Дунъялэ улонэз, кудзэ Инмар кузьмаз

1. Кин милемлы улон сётӥз?

ИЕГОВА — улэп Инмар (Иеремия 10:10). Со милемлы но улон сётӥз. Библиын Иегова сярысь верамын: «Тон ваньзэ кылдытӥд, ваньмыз Тынад эрикедъя улэ-вылэ, кылдытэмын» (Усьтӥськон 4:11). Иеговалэн потэ вал, ми мед уломы шуыса. Улон — со солэн кузьымез. (Лыдӟе Псалтирез 35:10.)

2. Мар кароно, шудо луон понна?

² Иегова сётӥз милемлы ваньзэ, мар кулэ улон понна, кылсярысь, сиён но ву (Апостолъёслэн ужъёссы 17:28). Солэн потэ вал, улон милемлы шумпотон мед ваёз шуыса (Апостолъёслэн ужъёссы 14:15—17). Шудо луон понна Инмарлэн законъёсызлэсь кылзӥськоно (Исаия 48:17, 18).

ИНМАР УЛОНЭЗ ДУНЪЯ

3. Мар кариз Иегова, куке Каин Авелез вииз?

³ Библиысь ми тодӥськомы, Иегова милесьтым улонмес но, мукет адямиослэсь улонзэс но туж дунъя шуыса. Со адӟиське одӥг учырысь. Адамлэн но Евалэн пизы, Каин, туж вожзэ поттӥз Авель вынызлы. Иегова алӥз Каинэз но вераз, солы аслэсьтыз вожпотонзэ вормыны кулэ шуыса. Но Каин Инмарлэсь ӧз кылзӥськы. Со «Авель вылэ, выныз вылэ, урдскиз но вииз сое» (Улон-вылон 4:3—8). Авелез виемез понна Иегова Каинэз кыл кутытӥз (Улон-вылон 4:9—11). Малы та учыр дышетэ милемыз? Лекъяськон но мукетъёссэ адӟемпотостэм карон туж кышкыт, малы ке шуоно, соослы сётскыса, адями мукетъёссэ вӧсь карыны быгатэ. Библиын верамын, лек адямиос пырак улон уз басьтэ шуыса. (Лыдӟе 1 Иоаннлэсь 3:15.) Иеговалы ярамон луон понна милемлы адямиосты яратыны дышетсконо (1 Иоанн 3:11, 12).

4. Малы Иегова израиль калыклы «эн виы» курон-косон сётӥз?

⁴ Мар эшшо возьматэ на, Иегова улонэз дунъя шуыса? Моисей пыр Иегова израиль калыклы Дас курон-косонъёс сётӥз. Одӥгез соос пӧлысь — «Эн виы» (Кыкетӥ Закон 5:17). Адями та курон-косонэз юри тӥя но кинэ ке вие вал ке, сое ассэ виёно вал.

5. Кызьы Инмар нылпи куштон шоры учке?

⁵ Нош кызьы Инмар нылпи куштон шоры учке? Нылпи куштонэз Иегова туж урод ужен лыдъя. Вордӥськымтэ пиналлэн улонэз но Иеговалы туж дуно потэ. (Лыдӟе Псалтирез 126:3; Иеремиялэсь 1:5.) Ваньмыз со дышетэ милемыз, нылпи куштон шонертэм луэ шуыса. (Учке 28-тӥ ватсам валэктонэз.)

6, 7. Кызьы ми Иеговалы возьматыны быгатомы, улонэз дунъяськомы шуыса?

⁶ Кызьы эшшо ми возьматыны быгатомы на, улонэз дунъяськомы шуыса? Асьмелэн улонмылы но, мукетъёсызлэн улонзылы но кышкытлык ӧм ке кылдытэ: кылсярысь, тамак ӧм ке кыске, наркотикъёсты ӧм ке кутэ но вина юыса ӧм ке улэ. Малы? Малы ке шуоно ваньмыз со тазалыкмылы изъян вае но кулонэ вуттыны быгатэ.

