«Быдэс музъемлэн Судьяез» котьку шонерлыко лэсьтэ

1. Кызьы Авраам оскемзэ возьматӥз, Иегова котьку но шонерлыко лэсьтэ шуыса? (Учке статья кутсконысь суредэз.)

«БЫДЭС музъемлэн Судьяез шонертэм судить кароз шат?» (Ул.-выл. 18:25). Та кылъёсын Авраам оскемзэ возьматӥз, Иегова Содом но Гоморра каръёсты шонерлыко судъялоз шуыса. Авраам оске вал: Иегова ноку но шонерлыктэм уз лэсьты но шонер улӥсез сьӧлыклэсь кышкасьтэмен огазе уз быдты шуыса. Со вераз: «Таӵезэ Тон уд лэсьты!» Ог 400 ар ортчыса Иегова ачиз сярысь тазьы гожтыны косӥз: «Со пырдылӥсьтэм изгурезь; дун-шектэмесь Солэн ужъёсыз, Солэн вань сюресъёсыз шонересь» (К. Зак. 31:19; 32:4).

2. Кытысь ми тодӥськомы, Иегова шонерлыктэм лэсьтыны уг быгаты шуыса?

² Малы Авраам оске вал, Иегова котьку но шонерлыко судъя шуыса? Малы ке шуоно Иегова ачиз шонерлыко но зэмлыко. Та кылъёс пуштроссыя туж матын луо. Иегова ачиз пример возьматэ бере, кызьы шонерлыко но зэмлыко ужъёс лэсьтыны, луоз вераны, со югдурез котьку шонер судъя шуыса. Со сяна, Библиын гожтэмын: «Со зэмлыкез, шонер судэз яратэ» (Пс. 32:5).

3. Кыӵе шонерлыктэм ужъёсын пумисько адямиос та дуннеын? Вералэ пример.

³ Та дуннеын шонерлыктэм ужъёс паськыт вӧлмемын. Соин ик туж шумпотоно тодыны, Иегова котьку шонерлыко лэсьтэ шуыса. Куддыръя адямиос туж шонерлыктэм ужъёсын сэрен курадӟо, кылсярысь, соосты пытсэт сьӧры пукто йыружъёс понна, кудъёссэ соос ӧз лэсьтэ. Вал сыӵе учыръёс, куке янгыштэм адямиос трос аръёс пытсэт сьӧрын пукизы но отысь потӥзы соку гинэ, куке соослэсь ужзэс выль амалэн эскеризы. Сыӵе шонерлыктэм ужъёс сюлэмез туж вӧсь каро, вожез но потто. Нош вань на мукет шонерлыктэм ужъёс, кудъёссэ христианъёслы чиданы секытгес луэ.

КЕНЕШЫН

4. Кызьы христиан муртлэн осконэз эскериськыны быгатэ?

⁴ Христианъёс валало, та дуннеын соос шонерлыктэм ужъёсын пумиськыны быгато шуыса. Нош куке ми кенешын сыӵе ужъёсын пумиськиськомы, соку милям осконмы эскериське. Мар тӥ кароды сыӵе учыръёсы? Лябӟытоз-а со тӥлесьтыд оскондэс?

5. Малы паймоно ӧвӧл, кенешын кин ке, умойтэм уж лэсьтыса, милемыз вӧсь карыны быгатоз шуыса?

⁵ Ми ваньмы тырбыдэстэмесь но куддыръя янгышаськомы. Соин ик ми валаськомы, кенешын но кин ке, умойтэм уж лэсьтыса, милемыз вӧсь карыны быгатоз шуыса, яке асьмеос кинэ ке но вӧсь каромы (1 Иоанн 1:8). Сыӵе учыръёс туж шер ке но, соос Инмарлы оскымон христианъёсты уг паймыто но ӝоже уг уськыто. Аслаз Кылаз Иегова милемлы пайдаё визь-кенешъёс сётӥз, кудъёсыз юртто солы оскымон кыльыны, огъя оскисьмы милемыз вӧсь кариз ке но (Пс. 54:13—15).

6, 7. Кыӵе шонерлыктэм ужен пумиськиз одӥг вын-агай но кыӵе сямъёс юрттӥзы солы со югдурын ассэ шонер возьыны?

