Давид кышкасьтэм вал

Мар тон кариськод, куке тыныд кышкыт луэ?~ Тон атаед яке анаед доры бызьыса мынӥськод, дыр. Нош вань на эшшо кин ке, кин озьы ик тыныд юрттыны быгатоз. Но со дунне вылын ваньмызлэсь кужмо. Тодӥськод-а, кин со?~ Со Иегова Инмар. Нош табере ойдо вераськомы Дави́д нимо егит пи сярысь. Со сярысь Библиын верамын. Давид тодэ вал, Иегова солы котьку юрттоз шуыса, соин ик со кышкасьтэм вал.

Давидлэн анай-атаез пичи дырысеныз ик дышетӥзы сое Иеговаез яратыны. Со юрттэ вал солы кышкытлык кылдыку кышканзэ вормыны. Со тодэ вал, Иегова солэн Эшез луэ но со котьку солы юрттыны дась шуыса. Одӥг пол, Давид ыж возьмаку, шӧдтэк шорысь лев потӥз но одӥг ыжез кутӥз! Тодӥськод-а, мар кариз Давид? Со, ожтӥрлыктэк вал ке но, лев вылэ урдскиз но вииз сое! Мукет дыръя ыжъёс вылэ гондыр урдскиз. Давид сое но вормиз. Кызьы тон малпаськод, кин Давидлы юрттэ вал?~ Зэм, Иегова.

Одӥг пол Давид тужгес но кышкасьтэм луэмзэ возьматӥз. Израиль калык артысь калыкен ожмаське вал — Филисти́м калыкен. Одӥгез филистим ожгарчи туж ӝужыт вал — зэмос батыр! Солэн нимыз Голиа́ф. Со израиль ожгарчиосыз но Иеговаез мыскылля вал. Голиаф израиль пиосты ожмаськыны ӧтиз, но солэсь ваньмыз кышкало вал. Куке Давид кылӥз со сярысь, со шуиз Голиафлы: «Мон ожмасько тонэн! Иегова юрттоз мыным тонэ вормыны!» Кызьы тон малпаськод, Давид кышкасьтэм вал-а?~ Бен, кышкасьтэм вал. Тодӥськод-а, мар луиз собере?

Давид из зӥръян арбериез (е, кудӥз кыӵес кадь керттэмын) но вить вольыт изъёсты басьтӥз но батырлы пумит потӥз. Куке Голиаф адӟиз, макем егит Давид, со сое серекъяны кутскиз. Но Давид солы шуиз: «Тон мыным пумит мечен потӥд, нош мон тыныд пумит Иеговалэн нимыныз мынӥсько!» Давид Голиафлы пумит бызьыса потӥз, иззэ из зӥръяназ поныса, сое батыр шоры лэзиз но пырак кымесаз сюриз! Соиз кулыса музъем вылэ усиз! Сое адӟыса, филистим ожгарчиос кышказы но бызьыса кошкизы. Нош кызьы егит Давид батырез вормыны быгатӥз?~ Солы юрттӥз Иегова, кудӥз батырлэсь трослы кужмогес!

Малы дышетэ милемыз Давид сярысь веран?~ Иеговалэсь кужмо нокин но ӧвӧл. Но со тынад Эшед. Соин ик, тыныд кышкыт луиз ке, тод, Иегова тыныд кышкасьтэм луыны юрттоз шуыса!