Кызьы Инмарлы матэ кариськоно?

1. Кылзэ-а Инмар вань вӧсяськонъёсты?

Инмарлэн потэ, адямиос вӧсяськон пыр солы матэ мед кариськозы шуыса (Псалтирь 64:3). Но со вань вӧсяськонъёсты уг кылзы. Кылсярысь, пиосмурт кышнозэ вӧсь каре ке, Иегова солэсь вӧсяськонъёссэ кылзэмысь дугдыны быгатэ (1 Пётр 3:7). Инмар израиль калыклэсь вӧсяськемзэ ӧз кылзы, куке соос ӧз кылзӥське но азьвыл сямен ик урод ужъёс лэсьтыса улӥзы. Но Инмар дась кылзыны соосты, кинъёс лэсьтэм сьӧлыкъёссы понна ӧпкелё. Тодамы возьыны кулэ: Инмарлы вӧсяськыны луонлык — со бадӟым дан. (Лыдӟе Исаиялэсь 1:15; 55:7.)

Учке «Кылзэ-а Инмар вань вӧсяськонъёсты?» видеороликез.

2. Кызьы вӧсяськоно?

Вӧсяськыны кулэ Иеговалы гинэ, малы ке шуоно со милям Кылдытӥсьмы но одӥг гинэ зэмос Инмармы (Матфей 4:10; 6:9). Нош ми ваньмы сьӧлыкоесь вордскиськомы бере, вӧсяськыны кулэ Иисус Христос пыр, кудӥз милям сьӧлыкъёсмы понна кулӥз (Иоанн 14:6). Иеговалэн уг поты, ми дышетэм вӧсяськонъёсты мед вераломы яке вӧсяськон книгаосысь соосты мед лыдӟомы шуыса. Солэн потэ, вӧсяськыкумы ми асьмелэсь малпанъёсмес но шӧдонъёсмес мед вераломы шуыса. (Лыдӟе Матфейлэсь 6:7; Филиппыослы 4:6, 7.)

Кылдытӥсьмы кылэ асьмеды соку но, куке ми ас поннамы вӧсяськиськомы (1 Эксэйлыкъёслэн 1:12, 13). Со ӧте милемыз котькыӵе дыре солы вӧсяськыны. Умой луысал вӧсяськыны ӵукна но, ӝыт но, озьы ик сиськон азьын но шуг-секытъёс кылдыку. (Лыдӟе Псалтирез 54:23; Матфейлэсь 15:36.)

3. Малы христианъёслы огазе люкаськылыны кулэ?

Инмарлы матэ кариськыны капчи ӧвӧл, малы ке шуоно ми улӥськомы адямиос пӧлын, кудъёсыз Инмарлы уг оско но музъемез райлы пӧрмытыны сётэм кылзэ серем гинэ каро (2 Пётр 3:3, 13; 2 Тимофейлы 3:1, 4). Соин милемлы туж кулэ огъя оскисьёсынымы кусып возьыны но ог-огмес юнматыны. (Лыдӟе Еврейёслы 10:24, 25.)

Ми кусып возимы ке Инмарез яратӥсь адямиосын, со юрттоз милемлы Инмарлы матэ кариськыны. Иеговалэн Адӟись-Ивортӥсьёсызлэн пумиськонъёссы умой луонлык сёто аслэсьтыд оскондэ юнматыны. (Лыдӟе Римъёслы 1:11, 12.)

4. Кызьы Инмарлы матэ кариськоно?

Тӥ Иеговалы матэ кариськоды, Библиысь тодэмды сярысь малпаськиды ке. Соин ик малпаське Иеговалэн ужъёсыз, законъёсыз но кылсётонъёсыз сярысь. Со юрттоз тӥледлы адӟыны, макем юн Инмарлэн яратонэз но макем со визьмо. (Лыдӟе Иисус Навинлэсь 1:8; Псалтирез 1:1—3.)

Инмарлы оскыса гинэ, тӥ солы матэ кариськыны быгатоды. Осконэз тылскемен ӵошатыны луоз. Тылскем медаз кысы шуыса, отчы ялан пу тыроно. Озьы ик осконмы но медаз лябӟы шуыса, отчы «пу тыроно»: вӧсяськоно но малпаськоно, малы тӥ оскиськоды, Библиысь соиз яке таиз дышетон зэм луэ шуыса. (Лыдӟе Матфейлэсь 4:4; Еврейёслы 11:1, 6.)

5. Кыӵе пайда ваёз, ми Инмарлы матэ кариськимы ке?

Иегова сюлмаське соос сярысь, кинъёс сое ярато. Со уте милемыз ваньмызлэсь, мар быгатэ Инмарлы осконмес быдтыны но пырак дауръёс ӵоже улыны осконтэк кельтыны (Псалтирь 90:1, 2, 7—10). Инмар милемыз чакласькыны косэ улонлэсь, кудӥз тазалыкмес уродмытэ но шудтэм каре. Иегова юрттэ милемлы тужгес но умой сюрестӥ мыныны. (Лыдӟе Псалтирез 72:27, 28; Иаковлэсь 4:4, 8.)