Инмар Авраамен тупанкыл кутэ

БЫДӞЫМ ву тудӟон дырысен 350 ар пала ортчиз. Азинскись Ур карын, кудӥз туала Ираклэн музъем вылаз интыяськемын вал, Авраам патриарх улӥз. Со туж юн осконэн адями вал. Нош одӥг пол солэн осконэз визь сынаськон улэ сюриз.

Иегова Авраамез, вордӥськем интызэ кельтыса, тодмотэм музъеме, Ханаанэ, мыныны косӥз. Авраам соку ик кылзӥськиз. Со, Сарра кышнозэ, агаезлэсь Лот пизэ но киулаз улӥсь вань калыксэ басьтыса, кузь сюрес вылэ потӥз. Ханаанэ вуыса, соос шатёръёсын улыны кутскизы. Иегова Авраамен тупанкыл кутӥз. Со кылзэ сётӥз, Авраам бордысь быдӟым калык поттоз, со пыр дунне вылысь вань калык выжыос бакель каремын луозы но солэн выжыез Ханаанэз киултоз шуыса.

Авраам но Лот узырмизы: соослэн пудозы туж трос луиз. Авраам ӟеч мылкыдын луонлык сётӥз нырысь Лотлы бырйыны музъемез, кытын солэн улэмез потэ вал. Соку Лот Содом пала Иордан котырысь удалтӥсь музъеме улыны интыяськиз. Нош со карын улӥсьёс азыса-калгыса улӥзы но Инмар азьын туж секыт сьӧлыкъёс лэсьтылӥзы.

Берлогес Инмар Авраамез оскытӥз, солэн выжыезлэн лыдыз инмысь кизилиос мында луоз шуыса. Авраам Иеговалы оскиз. Но Сарралэн, солэн яратоно кышноезлэн, нокызьы но секытэн луэмез уг луы вал. Куке Авраамлы 99 арес вал, нош Сарралы — 90 пала, Инмар вераз, соослэн пизы вордӥськоз шуыса. Инмарлэн кылыз быдэсмиз но, Сарралэн Исаак пиез вордӥськиз. Авраамлэн мукетъёсыз но нылпиосыз вал ке но, Едемын сӥзем Мозмытӥсь Исаак выжыысь потыны кулэ вал.

Со дыре Лот семьяеныз Содомын улӥз. Но та шонер улӥсь адями со карысь азӥсь-калгись адямиос кадь ӧз луы. Содомлы ялэм приговорзэ быдэстон азяз Иегова кылчинъёсты ыстӥз матэктӥсь быдтон сярысь Лотлы ивортыны. Кылчинъёс Лотэз но семьязэ дыртытыны кутскизы, карысь берзэс учкытэк пегӟыны косыса. Собере Инмар Содом но солы матысь Гоморра кар вылэ зорез кадь ӵуждариен тыл кисьтӥз. Со каръёсысь сьӧлыклэсь кышкасьтэмъёс ваньзы быризы. Лот кык нылъёсыныз утиськиз, нош солэн кышноез берзэ учкиз, кельтэм ваньбурзэ жаляса, вылды. Кылзӥськымтэеныз со кулӥз.

Пыкиськемын: Улон-вылон 11:10—19:38.