Иеговалы быдэс семьяеныды ужалэ-тырше

Кызьы та брошюраын верамын вал ини, Библиын трос возетъёс вань, кудъёсыз тӥледлы но тӥляд семьядылы пайда вайыны быгатозы. Иеговалэн потэ, тӥ шудоесь мед луоды шуыса. Библия оскытэ, Инмарлы ужан-тыршон улонады валтӥсез луиз ке, «ваньмыз таос [кулэ луисез] но тӥледлы сётэмын луоз» (Матфей 6:33). Инмарлэн туж потэ, тӥ солэн эшъёсыз мед луоды шуыса. Вань луонлыкъёсты кутэ, кудъёсыз юрттозы тӥледлы Инмарен эшъяськондэс юнматыны. Инмарлэн эшез луон — адямилы быдӟым дан (Матфей 22:37, 38).

1 ИЕГОВАЕН КУСЫПЪЁСТЭС ЮНМАТЭ

МАР ВЕРА БИБЛИЯ. «Мон тӥледлы Атай луо, нош тӥ Мынам пиосы, нылъёсы луоды, — шуэ Дунне Кутӥсь Кузё-Инмар» (2 Коринфъёслы 6:18). Инмарлэн потэ, тӥ солэн матысь эшъёсыз мед луоды шуыса. Соин эшъяськон понна, вӧсяськыны кулэ. Иегова ӧте: «Дугдылытэк вӧсяське» (1 Фессалоникаослы 5:17). Со котьку тӥледыз кылзыны дась, куке тӥ солы сюлэмдэс усьтӥськоды но сюлэмшугъяськонъёсты сярысь вераськоды (Филиппыослы 4:6). Семьяеныды ӵош вӧсяськиды ке, матысь адямиосты адӟозы, Инмар тӥ понна зэмос луэ шуыса.

Инмарен вераськыны гинэ кулэ ӧвӧл, нош сое кылзыны но туж кулэ. Ми быгатӥськомы Инмарез кылзыны, кылсярысь, Библиез но со вылэ пыкиськем публикациосты дышетыса. (Псалтирь 1:1, 2). Малпаське со вылын, мае тодӥды. (Псалтирь 76:12, 13). Инмарез кылзон понна, озьы ик христиан пумиськонъёсы ялан ветлыны кулэ (Псалтирь 121:1—4).

Со сяна, Иеговаен кусыпъёсты юнмалозы, со сярысь мукетъёсызлы верады ке. Та уже тросгес пыриськыса, тӥ Инмарлы матэгес луиськоды (Матфей 28:19, 20).

ПАЙДАЁ ВИЗЬ-КЕНЕШЪЁС

• Котькуд нунал Библиез лыдӟон но вӧсяськон понна, дырдэс висъялэ

• Тырше, тӥляд семьяяды, шутэтскон но шулдыръяськон интые, духовной ужъёс нырысетӥ интыын мед луозы шуыса

2 СЕМЬЯЕН ЙЫБЫРТТОН ОРТЧЫТЭ

МАР ВЕРА БИБЛИЯ. «Инмарлы матэ кариське, Со но тӥляд матады лыктоз» (Иаков 4:8). Азьло ик малпалэ, ку семьяен йыбырттондэс ортчытоды, но сое кельтылытэк ортчытъялэ (Улон-вылон 18:19). Со сяна, котькуд нунал ужъёсын но Инмарез вунэтоно ӧвӧл. Семьядылэн Инмарен кусыпьёсыз юнмалозы, та визь-кенешлэсь кылзӥськиды ке: «Та кылъёсты [Инмарлэсь кылъёссэ]... ялан вералля — гуртад пукыкуд но, сюрес кузя мыныкуд но, изьыны выдыкуд но, изьыса султыкуд но» (Кыкетӥ Закон 6:6, 7). Умой адӟем карон возьматӥз Иисус Навин, кудӥз шуиз: «Мон но мынам семьяосы Кузё-Инмарлы ужаса-тыршыса уломы» (Иисус Навин 24:15).

ПАЙДАЁ ВИЗЬ-КЕНЕШ

• Семьяяды котькудӥзлэсь кулэяськонъёссэ лыдэ басьтыса, азьло ик малпаське, мае эскероды