5-ТӤ ЮАН

Мар кароно, монэ школаын ултӥяло ке?

МАЛЫ СОЕ ТОДЫНЫ КУЛЭ

Со, кызьы тон астэ возиськод, куке тонэ ултӥяло, югдурез умой пала яке урод пала воштыны быгатэ.

**МАР КАРОД ТОН?**

Пукты син азяд таӵе югдурез: Андрейлэн школае мынэмез уг поты. Туннэ но. Ӵуказе но. Ноку но. Ваньмыз кутскиз куинь толэзь талэсь азьло, куке ӵош дышетскисьёсыз со сярысь супыльтыны кутскизы, нош собере — исаськыны но. Куддыръя кудзы ке но Андрейлэн киысьтыз книгаоссэ уськыто но янгышен озьы пӧрмиз шуыса верало, яке сое донго но, куке со берытске, уг возьмато, кин озьы кариз. Толон ултӥянъёс эшшо но золгес луизы: Андрейлы социальной сеть пыр кышкатыса гожтэт ыстӥзы...

Кызьы тон астэ возьысалыд Андрей интыын?

ДУГДЫ НО МАЛПАСЬКЫ!

Эн малпа, тон номыр карыны уд быгатӥськы шуыса! Тон быгатӥськод йыртэмасьёслы пумит султыны, жугиськонэ пыриськытэк. Кызьы?

АСТЭ КИЯД ВОЗЬ. Библиын верамын: «Укылтэм мурт вань йыркурзэ кисьтэ, нош визьлыко мурт йыркурзэ кутыса возе» (Мадёнъёс 29:11). Тон астэ кияд возьыны тыршид ке, пушкад ваньмыз бугыръяське ке но, тонэ ултӥямысь дугдозы, вылды.
ПУНЭМЗЭ ЭН БЕРЫКТЫ. Библиын верамын: «Нокинлы но уродлы пумит уродэн пунэмзэ эн берыктэ» (Римъёслы 12:17). Пунэмзэ берыктон шуг-секытэз сэрттыны-пертчыны уз юртты, нош сое эшшо уродгес кароз на.
ВИЗЬНОДО ЛУ. Библиын верамын: «Визьнодо мурт шугадӟонэз адӟе но ватӥське» (Мадёнъёс 22:3). Быгатэмедъя кышкыт адямиослэсь но кышкыт югдуръёслэсь палэнын возиськы.
ОТВЕТЭНЫД ПАЙМЫТЫНЫ ТЫРШЫ. Библиын верамын: «Зӥбыт-востэм верам кыл йыркурез кысэ» (Мадёнъёс 15:1). Ултӥямзэс маскаръяськонэ но берыктыны луоз. Кылсярысь, тонэ кӧй шуыса исало ке, тон быгатод пальпотыны но тазьы вераны: «Умой адями бадӟым луыны кулэ!»
БЕРЫТСКЫ НО КОШКЫ. «Ултӥямлы пумит номыр вератэк кошкыны быгатӥськод ке, со возьматэ, тон ултӥясьлэсь визьмогес но кужмогес шуыса,— вера 19 аресъем Нора.— Адӟиське, тон астэ кияд возьыны быгатӥськод шуыса, нош тонэ ултӥясь — уг» (2 Тимофейлы 2:24).
АСЛЫД АЧИД ОСКОНДЭ БУДЭТЫ. Ӵем дыръя ултӥясьёс ӝог валало, кин ачиз сярысь уродэн малпа но кин ачиз понна сылыны уз быгаты. Ултӥясь тонэ уз ултӥя ни, адӟиз ке, тон солы уд сётскиськы шуыса.
ВЕРА МУКЕТЪЁСЫЗЛЫ. Одӥг кышномурт, кудӥз азьло дышетӥсь луыса ужаз, вера: «Ваньмызлы, кинъёс ултӥянэн пумисько, мон ӵектӥсько вераны, соосты ултӥяло шуыса. Со шонер луэ, но со сяна, озьы мукетъёссэ утьыны луэ на, соос ултӥянэн медаз пумиське шуыса».

Егит пи йыртэмась азьын ассэ юн возе — Аслыд ачид оскон кужым сётэ, кудӥз ӧвӧл йыртэмасьлэн

ТОДӤСЬКОД-А ТОН?

Киез йӧттыса вӧсь карон сяна, ултӥянъёс пӧлы пырыны быгато на:

Кылъёсын ултӥянъёс. «Ноку но уг вунэты, кызьы гинэ соос монэ ӧз нималэ, мар гинэ соос мон сярысь ӧз вералэ. Соос сэрен мон асме нокинлы кулэтэм, номыр карыны быгатӥсьтэм адямиен шӧдӥсько вал. Соос монэ жугысалзы ке, мыным капчигес луысал» (Селин, 20 арес).
Вераськытэк улон. «Одӥг классын дышетскисьёсы монэ кылэм-адӟем каремысь дугдӥзы. Нуназезэ сиськыны соос ӝӧк сьӧры пуксё вал озьы, мон мед малпалом, соос вӧзын инты ӧвӧл ни шуыса. Быдэс ар мон бӧрдыса улӥ но огнам сиськи» (Хейли, 18 арес).
Интернет пыр йыртэман. «Компьютерлэн кнопкаосаз кӧня ке пол гинэ зӥбыса, адямилэсь ӟеч нимзэ саптаны, нош куддыръя быдэс улонзэ но сӧрыны луэ. Со бадӟыматыса верам кадь кылӥське, но со зэмзэ ик озьы!» (Даниель, 14 арес).

**АСТЭ ЭСКЕРОН: УЛТӤЯНЪЁС**
ШОНЕР ЯКЕ ШОНЕРТЭМ	ВАЛЭКТОНЪЁС
1 Адямиос трос дауръёс ӵоже ини ултӥянъёсын пумисько.	1 Шонер. Ной улон нуналъёсы вал сыӵе адямиос, кудъёсыз мукетъёссэ ултӥяса возё вал. Сыӵе адямиосты Библия «туж ӝужыт-таза муртъёс» шуыса нима (Улон-вылон 6:4).
2 Ултӥянъёс — со огшоры исаськон гинэ. Соослы саклык висъяно ӧвӧл.	2 Шонертэм. Ултӥянъёс ӵем дыръя одӥгез муг луо, малы егитъёс йырзэс быдто.
3 Ултӥянъёсты дугдытыны самой умой амал — со пунэмзэ берыктон.	3 Шонертэм. Ултӥясьёс ӵем дыръя кужмогес соослэсь, кинэ ултӥяло, соин ик умойгес луоз соослэсь палэнын возиськыны.
4 Тон адӟиськод ке, кинэ ке ултӥяло шуыса, умойгес луоз палэнтӥ ортчыны.	4 Шонертэм. Таӵе учырын палэнтӥ ортчоно ӧвӧл. Тон адӟид ке, кинэ ке ултӥяло шуыса но нокинлы ӧд вера ке, шуг-секытэз сэрттыны-пертчыны юрттэм интые, тон сое уродгес карод на.
5 Йыртэмасьлэн ушъяськемез ӵем дыръя возьматэ, со ачиз сярысь урод малпа шуыса.	5 Шонер. Куд-ог йыртэмасьёс ӵем дыръя асьсэды туж вылӥ каро, но вань на сыӵеосыз, кудъёсыз асьсэ сярысь урод малпало, но, мукетъёссэ ултӥяса, асьсэды вылӥе пукто.
6 Йыртэмасьёс воштӥськыны быгато.	6 Шонер. Йыртэмасьёслы юрттӥд ке, соос воштӥськыны быгатозы.