Тимофей адямиослы юрттыны тыршиз

Тимофе́й егит адями вал, кудӥз адямиослы шумпотыса юрттэ вал. Мукетъёсызлы юрттон понна, со трос интыостӥ ветлӥз, но солэн улонэз туж тунсыко вал. Потэ-а тодэмед со сярысь?~

Тимофей Ли́стра карын будӥз. Пичи дыръяз ик солэн Лои́да песянаез но Евни́ка анаез солы Иегова сярысь веразы. Бадӟым будэм бераз Тимофейлэн мукетъёсызлы юрттэмез потӥз Иегова сярысь тодыны.

Куке Тимофей егит пи вал али, апостол Павел ӧтиз сое асэныз ӵош кыдёкысь шаеръёсын ӟеч иворез вераны. Тимофей соку ик вераз: «Мон соглаш!» Со дась вал мукетъёсызлы юрттыны.

Тимофей Павелэн ӵош Македо́ниысь Фессало́ника каре мынӥз. Отчы вуон понна, нырысь соос кема пыдын мынӥзы, нош собере кораблен уяса мынӥзы. Фессалоникаын Павел но Тимофей трос адямиослы Иегова сярысь тодыны юрттӥзы. Нош Фессалоникаын улӥсь куд-ог адямиослы со туж ӧз кельшы. Соос Павел но соин ӵош лыктэмъёс вылэ урдскыны малпазы. Соин ик Павеллы но эшъёсызлы та карысь кошконо но мукет интыосын ӟеч иворез верано луиз.

Кӧня ке толэзь ортчыса, Павел Тимофеез куриз выльысь Фессалоникае мыныны но отысь вын-агайёсыз юнматыны. Со каре выльысь берытскон понна, туж кышкасьтэм луоно вал! Нош Тимофей ӧз кышка. Со Фессалоникае мынӥз, малы ке шуоно отын улӥсь вын-агайёс понна сюлмаськиз. Но Тимофейлэн тыршемез бакель каремын вал. Со апостол Павеллы шумпотон ивор вайиз, Фессалоникаысь вын-агайёслэн осконзы юн вал шуыса!

Трос аръёс ӵоже Тимофей Павелэн ӵош ужаз-тыршиз. Одӥг пол Павел гожтӥз, Тимофей кенешъёс сярысь ваньмызлэсь умой сюлмаськыны быгатӥз шуыса. Уго Тимофей Иеговаез но адямиосыз туж яратэ вал.

Нош тон яратӥськод-а адямиосыз но потэ-а тынад соослы Иегова сярысь верамед?~ Озьы ке, соку тынад улонэд Тимофейлэн кадь шудо но тунсыко луоз!