⁶ Ойдолэ тодомы, мар луиз Вилли Диль нимо вын-агаен. 1931-тӥ арысен со ужаз-тыршиз Вефильын Берн карын (Швейцария). 1946-тӥ арын сое ӧтизы Нью-Йорке (США) Галаад школалэн 8-тӥ классаз. Кӧня ке дыр ортчыса, сое Швейцарияе ёросэз чаклась карыса ыстӥзы. Тани мар вераз со ачиз сярысь: «1949-тӥ арын куартолэзе мон Берн карысь филиалэ ивортӥ, кышнояськыны малпасько шуыса». Кыӵе ивор вуиз отысь? Солы пионер луыса гинэ ужаны-тыршыны лэзизы, нош кенешын мукет ужъёсты быдэсъяны ӧз лэзе ни. Вилли вын-агай вера: «Монэ речьёс вераны ӧз лэзе ни... Тросэз милемын ӟечбуръяськемысь дугдӥзы но ми шоры кенешысь поттэмъёс шоры кадь учкыны кутскизы».

⁷ Мар юрттӥз Вилли вын-агайлы чиданы та шуг-секытэз? Со валэктӥз, соос кышноеныз тодо вал, кузпалъяськон Библилы пумит уг луы шуыса, соин ик соос вӧсяськыса буйгатскылӥзы но Иеговалы оскиськизы. Куке вын-агайёс кузпалъяськон шоры шонер учкыны кутскизы, Вилли вын-агайлы кенешын выльысь ужъёс нуыны оскизы. Иеговалы оскымон кылемез понна со бакель каремын валa. Милемлы кулэ юаны асьмелэсь: «Мон но сыӵе югдуре сюри ке, быгато-а мон асме озьы ик возьыны? Иегова вылэ оскиськыса уло-а яке ас вылам оскисько но ваньзэ ачим тупатыны тыршо?» (Мад. 11:2; лыдӟы Михейлэсь 7:7).

8. Малы ми малпаны быгатӥськомы, шонерлыктэм ужен пумиськимы шуыса?

⁸ Тӥ асьтэос яке кенешысь кин ке шонерлыктэм ужен пумиськиды кадь потэ ке, эн вунэтэ, та пумысен тӥ янгыш малпаны но быгатоды шуыса. Ми озьы малпаны быгатӥськомы, малы ке шуоно югдур шоры шонертэм учкиськомы яке ваньзэ пыр-поч ум тодӥське. Шонер-а ми малпаськомы, ум-а, туж кулэ Иеговалы вӧсяськыны но солы оскымон кыльыны, милям солы вожмы медаз поты шуыса. (Лыдӟы Мадёнъёсты 19:3.)

9. Кыӵе учыръёсты ми эскеромы таяз но вуоно статьяосын?

⁹ Ойдолэ эскеромы вашкала дыръёсысь куинь учыръёсты, куке Инмарлэн калыказ шонерлыктэм ужъёс лэсьтэмын вал. Та статьяысь ми тодомы Авраамлэн выжыысьтыз потэм Иосиф сярысь, кудӥз аслаз агайёсыныз сэрен курадӟоно луиз. Нош мукет статьяысь ми тодомы, мар кариз Иегова Израильлэн Ахав эксэеныз но кызьы ассэ возиз Пётр Сирияысь Антиохияын. Эскерем учыръёсысь тырше дышетскыны ваньмыз шоры Иеговалэн синмыныз учкыны но соин матысь кусыпъёстэс утьыны, тужгес но соку, куке тӥ малпаськоды, тӥледлы пумит шонерлыктэм уж лэсьтэмын вал шуыса.

ИОСИФ ШОНЕРЛЫКТЭМ УЖЕН ПУМИСЬКИЗ

10, 11. а) Мае Иосифлы чидано луиз? б) Кыӵе луонлыкез кылдӥз Иосифлэн, пытсэтын пукыкуз?

¹⁰ Иосиф, Иеговалэн оскымон ужась-тыршисез, мурт адямиосын сэрен гинэ ӧз, нош аслаз агайёсыныз сэрен шонерлыктэм ужъёсын пумиськиз, мар солэсь сюлэмзэ туж вӧсь кариз. Куке солы 17 арес вал, солэн агайёсыз сое лушкаса ляльчие вузазы. Озьы со Египетэ вуиз (Ул.-выл. 37:23—28; 42:21). Кӧня ке дыр ортчыса, сое, кузё кышноез сантэманы малпа шуыса, янгыше уськытӥзы но, ужзэ эскерытэк, пытсэтэ пуктӥзы (Ул.-выл. 39:17—20). Иосиф ляльчи вал, нош собере 13 ар пала пытсэтын пукиз. Огъя оскисьёсмы пӧлысь кин ке милемлы пумит шонерлыктэм уж лэсьтӥз ке, кызьы милемлы юрттоз Иосифлэн учырез?

