9-ТӤ ЮАН
Кулэ-а мыным эволюцилы оскыны?
МАР КАРОД ТОН?
Пукты син азяд таӵе югдурез: Алекс мар карыны паймемын. Со котьку оскиз, Инмар ваньзэ кылдытӥз шуыса. Нош туннэ школаын биологиен дышетӥсез туж оскымон вераз, эволюция зэм луэ шуыса, со сярысь верало тодосчиослэн эскеронъёссы. Алекслэн уг поты, сое шузиен мед лыдъялозы шуыса. «Тодосчиос эволюция зэмзэ но ортче шуыса возьматӥзы бере,— шуэ со аслыз,— соку кин мон сыӵе, соослы пумит кыл вераны?»
Кызьы тон малпаськод, кулэ-а Алекслы эволюцилы оскыны, учебникъёсын озьы верам понна гинэ?
ДУГДЫ НО МАЛПАСЬКЫ!
Та юан пумысен адямиослэн малпанъёссы туж пӧртэмесь ке но, тросэз вераны быгато, марлы соос оско, нош малы соос солы оско, валэктыны уг быгато.
Куд-огъёсыз оско, ваньмыз кылдытэмын вал шуыса, малы ке шуоно озьы соосты анай-атайёссы дышетӥзы.
Куд-огъёсыз эволюцилы оско, малы ке шуоно школаын озьы дышетӥзы.
КУАТЬ ЮАНЪЁС, МАЛПАСЬКОН ПОННА
Библиын верамын: «Котькуд коркаез кин ке но пуктэ; нош ваньзэ пуктӥсь-лэсьтӥсь луэ — Инмар» (Еврейёслы 3:4). Визьмо луоз-а солы оскыны?
Улонэз нокин ӧз кылдыты шуыса вераны озьы ик визьмо уз луы, кызьы визьмо уз луы вераны, та коркаез нокин ӧз пукты шуыса.
ВЕРАН: Дуннеысь ваньмыз «бадӟым пуштонэн» сэрен кылдӥз.
1. Кинлы яке малы луыса «бадӟым пуштон» вал?
2. Малы оскыны визьмогес луоз: ваньмыз ас понназ кылдӥз яке ваньзэ кин ке кылдытӥз?
ВЕРАН: адямиос пудо-животъёслэсь кылдӥзы.
3. Адямиос пудо-животъёслэсь кылдэмын ке, кылсярысь, обезьянъёслэсь, соку малы адямиослэн но обезьянъёслэн визьзы сокем пӧртэм луэ?
4. Малы одӥг клеткалэсь улэп макеос гинэ но сокем паймымонэсь?
ВЕРАН: эскеронъёс возьмато, эволюция зэм луэ шуыса.
5. Со, кин озьы вера, эволюция зэм луэ шуыса оскытонъёсты ачиз эскериз-а?
6. Кӧня адямиос оско эволюцилы, малы ке шуоно соослы веразы, солы вань дышетскем адямиос оско шуыса?
«Нюлэстӥ ветлыкуды, чебер коркаез адӟыса, малпалоды-а тӥ: „Паймоно кадь. Писпуос сокем усто усиллям но, сыӵе чебер корка пуксем!“ Уд, уд малпалэ. Озьы луыны уг быгаты. Соку малы ми оскыны кулэ, ваньмыз Дуннеын ас понназ кылдӥз шуыса?» (Джулия).
«Кылсярысь, кин ке но тӥледлы вера, типографиын мар ке но пуштӥз но, буёл борддоръёс но вӧлдэт вылэ пазяськыса, бадӟым кыллюкам гожтӥськиз шуыса. Оскысалды-а тӥ солы?» (Гвен).
МАЛЫ ИНМАРЛЫ ОСКЫНЫ ВИЗЬМО ЛУОЗ?
Библия ваньзэ чакланы-эскерыны косэ (1 Фессалоникаослы 5:21). Со возьматэ, тынад осконэд кулэ ӧвӧл кылдыны...
ШӦДОНЪЁСЛЫ ЛУЫСА (Мон шӧдӥсько, кыӵе ке вылӥ кужым луыны кулэ шуыса)
ЙЫЛОЛ-СЯМЪЁСЛЫ ЛУЫСА (Мон улӥсько отын, кытын ваньзы Инмарлы оско)
МУКЕТЪЁСЫЗЛЭН ДЫШЕТЭМЗЫЛЫ ЛУЫСА (Мон Инмарлы оскись семьяын будӥ — монэ озьы дышетӥзы)
Со интые тынад осконэдлэн юн инъетэз луыны кулэ.
«Куке дышетӥсьмы урокын вера, кызьы адямилэн лулмогорыз ужа, мынам Инмар вань шуыса осконэ эшшо но юнма. Мугорлэн котькуд люкетэз, самой пичиез но, аслэсьтыз ужзэ быдэстэ, ӵем дыръя ми сое ум но шӧдӥське. Адямилэн мугорыз зэмзэ ик туж паймымон!» (Тереза).
«Куке мон адӟисько туж ӝужыт юртэз, бадӟым кораблез яке машинаез, мон юасько аслэсьтым: „Кин сое лэсьтӥз?“ Кылсярысь, машинаез лэсьтыны быгатэ юри солы дышетскем адями гинэ. Малы ке шуоно, машина мед ветлоз шуыса, кулэ лэсьтыны озьы, солэн вань детальёсыз огъя мед ужалозы шуыса. Машиналэн гинэ но лэсьтӥсез вань бере, соку мар веранэз ини адямиос сярысь!» (Ричард).
«Тодосчиослэсь ужъёссэс эскеремъя мынам эволюцилы осконэ лябӟиз. [...] Мон малпамъя, Кылдытӥсьлы сярысь, эволюцилы оскыны секытгес» (Энтони).
МАР СЯРЫСЬ МАЛПАСЬКОНО
Дасо аръёс ӵоже эскеронъёс ортчытыса но, тодосчиос пӧртэм сямен валэкто сое, кызьы эволюция ортче. Тодосчиослэн гинэ но эволюция пумысен одӥг малпанэ вуэмзы уг луы бере — нош соослы ваньмызлэсь трос тодыны кулэ со сярысь,— малы тыныд солы одно ик осконо?