Кызьы нылпиосты будэтоно

Нылпиосты анай-атайёс будэтыны кулэ. Со Иеговалэн, семьяез кылдытӥсьлэн, малпанэз (Колоссыослы 3:20). Анай-атайёслы нылпиоссэс дышетыны кулэ Иеговаез яратыны но кыл кутыны быгатӥсесь луыны (2 Тимофейлы 1:5; 3:15). Тӥледлы озьы ик валаны тыршоно, мар пидылэн яке нылдылэн сюлмаз. Со сяна, тӥ асьтэос соослы адӟем карон возьматыны кулэ. Тӥледлы капчигес луоз нылпиостэс Иеговалэн кылызлы дышетыны, куке со тӥляд сюлмады луоз (Псалтирь 39:9).

1 НЫЛПИОСТЭС КЫЛЗЫНЫ КОТЬКУ ДАСЬ ЛУЭ

МАР ВЕРА БИБЛИЯ. «Котькудӥз адями кылзӥськись мед луоз, кыл вераны дыртӥсьтэм» (Иаков 1:19). Веранэз ӧвӧл, тӥляд потэ, нылпиды тӥледын котьмар сярысь кышкатэк вераськыны мед быгатоз шуыса. Нылпиос шӧдыны кулэ, тӥ соосыз кылзыны котьку дась шуыса. Семьяяды кусыпъёсты шунытэсь но лякытэсь мед луозы. Со юрттоз нылпиостылы малпанъёссэс кышкатэк вераны но шӧдонъёссэс возьматыны (Иаков 3:18). Соос кышкало ке, тӥ соосыз тышкаськоды но нош ик дышетоды шуыса, соослэн тӥледлы сюлэмзэс усьтэмзы уз поты, дыр. Туж кулэ нылпиостылы яратэмды сярысь ӵемгес вераны но чидасесь луыны (Матфей 3:17; 1 Коринфъёслы 8:1).

ПАЙДАЁ ВИЗЬ-КЕНЕШЪЁС

• Кылзэ нылпидэс, куке солэн вераськемез потэ

• Нылпиосыныды ялан вераське, шуг-секытъёс дыръя гинэ эн

2 ТЫРШЕ ВАЛАНЫ, МАЛЫ СООС ОЗЬЫ ВЕРАЛО

МАР ВЕРА БИБЛИЯ. «Визьмо ужась мурт ӟечлык шедьтэ» (Мадёнъёс 16:20). Куддыръя нылпилэн верамысьтыз секыт валаны, мар солэн сюлмаз. Сое валан понна, визьмо луоно. Ӵем дыръя быдэ вуымтэ пиналъёс бадӟыматыса верало яке верало сое, мае зэмзэ ик уг малпало. «Йылозяз-пумозяз кылзӥськытэк ответ сётӥсь мурт — укылтэм мурт» (Мадёнъёс 18:14). Мылкыдды медаз куашка (Мадёнъёс 19:11).

ПАЙДАЁ ВИЗЬ-КЕНЕШЪЁС

• Мае гинэ нылпиосты медаз вералэ, кылзэ соосты пумозяз но эн тышкаське

• Тодады вае, кызьы тӥ малпаськиды, куке соос кадесь вал, но мар тӥ понна нырысетӥ интыын вал

3 НЫЛПИОСТЭС ОГКЫЛЫСЬ БУДЭТЭ

МАР ВЕРА БИБЛИЯ. «Пие, атаедлэсь нодъямзэ кылзы, анаедлэсь дышетэмзэ кулэтэм эн кары» (Мадёнъёс 1:8). Нылпиосты визьноданы Иегова атаез но, анаез но косӥз. Дышетэ нылпиостэс тӥледыз гажаны но кылзӥськыны (Ефесъёслы 6:1—3). Анай-атайёс «одӥг малпанъёсын» уг уло ке, нылпиос сое соку ик шӧдозы (1 Коринфъёслы 1:10). Кылдэм керетонъёсты, пиналъёсты азьын ӧвӧл, нош куспады гинэ сэрттыны-пертчыны умойгес луысал. Озьы ӧд лэсьтэ ке, нылпиосты тӥледыз анай-атайёсты кадь гажамысь дугдыны быгатозы.

ПАЙДАЁ ВИЗЬ-КЕНЕШЪЁС

• Вераське, кызьы тӥ нылпиостэс будэтоды но мар понна кыл кутытоды

• Нылпи будэтон шоры кузпалэныды пӧртэм сямен учкиськоды ке, тырше валаны кузпалдылэсь учконъёссэ

4 УМОЙ МАЛПАСА ЛЭСЬТЫНЫ КУЛЭ

МАР ВЕРА БИБЛИЯ. «Пинал пиез визьма-нодъя» (Мадёнъёс 22:6). Нылпиос ас кожазы уг но будо, уг но дышетско. Умой малпаса лэсьтоно но йырын возёно, будэтон — со озьы ик тупатон (Псалтирь 126:4; Мадёнъёс 29:17). Нош тупатон — со кыл кутытон гинэ ӧвӧл. Нылпилы валэктоно, малы сое куро чакланы со яке та куронъёсты (Мадёнъёс 28:7). Со сяна, нылпиостэс Иеговалэсь Кылзэ яратыны но отын сётэм возетъёсты валаны дышетэ (Псалтирь 1:2). Озьы соослэн возьытлыксы шонер дышетэмын луоз (Еврейёслы 5:14).

ПАЙДАЁ ВИЗЬ-КЕНЕШЪЁС

• Юрттэ нылпиостылы оскыны, Инмар зэмзэ ик вань но солы оскиськыны луэ шуыса

• Дышетэ адӟыны, кыӵе кышкытлык вайыны быгато, кылсярысь, Интернет но социальной сетьёс. Валэктэ, кызьы соос нылпиосты сантэмасьёслэсь палэнтӥськыны быгатозы