Макем бадӟым янгышсы адями кивалтэтъёслэн!
Мукет тодметъёс
5–7. Мар эшшо возьматэ на, асьмеос берпуметӥ нуналъёсы улӥськомы шуыса?
5 Иисус мукет тодметъёс сярысь но вераз, кудъёсыз берпум нуналъёсы луозы: «Интыен-интыен кужмоесь музъем зурканъёс, сютэм аръёс, урод черъёс [паськыт вӧлмем висёнъёс]» (Лука 21:11). Со быдэсак тупа 1914-тӥ арысен кылдэм югдурлы, малы ке шуоно со шимес учыръёс курадӟонъёсты трослы будэтӥзы.
6 Туж ӵем бадӟым музъем зурканъёс луыло, кудъёсаз трос адямиос бырыны шедё. Одӥг испанка грипп гинэ, кудӥз Нырысетӥ мировой ож бере вӧлмиз, ог 20 000 000 пала адямиосты быдтӥз, нош куд-ог лыдъямъя — 30 000 000 адями пала яке солэсь но тросгес. Трос сюрс улонъёсты СПИД быдтэ но матысь вуоно дыре трос миллион адямиосты быдтыны быгатоз на. Котькуд аре трос миллион адямиос сюлэм висёнъёсын, ракен но мукет висёнъёсын висьыса куло. Мукет трос миллион адямиос, сютэм улыса, пумен куло. Веранэз ӧвӧл, 1914-тӥ арысен кутскыса, Усьтӥськон книгаын верам «вал вылын» пукисьёс, ожъёсты, сиён-юон тырмымтэез но паськыт вӧлмем висёнъёсты сьӧразы вайыса, туж трос адямиосты быдто (Усьтӥськон 6:3—8).
7 Со сяна, Иисус азьло ик вераз, йыружъёслэн лыдзы будоз шуыса, мае али быдэс дунне вылысь адӟыны луэ. Со вераз: «Законлы пумит улэмен сэрен, тросэзлэн яратонэз сӥялоз» (Матфей 24:12).
8. Кызьы Тимофейлы ыстэм кыкетӥ гожтэтын куинетӥ люкетысь азьпалзэ тодытыса верам асьме нуналъёслы тупа?
8 Собере, азьпалзэ тодытыса, нравственной нормаослэн усемзы сярысь Библиын верамын, мае али быдэс дунне вылысь адӟыны луэ: «Тод, берпум аръёсы секыт дыръёс вуозы шуыса. Соку адямиос асьсэды асьсэос но коньдонэз гинэ яратӥсесь луозы; ушъяськисесь, мукетъёссэ ултӥясесь, урод кылын вераськисесь, анай-атайлы тэрытскисьтэмесь, тау карисьтэмесь, сьӧлыклэсь кышкасьтэмесь, гажан-жалянэз тодӥсьтэмесь; йыркурзэс вунэтӥсьтэмесь, кыл нуллӥсесь, чидасьтэмесь, уродэсь-лекесь, ӟечез-уродэз валасьтэмесь луозы; огзэс огзы вузалозы; возьытэз уз тодэ, вылтӥяськисесь луозы; Инмарез яратон сярысь, золгес каньылэн, эзылыса улонэз яратозы. Вылтуссыя Инмарлы оскись кадесь луозы, нош ужъёсынызы Инмарлы осконлэсь куштӥськозы... Нош кескич адямиос, пӧяськисьёс эшшо но тросгес урод ужъёс лэсьтыны кутскозы» (2 Тимофейлы 3:1—13). Ваньмыз со асьмелэн син азямы быдэсме.
Эшшо одӥг муг
9. Кыӵе инмын луэм учыр тупаз музъем вылын берпуметӥ нуналъёслэн кутсконэнызы?