¹¹ Иосифлэн луонлыкез вал вераны, мар соин луиз, одӥгезлы пытсэтын пукисьлы. Со азьвыл вина омыръясьёслэн йырзы вал но фараонлэн юртаз ужаз. Одӥг пол со уйвӧт адӟиз, кудӥзлэсь пуштроссэ Инмар Иосифлы усьтӥз. Вина омыръясьлэн уйвӧтэз возьматэ вал, сое азьло интыяз берыктозы но со выльысь фараонлэн юртаз ужалоз шуыса. Со уйвӧтлэсь пуштроссэ валэктэмез бере Иосиф аслэсьтыз учырзэ вераз вина омыръясьлы. Малпаськыса со сярысь, мае Иосиф вераз но мае ӧз вера, ми тросэзлы дышетскыны быгатомы (Ул.-выл. 40:5—13).

12, 13. а) Малы луоз вераны, Иосиф нюръяськемысь ӧз дугды но киоссэ ӧз лэзьы шуыса? б) Мар сярысь Иосиф вина омыръясьлы ӧз вера, вылды?

¹² Лыдӟы Улон-вылонэз 40:14, 15. Висъялэ саклыктэс: Иосиф вераз, сое «еврей музъемысь лушкаса вайизы» шуыса. Озьы солы пумит шонерлыктэм уж лэсьтӥзы. Иосиф вераз, со ӧз лэсьты шуыса со йыружез, кудӥз понна сое пытсэтэ пуктӥзы. Соин ик Иосиф вина омыръясез куриз: «Фараонлы мон сярысь тодаз вайыты». Малы? Малы ке шуоно солэн пытсэтысь потэмез потэ вал.

¹³ Луоз-а вераны, Иосиф нюръяськемысь дугдӥз но киоссэ лэзиз шуыса? Уз, уз луы. Со тодэ вал, шонерлыктэм ужъёсын трос пол пумиськылӥз ини шуыса. Со пыр-поч вераз ваньзэ, мар соин луиз, со адямилы, кудӥз солы юрттыны быгатэ вал. Тунсыко, но Библиын верамын ӧвӧл, Иосиф кинлы ке вераз шуыса, кин сое лушказ. Со сярысь со фараонлы гинэ но ӧз вера. Куке Иосифлэн агайёсыз Египетэ лыктӥзы но Иосифен кусыпъёссэс тупатӥзы, фараон соосты шумпотыса пумитаз но аслаз шаераз интыяськыны ӵектыса вераз: «Мар устоез вань Египет музъемын, сое тӥледлы сёто» (Ул.-выл. 45:16—20).

14. Мар юрттоз милемлы кыл вӧлдытэк улыны, кенешын милемыз кин ке но ӝоже уськытӥз ке но?

¹⁴ Христиан мурт малпа ке, солы пумит шонерлыктэм уж лэсьтэмын вал шуыса, туж кулэ чакласькыны, со сярысь кыл медам вӧлды шуыса. Нош вераськон мынэ ке секыт сьӧлык сярысь, соку шонер луоз, юрттэт курыса, тӧроослы вазиськыны но соослы луэмез сярысь вераны (Лев. 5:1). Ӵем дыръя, секыт сьӧлык лэсьтэмын ӧвӧл ке, валамтэосты луоз сэрттыны-пертчыны нокинлы вератэк, тӧроослы гинэ но. (Лыдӟы Матфейлэсь 5:23, 24; 18:15). Ойдолэ Инмарлы оскымон луомы но со выллем учыръёсты, Библиысь возетъёсты уже кутыса, сэрттомы-пертчомы. Нош куддыръя ми валаны быгатомы, кылдэм югдур пумысен ми шонертэм малпамы, но отын нокыӵе шонерлыктэм уж лэсьтэмын ӧй вал шуыса. Макем ми шумпотомы соку, югдурез эшшо но секытгес ӧм каре шуыса, вын-агаймы яке сузэр-апаймы сярысь кыл вӧлдыса! Котьку тодамы возёно: шонер-а ми малпаськомы, ум-а, но кыл вӧлдыса со сярысь, кин милемыз ӝоже уськытӥз, ми югдурез тупатыны ум быгатэ. Иеговалы но вын-агайёсмылы оскымон кылимы ке, ноку но сыӵе янгыш ум лэсьтэ. Псаломъёсты гожъясь вераз со сярысь, «кин сьӧлыкатэк улэ», со «кыл вӧлдыса уг ветлы, эшезлы урод уж уг лэсьты, матысь муртсэ кылыныз вӧсь уг кары» шуыса (Пс. 14:2, 3; Иак. 3:5).