⁷ Милям лулмугормы но — Инмарлэн кузьымез. Инмарлэн потэ, ми тазалыкмы сярысь мед сюлмаськомы шуыса. Урод сямъёс Инмарлэн син азяз адямиез юрӟым каро (Римъёслы 6:19; 12:1; 2 Коринфъёслы 7:1). Ми ӧм дунъялэ ке улонмес, кудзэ Иегова кузьмаз, милям йыбыртъяммы солы уз яра. Куддыръя урод сямъёслэсь куштӥськыны секыт, но Иегова одно ик тӥледлы юрттоз.

8. Мар кароно, ми асьмелэн улонмылы но, мукетъёсызлэн улонзылы но кышкытлык медам кылдытэ шуыса?

⁸ Кызьы ми адӟимы, улон — со дуно кузьым. Милемлы кароно ваньзэ, мае быгатӥськомы, ми асьмелэн улонмылы но, мукетъёсызлэн улонзылы но кышкытлык медам кылдытэ шуыса. Кылсярысь, милемлы туж сак луоно, куке машина, мотоцикл яке мае ке но мукетсэ нуллӥськомы. Милемлы выроно ӧвӧл спортэн, кудӥз улонлы кышкытлык кылдытэ яке лек но жалясьтэм луыны косэ (Псалтирь 10:5). Со сяна, милемлы чаклано, милям дорамы улыны кышкыт медаз луы шуыса. Инмарен сётэм Законын верамын вал: «Выль корка пуктыны кутскид ке, липет бордад кутэт пул шуккы: соку липет йылысьтыд кин ке но усёно луиз ке, коркадэ вирен уд сапта» (Кыкетӥ Закон 22:8).

9. Кызьы пудо-животэн выроно?

⁹ Озьы ик Иегова туж чакла, кызьы ми пудо-животэн выриськомы. Инмар лэзе пудо-животэз виыны, адямилы сиён, дӥськут кулэ ке яке пудо-живот адямилэн улонэзлы кышкытлык кылдытэ ке (Улон-вылон 3:21; 9:3; Потон 21:28). Нош пудо-животъёсын жалясьтэм вырыны но соосты шулдыръяськон понна гинэ виыны уг яра (Мадёнъёс 12:10).

ТОДАДЫ ВОЗЕ, УЛОН СВЯТОЙ ШУЫСА

10. Кытысь ми тодӥськомы, вир улонэз возьматэ шуыса?

¹⁰ Иегова вирез святой шуыса лыдъя, малы ке шуоно вир улонэз возьматэ. Кылсярысь, куке Каин Авелез вииз, Иегова вераз солы: «Музъем вылысен выныдлэн вирызлэн тэльмырем куараез Мон доры кылӥське» (Улон-вылон 4:10). Авельлэн вирыз солэсь улонзэ возьматэ вал. Иегова Каинэз кыл кутытӥз Авелез виемез понна. Ву тудӟон бере Иегова нош ик пусйиз, вир улонэз возьматэ шуыса. Со вераз Нойлы но солэн семьяезлы: «Вань вырисьёс-ветлӥсьёс — улэп макеос — тӥледлы сиыны сётэмын луозы; вож турынэз кадь ваньзэ тӥледлы сиыны сётӥсько; мугорез лулыныз валче, солэн вирыныз валче, эн гинэ сие» (Улон-вылон 1:29; 9:3, 4). Иегова сӥлез вирын ӵош сиыны ӧз лэзьы, малы ке шуоно вир лулэз, яке улонэз, возьматэ вал.

11. Кыӵе закон Инмар израиль калыклы сётӥз?