9 Эшшо одӥг муг вань на, кудӥз кылем дауре трос курадӟонъёс ваиз. Луиз одӥг учыр, кудӥз 1914-тӥ арын берпуметӥ нуналъёслэн кутсконэнызы тупаз но адямиосты эшшо но бадӟым кышкытлыке вуттӥз. Со дыре, кызьы Библиысь берпуметӥ книгаын азьпалзэ тодытыса верамын: «Инмын ожмаськон потӥз: Михаил [Инмын кивалтӥсь Христос] аслаз кылчинъёсыныз лобась кыйлы [Шайтанлы] пумит ожмаськизы, нош лобась кый аслаз кылчинъёсыныз [убиръёсыныз] соослы пумит ожмаськизы, но пумитъяськыны кужымзы ӧз ни тырмы, Инмын соослы инты ӧз ни кыльы. Со куспын сэрпалтэмын вал туж бадӟым лобась кый, вашкала кый, кудзэ дьявол, шайтан шуыса нимало вал. Быдэс дуннелэсь визьзэ тугасез музъем вылэ сэрпалтӥзы, солэсь кылчинъёссэ но асэныз огазе куштӥзы» (Усьтӥськон 12:7—9).
10, 11. Мар ваиз адямиослы Шайтанэз но убиръёсты музъем вылэ сэрпалтон?
10 Мар ваиз та луэм учыр адямиослы? Азьпалзэ тодытыса веран азьланьтэ: «Нош музъем вылын, зарезьын улӥсьёслы куректон-кайгу: тӥ доры туж бадӟым йыркурен дьявол васькиз,— со тодэ, уго солы ӧжыт дыр кылемын ни шуыса». Зэм но, Шайтан тодэ, солэн кивалтэтэзлы пум вуэ ни шуыса. Соин, сое ассэ но солэсь кивалтэтсэ быдтон азьын, со адямиосты Инмарлэсь палэнтыны туж тырше (Усьтӥськон 12:12; 20:1—3). Макем урод луизы со духовной кылдытэмъёс, асьсэлэсь эрико луэмзэс шонертэм амалэн кутэменызы! Кыӵе кышкыт югдур кылдӥз музъем вылын соос понна, тужгес но 1914-тӥ арысен!
11 Паймонэз ӧвӧл, Иисус асьме дыр сярысь тазьы вераз: «Музъем вылын — калыкъёс мылкыдзы куашкаса, абдраса улозы... Адямиос кышкаса, дунне вылэ шугадӟонъёслэсь вуэмзэс возьмаса чоньдылозы» (Лука 21:25, 26).
Адямиослэн но убиръёслэн кивалтонзылы пум вуэ
12. Кыӵе берпуметӥ азьпалзэ тодытыса веранлы быдэсмоно на та системалэн пумыз вуон азьын?
12 Инмарлэн та урод системаез быдтэмезлэсь азьло, кӧня азьпалзэ тодытыса веран быдэсмытэк кылемын на? Туж ӧжыт! Берпуметӥез соос пӧлысь гожтэмын 1 Фессалоника карын улӥсьёслы 5:3, кытын вераське: «Куке вераны кутскозы: «тупаса улон, кышкатэк улон», соку шӧдтэк шорысь... соос доры бырон вуоз». Со возьматэ, та системалэн пумыз кутскоз соку, «куке вераны кутскозы». Та дунне понна урод системаез быдтон шӧдтэк шорысь кутскоз, куке сое уз ик возьмалэ, куке адямиос кивалтӥсьёслэсь тупаса но кышкатэк улон ваемзэс возьмалозы.
13, 14. Кыӵе куректон дыр сярысь азьвыл ик вераз Иисус, но маин со йылпумъяськоз?
13 Та дуннелы, кудӥныз Шайтан кивалтэ, висъям дыр быре ини. Ӝоген солы пум вуоз куректон дыръя, кудӥз сярысь Иисус вераз: «Соку уго бадӟым куректон вуоз, кыӵеез дуннелэн кутсконысеныз туннэ нуналозь ӧй вал на, уз но луы» (Матфей 24:21).
14 «Бадӟым куректонлэн» пумаз луоз Инмарлэн ожез, Армагеддон. Кызьы Даниил пророк вераз, со луоз сыӵе дыр, куке Инмар «вань эксэйлыкъёсты куашкатоз». Со возьматоз, вань туннэ адями кивалтэтъёслы, кудъёсыз Инмарлэсь эриксэ лыдэ уг басьто, пум вуиз шуыса. Солэн инмысь эксэйлыкез адямиослэсь вань ужъёссэс чакласа-эскерыса улоз. Данииллэн азьпалыз сярысь верам кылъёсызъя, ноку но кивалтон уж «мукет калыклы» сётэмын уз луы (Даниил 2:44, НМ; Усьтӥськон 16:14—16).
