Самуил ассэ котьку шонер возиз

Пичи дырысеныз ик Самуи́л улӥз но ужаз-тыршиз скинияын. Адямиос отчы ветло вал Иеговалы йыбыртъяны. Тодӥськод-а, кызьы Самуил отчы сюриз? Нырысь ик ойдо тодматскомы солэн анаеныз — А́ннаен.

Кема дыр ӵоже Анналэн, туж потэ вал ке но, нылпи ваемез уг луы вал. Соин ик со Иеговалы вӧсяське вал но куре вал, солэн нылпиез мед вордӥськоз шуыса. Со кыл сётӥз, солэн пиез вордӥськиз ке, со сое скинияын ужаны-тыршыны сётоз шуыса. Иегова Анналэсь вӧсяськемзэ кылӥз, но солэн пиез вордӥськиз. Со солы Самуил ним понӥз. Солы куинь-ньыль арес тырмемез бере, Анна, кызьы вераз вал, сётӥз сое скинияын Инмарлы ужаны-тыршыны.

Со дыре И́лий скинияын священник вал. Отын ик соин ӵош солэн кык пиосыз но ужазы-тыршизы. Скиния Инмарлэн коркаез вал, но ваньмызлы, кинъёс отын ужазы-тыршизы, асьсэды умой возёно вал. Нош Илийлэн пиосыз асьсэды туж урод возизы. Самуил ваньзэ сое адӟиз. Самуил но, Илийлэн пиосыз сямен ик, ассэ урод возиз-а?~ Ӧз. Со котьку но ассэ умой возе вал — озьы сое анаез но атаез дышетӥзы.

Мар кароно вал Илийлы пиоссэ? Кызьы тон малпаськод?~ Солы соосыз кыл кутытыны кулэ вал но уг яра ни вал лэзьыны Инмарлэн коркаяз ужаны-тыршыны. Но Илий озьы ӧз лэсьты. Соин ик Иеговалэн солы но солэн пиосызлы вожез потӥз. Со соосыз кыл кутытыны малпаз.

Одӥг уе, куке Самуил изе вал, со кылӥз, сое кин ке но ӧте шуыса: «Самуил!» Со Илий доры бызьыса мынӥз, но Илий солы шуиз: «Мон тонэ ӧй ӧтьы». Озьы со Илий доры эшшо кык пол бызьылӥз на. Соку Илий Самуиллы вераз, со нош ик куара кылӥз ке, мед вазёз: «Вера, Иегова, мон тонэ кылзӥсько». Самуил озьы ик лэсьтӥз. Иегова Самуилэз косӥз: «Вера Илийлы, мон солэсь семьязэ лек ужъёсыз понна кыл кутыто». Кызьы тон малпаськод, Самуиллы та курон-косонэз быдэстыны капчи-а вал?~ Зэм ик, капчи ӧй вал. Самуил кышка вал ке но, со лэсьтӥз ваньзэ, мар солы Иегова вераз. Ма́лпа гинэ, Иеговалэн вань кылъёсыз быдэсмизы! Илий но, солэн кык пиосыз но кулӥзы.

Самуил ми понна адӟем карымон луэ. Со ассэ умой возиз, мукет адямиос асьсэды урод возизы ке но. Нош тон? Тыршод-а тон, Самуил сямен ик, астэ котьку но шонер возьыны? Тыршид ке, тон Иеговаез но, аслэсьтыд анайдэ но атайдэ шумпоттод.