7-ТӤ УРОК

Иегова. Кыӵе со?

Печатлам вариант

Иегова Инмар сярысь малпаськыкуды, кыӵеен тӥ сое син азяды пуктӥськоды? Тросэз адямиос малпало, со туж быдӟым, кужмо но туж кыдёкын шуыса. Куд-огъёсыз малпало, со кужмо тӧл выллем шуыса. Нош тӥ кызьы малпаськоды, кыӵе Иегова зэмзэ ик? Аслаз Кылыз пыр, Библия пыр, Иегова вера милемлы аслаз сямъёсыз сярысь но вера, со тӥ сярысь сюлмаське шуыса.

1. Малы ми Инмарез адӟыны ум быгатӥське?

«Инмар — со дух» (Иоанн 4:24). Иеговалэн милям кадь мугорыз ӧвӧл. Со дух, кудӥз улэ инмын, сыӵе интыын, кудзэ ми адӟыны ум быгатӥське.

2. Кыӵе сямъёсыз Иеговалэн?

Ми Иеговаез ум адӟиське ке но, со вань. Солэн вань туж умой сямъёсыз. Куке ми Иеговаез умойгес тодӥськомы, ми сое яратыны кутскиськомы. Библиын верамын: «Кузё-Инмар шонерлыкез яратэ, Аслэсьтыз дун-чылкыт улӥсьёссэ уг кушты» (Псалтирь 36:28). Озьы ик со «ӟеч сюлэмо, ваньзэ гажась-жалясь» (Иаков 5:11). Тужгес но со жаля соосты, кинъёс курадӟо. «Сюлмынызы чигиськыса улӥсьёслы Кузё-Инмар матын улэ, духенызы зӥбыт муртъёсты Со уте» (Псалтирь 33:19). Нош тодӥськоды вал-а тӥ, Иегова туж чакла шуыса, кызьы ми асьмеды возиськомы? Адями, кудӥз урод ужъёс лэсьтэ, Иеговаез ӝоже уськытэ (Псалтирь 77:40, 41). Нош адями, кудӥз умой ужъёс лэсьтэ но шонер улэ, сое шумпоттэ. (Лыдӟе Мадёнъёсты 27:11.)

3. Кызьы Иегова милемлы аслэсьтыз яратэмзэ возьматэ?

Иеговалэн валтӥсь сямыз — со яратон. Библиын верамын: «Инмар — со яратон» (1 Иоанн 4:8). Иеговалэн яратэмез сярысь ми тодӥськомы Библиысь. Озьы ик солэсь яратэмзэ ми адӟиськомы, кылдытэмъёсыз шоры учкыса. (Лыдӟе Апостолъёслэсь ужъёссэс 14:17.) Малпалэ, кылсярысь, кызьы ми кылдытэмын. Ми быгатӥськомы пӧртэм буёлъёсты адӟыны, чебер крезьгурез кылыны но ческыт сиёнлы шумпотыны. Иеговалэн потэ, ми шумпотыса мед уломы шуыса.

МУРГЕС ЭСКЕРЕ

Ойдолэ тодомы, мар юрттэ Иеговалы паймымон ужъёс лэсьтыны. Собере тодомы, кызьы Иегова аслэсьтыз умой сямъёссэ возьматэ.

4. Святой дух — со Инмарлэн ужась-лэсьтӥсь кужымез

Суредъёс: со, мае Инмар святой духеныз кылдытӥз. 1. Шунды но со котырысь планетаос. 2. Пиосмурт свитоке гожтэ малпанъёсты, кудъёссэ солы Инмар сётӥз.

Ми мае ке ас киосынымы лэсьтӥськомы. Нош Иегова ваньзэ аслаз святой духеныз лэсьтэ. Библиын верамын, святой дух со кин ке ӧвӧл шуыса, со кужым, кудӥныз Иегова мае ке лэсьтэ. Лыдӟе Лукалэсь 11:13 но Апостолъёслэсь ужъёссэс 2:17 но та юанъёслы валэктонъёс сётэ:

Инмар аслэсьтыз святой духсэ сётэ соослы, кинъёс сое куро. Соин ик, кызьы тӥ малпаськоды, святой дух со Инмарлэн ужась-лэсьтӥсь кужымез яке мар ке мукетыз? Малы тӥ озьы малпаськоды?

Иегова аслаз святой духеныз паймымон ужъёс лэсьтэ. Лыдӟе Псалтирез 32:6 но 2 Пётрлэсь 1:20, 21, собере та юанлы валэктон сётэ:

Мар карыны Иегова аслэсьтыз святой духсэ кутэ?

5. Иеговалэн сямъёсыз синмаськымонэсь

Моисей Инмарлэн оскымон ужась-тыршисез вал ини ке но, солэн эшшо умойгес тодэмез потӥз аслэсьтыз Кылдытӥсьсэ. Соин ик со куриз Инмарез: «Аслэсьтыд сюрестэ мыным усьты, мон Тонэ мед тодом» (Потон 33:13). Соку Иегова Моисейлы аслаз куд-ог сямъёсыз сярысь вераз. Лыдӟе Потонэз 34:4—6 но та юанъёслы валэктонъёс сётэ:

Аслаз кыӵе сямъёсыз сярысь Иегова Моисейлы вераз?
Иеговалэн кыӵе сямъёсыз тӥледлы тужгес но кельшо?

6. Иегова адямиос сярысь сюлмаське

Инмарлэн калыкез, еврейёс, Египетын ляльчиын вал. Кызьы Иегова соослэн курадӟемзы шоры учке вал? Кылзэ АУДИОГОЖТЭМЕЗ но текстъя эскере яке лыдӟе Потонэз 3:1—10. Собере та юанъёслы валэктонъёс сётэ:

АУДИОГОЖТЭМ: «Иегова соослэсь курадӟемзэс адӟиз» (2:45)

Мае тӥ тодӥды та кылбуръёсысь со сярысь, кызьы Иегова учке адямиослэн курадӟемзы шоры? (Учке 7-тӥ но 8-тӥ кылбуръёсты.)
Кызьы тӥ малпаськоды, Иеговалэн зэмзэ ик-а потэ адямиослы юрттэмез но зэмзэ ик-а со быгатэ соослы юрттыны? Малы тӥ озьы малпаськоды?