¹¹ Ву тудӟон бере ог 800 ар ортчыса, Иегова аслаз калыкезлы таӵе закон сётӥз: «Израиль пиос пӧлысь, тӥ пӧлын улыны сьӧрлось лыктэм муртъёс пӧлысь кин ке но пӧйшуракуз сиыны ярамон тылобурдоез яке пӧйшурез кутӥз ке, вирзэ быдэсак мед ӟизатоз, вир виям бервылэз сюен мед шобыртоз». Собере Инмар ватсаз на: «Вирез эн сие» (Левит 17:13, 14). Кызьы адӟиське, Иеговалэн азьвыл сямен ик потэ вал, солэн ужась-тыршисьёсыз вирез святоен мед лыдъялозы шуыса. Со лэзиз соослы сӥль сиыны, нош вир сиыны ӧз лэзьы. Куке израиль калык пудо-животэз сиёнлы вие вал, солы вием пудо-животлэсь вирзэ музъем вылэ ӟизатоно вал.

12. Кызьы христианъёс вир шоры учкыны кулэ?

¹² Иисус Христос кулэм бере кӧня ке аръёс ортчыса, Иерусалимын пумиськизы апостолъёс но христиан кенешысь тӧроос. Соослы ужпум кутоно вал, кыӵе курон-косонъёсты, кудъёссэ Инмар израиль калыклы сётӥз вал, азьвыл сямен ик быдэсъяно. (Лыдӟе Апостолъёслэсь ужъёссэс 15:28, 29; 21:25.) Иегова юрттӥз апостолъёслы но тӧроослы валаны, солэн син азяз вир азьвыл сямен ик дуно луэ шуыса но соослы сое святоен лыдъяно шуыса. Нырысетӥ христианъёслы уг яра вал вирез сиыны яке юыны но вием пудо-животлэсь сӥльзэ сиыны, солэн вирыз ӟизатэмын ӧй вал ке, малы ке шуоно со сульдэръёслы-идолъёслы йыбыртъян но азон-калгон кадь ик сьӧлык луэ вал. Кызьы Иегова туннэ вир шоры учке? Солэн азьвыл сямен ик потэ, ми сое святоен мед лыдъяломы шуыса. Соин ик зэмос христианъёс вирез уг но сиё, уг но юо.

13. Малы христианъёс мугоразы вир лэзьыны пумит луо?

¹³ Яра-а христианъёслы мугоразы вир лэзьыны? Уг, уг яра. Кылсярысь, тӥледыз вина юыны ӧз лэзе ке, возьматэ-а со, тӥледлы сое вирсэрады лэзьыны яра шуыса? Уг, уг возьматы. Со выллем ик, вирез сиыны яке юыны уг яра шуыса косон возьматэ, сое мугоре но лэзьыны уг яра шуыса. (Учке 29-тӥ ватсам валэктонэз.)

14, 15. Кызьы христианъёс улон шоры учко? Тӥялозы-а соос Инмарлэсь законзэ, асьсэлэсь улонзэс утьыны тыршыса? Валэктэ.

¹⁴ Мар кароно, эмъясьёс милемлы верало ке, мугорамы вир лэзьытэк, ми куломы шуыса? Котькуд адями ачиз ужпум кутыны кулэ, кылзӥськоз-а со вир сярысь Инмарен сётэм законлэсь, уз-а. Христианъёс туж дунъяло кузьмам улонэз. Соин ик ми утчаськомы мукет амалъёсты, кызьы улонэз утьыны луэ, нош мугорамы вир лэзьыны соглаш ум луиське.

¹⁵ Инмар улонэз туж дунъя бере, ми тыршиськомы сюлмаськыны тазалыкмы сярысь, но мугорамы вирез лэзьыны пумит луиськомы. Инмарлэсь законъёссэ тӥяса улонмес утьыны тыршон сярысь, милемлы дуногес луэ Инмарлэсь кылзӥськон. Иисус вераз: «Уго кинлэн лулзэ утемез потэ, со сое ыштоз; нош кин Мон понна лулзэ ыштӥз ке, со шедьтоз сое» (Матфей 16:25). Милям Иеговалэсь кылзӥськеммы потэ, малы ке шуоно ми сое яратӥськомы. Со тодэ, мар милемлы умойгес луоз. Иегова сямен ик, ми улонэз дунъяськомы но сое святоен лыдъяськомы (Еврейёслы 11:6).