ИНМАРЕН КУСЫПЪЁСТЭС ТОДАДЫ ВОЗЕ

15. Кызьы Иосиф, Иеговалы оскымон кылемез понна, бакель каремын вал?

¹⁵ Ми быгатӥськомы на дышетскыны отысь, кыӵе кусыпъёсыз вал Иосифлэн Иеговаен. 13 секыт аръёс ӵоже Иосиф ваньмыз шоры Инмарлэн синмыныз учкиз (Ул.-выл. 45:5—8). Со ноку но Иеговаез янгыше ӧз уськыты со понна, мар соин луиз. Иосиф ӧз вунэты ке но, кӧня уродзэ солы лэсьтӥзы, солэн сюлмыз ӧз измы. Нош эшшо но валтӥсез: со ӧз лэзьы, мукетъёсызлэн тырбыдэстэм луэмзы но лек ужъёссы сое Иегова бордысь мед палэнтозы шуыса. Иосиф Иеговалы оскымон кылиз, соин ик со адӟиз, кызьы Инмар ваньзэ тупатӥз но сое но солэсь семьязэ бакель кариз.

16. Малы Иеговаен кусыпъёсмес юнматоно, кенешын милемыз кин ке вӧсь кариз ке?

¹⁶ Иосиф сямен ик, милемлы но туж кулэ Иеговаен кусыпъёсмес дунъяны но утьыны соосты. Ойдолэ ум лэзе, мукетъёсызлэн тырбыдэстэм луэмзы милемыз мед палэнтоз шуыса Инмар дорысь, кудзэ ми яратӥськомы но кудӥзлы ужаськомы-тыршиськомы (Рим. 8:38, 39). Христианъёс пӧлысь кин ке милемыз вӧсь кариз ке, адӟем каромы Иосифлэсь — Иеговалы матэ кариськомы но кылдэм югдур шоры солэн синмыныз учкыны тыршомы. Кылдэм шуг-секытэз Библия дышетэмъя сэрттыны-пертчыны тыршеммы бере, милемлы кулэ ваньзэ Иегова кие сётыны но оскыны, со одно ик ваньзэ дырыз дыръя тупатоз шуыса озьы, кызьы солы кулэ.

ОСКЕ «БЫДЭС МУЗЪЕМЛЭН СУДЬЯЕЗЛЫ»

17. Кызьы ми возьматыны быгатӥськомы, «быдэс музъемлэн Судьяезлы» оскиськомы шуыса?

¹⁷ Та дуннеын улыса, ми азьланяз но шонерлыктэм ужъёсын пумиськомы. Куддыръя тӥ яке кин ке эшъёсты пӧлысь малпаны быгатоды, кенешын кин ке но шонерлыктэм уж лэсьтӥз шуыса. Нош сыӵе учыр кылдӥз ке, со тӥледыз медаз канжаськыты (Пс. 118:165). Инмарлы оскымон кыле но солы, юрттэт курыса, вӧсяське. Валаны кулэ: кылдэм югдур сярысь ми ваньзэ ум тодӥське, вылды, яке кылдэм югдур пумысен шонертэм малпанэ вуимы. Кызьы ми адӟимы Иосифлэн учырысьтыз, кулэ ӧвӧл кыл вӧлдыса ветлыны, нош валаны кулэ, озьы ми югдурез эшшо но секытгес каромы шуыса. Со сяна, ас выламы оскиськон но югдурез ас киямы басьтон интые, ойдолэ тыршомы Инмарлы оскымон кыльыны но чидаса возьманы, куке со ачиз ваньзэ тупатоз. Соку Иегова милемыз одно ик бакель кароз, озьы ик, кызьы со куке но бакель кариз вал Иосифез. Ми оскыны быгатӥськомы, Иегова, «быдэс музъемлэн Судьяез», котьку шонерлыко лэсьтэ шуыса, малы ке шуоно «Солэн вань сюресъёсыз шонересь» (Ул.-выл. 18:25; К. Зак. 32:4).

18. Мае ми эскеромы вуонояз статьяын?

¹⁸ Вуонояз статьяын ми эскеромы вашкала дыръёсысь эшшо кык учыръёсты, куке Иеговалэн ужась-тыршисьёсыз шонерлыктэм ужъёсын пумиськизы. Та учыръёс возьматозы, кызьы зӥбыт-востэм сям но простить карыны дась луон юрттозы милемлы шонерлыктэм ужъёс шоры Иегова сямен учкыны.