15. Мар луоз Шайтанэн но солэн убиръёсыныз?
15 Со дыре Шайтан но убиръёс номыр но лэсьтыны уз быгытэ ни. Пумит султэм духовной кылдытэмъёс палэнтэмын луозы, «калыкъёслэсь визьзэс» сураны медаз быгатэ ни шуыса (Усьтӥськон 12:9; 20:1—3). Соосты кулон возьма, соос быдтэмын луозы. Кыӵе каньыл луоз адямиослы, куке убиръёс соослэсь урод ужъёс лэсьтыны мылкыдзэс уз ӝутэ ни!
Кин улэп кылёз? Кин уз?
16–18. Кин та система бырыку улэп кылёз, нош кин уз?
16 Кин улэп кылёз, куке Инмарлэн та дуннелы пумит судэз быдэсмыны кутскоз? Нош кин уз? Библия возьматэ, Инмарлэсь кивалтэтсэ возьмасьёс утемын луозы но улэп кылёзы шуыса. Соос, кинъёс Инмарлэсь кивалтэтсэ уг возьмало, утемын уз луэ, но Шайтанлэн дуннееныз валче быдтэмын луозы.
17 Притчи книгаын 2:21, 22 (НМ) верамын: «Шонерлыко улӥсьёс [Инмар кивалтэтлэсь кылзӥськисьёс] музъем вылын улозы, но дун-чылкыт адямиос отчы кельтэмын луозы. Нош шонертэм улӥсьёс [Инмар кивалтэтлэсь кылзӥськисьтэмъёс] музъем вылысь быдтэмын луозы, но Инмарлэсь палэнскисьёс выжыенызы ик быдтэмын луозы».
18 Псаломын 36:10, 11 озьы ик вераське: «Кема ик ӧвӧл ни, законлы пумит улӥсь уз ни кыльы... Нош востэмлыкоос музъем басьтозы но трос каньыллыкен куанозы». 29-тӥ кылбурет будэтэ на: «Шонерлыко адямиос музъем басьтозы но пумтэм дауръёс ӵоже со вылын улозы».
19. Кыӵе кенешез асьмелы сюлмамы пыртоно?
19 Асьмелы сюлмамы пыртоно Псаломысь 36:34 кенешез, кытын вераське: «Господьлы оскиськы, Солэн сюресаз возиськы но, Со тонэ ӝутоз, тон музъем мед басьтод шуыса; нош куке законлы пумит улӥсьёс быдтылэмын луозы, тон адӟод». 37-тӥ но 38-тӥ кылбуретъёсын верамын: «Дун-шектэм адямиез чакласа ул но шонерлыко адями шоры учкы, уго таӵе адямилэн азьпал улонэз — каньыллык; нош законлы пумит улӥсьёс ваньмыз быдтэмын луозы; законлы пумит улӥсьёслэн азьпал улонзы ышоз-быроз».
20. Малы вераны быгатӥськомы, асьмеос тунсыко вакытэ улӥськомы шуыса?
20 Кыӵе буйгатэ но мылкыдэз ӝутэ, Инмар, зэм ик, сюлмаське но ӝоген вань уродэзлы но курадӟонъёслы пум поноз шуыса тодон! Макем шумпотоно, куке валаськомы, туж умой азьпал улон сыӵе матын ини шуыса!
[Суред, 20-тӥ бам]
Библия азьпалзэ ивортыса вераз со сярысь, мар берпум нуналъёслэн «тодметсы» пӧлы пырыны кулэ вал
[Суред, 22-тӥ бам]
Ӝоген Армагеддонын Инмар кивалтэтлэсь кылзӥськисьтэм адямиос быдтэмын луозы. Соос, кин, зэмзэ ик, солэсь кылзӥське, улэп кылёзы но шонерлыко выль дуннеын улозы