16. Малы Инмарлэн ужась-тыршисьёсыз солэсь кылзӥсько?

¹⁶ Кызьы ми адӟимы, Инмарлэн ужась-тыршисьёсызлэн юн мылкыдзы вань вир сярысь законлэсь кылзӥськыны. Соос вирез уг но сиё, уг но юо. Соос сое эмъяськон понна но уг куто — соку но, куке улонзылы кышкытлык кылдэмын. Эмъяськон понна соос мукет амалъёсты быръёa. Соос оско, Кылдытӥсь тодэ шуыса, мар соослы умойгес луоз. Оскиськоды-а тӥ, Иегова тӥледлы самой умойзэ сӥзе шуыса?

ВИР НО КУРБОН СЁТОНЪЁС

17. Кыӵе одӥг гинэ амалэн Иегова лэзиз израиль калыклы вирез уже кутыны?

¹⁷ Законын, кудзэ Инмар Моисейлы сётӥз, верамын: «Мугорлэн лулыз вир пушкын улэ, тӥлесьтыд лулдэс чылкытатон-сузян понна [яке сьӧлыкъёстэс куштыны курон понна] курбон сётон ӝӧк вылэ вир мед поноды шуыса Мон сыӵе косон тӥледлы сётӥ, уго таӵе вир лулэз чылкытатэ-сузя» (Левит 17:11). Куке израиль пиос сьӧлыкало вал, соос быгато вал курбонэ вайыны пудо-животэз но курыны священникез со пудо-животлэсь кӧня ке вирзэ храмысь курбон сётон ӝӧк вылэ кисьтыны. Озьы соос Иеговаез сьӧлыкъёссэс куштыны куро вал. Иегова вирез озьы гинэ уже кутыны лэзиз.

18. Кыӵе милям луонлыкмы кылдӥз, Иисуслэн курбонэзлы луыса?

¹⁸ Иисус аслэсьтыз улонзэ сётӥз, яке вирзэ кисьтӥз, милям сьӧлыкъёсмы куштэмын мед луозы шуыса. Со дырысен пудо-животэз курбонэ сётоно ӧвӧл ни (Матфей 20:28; Еврейёслы 10:1). Иисуслэн улонэз туж дуно вал, соин ик, солэн курбонэзлы луыса, Иегова котькуд адямилы пырак улыны луонлык сётыны быгатэ (Иоанн 3:16; 1 Пётр 1:18, 19; Еврейёслы 9:11, 12).

19. Мар милемлы кароно, «быронэ мынӥсьёслэн азьпал адӟонзы понна» ми янгыш медам луэ шуыса?

¹⁹ Милемлы улон кузьмамез понна ми Иеговалы тау кариськомы. Милям мукетъёсызлы но вераммы потэ, соос но пырак улыны быгатозы шуыса, Иисуслы оскизы ке. Ми яратӥськомы адямиосты, соин ик каромы ваньзэ, мае быгатӥськомы, соослы пырак улон басьтыны юрттон понна (Иезекииль 3:17—21). Апостол Павел вераз: «Быронэ мынӥсьёслэн азьпал адӟонзы понна мон янгыш ӧвӧл. Мон уго номыре ватытэк Инмарлэсь вань эриксэ тӥледлы тодытӥ» (Апостолъёслэн ужъёссы 20:26, 27). Милям но «быронэ мынӥсьёслэн азьпал адӟонзы понна» янгыш луэммы уг поты. Соин ик милемлы адямиослы вераны кулэ Иегова сярысь но со сярысь, макем со улонэз дунъя.