«Мар сӥзид, сое быдэсты»

1. а) Мар огкадез вал Иеффайлэн но Анналэн? (Учке статья кутсконысь суредъёсты.) б) Кыӵе юанъёсты ми эскеромы та статьяын?

ИЕФФАЙ кужмо ожгарчи но Инмар калыклэн кышкасьтэм азьветлӥсез вал. Анна — зӥбыт-востэм кышномурт но картэзлэсь кылзӥськись кышно. Соос кыкназы но одӥг Инмарлы йыбыртъяло вал. Нош мар эшшо огкадез вал на соослэн? Кыкназы ик соос Инмарлы кылзэс сётӥзы но сётэм кылзэс быдэстӥзы. Иеффай но Анна умой пример возьматӥзы асьме даурысь пиосмуртъёслы но кышномуртъёслы, кудъёсыз Иеговалы сӥзиськон сётыны малпазы. Нош мар со сыӵе сӥзиськон? Кызьы кулэ учкыны сӥзиськонъёс шоры, кудъёссэ ми сётӥськомы Инмарлы? Малы ми дышетскыны быгатӥськомы Иеффайлэн но Анналэн учыръёсысьтызы?

2, 3. а) Мар со сыӵе сӥзиськон? б) Мар Библиын верамын Инмарлы сётэм сӥзиськонъёс сярысь?

² Библиын кутӥськись «сӥзиськон» кыл возьматэ Инмарлы кыл сётэмез. Со, кин сӥзиськон сётэ, кылзэ сётэ мар ке карыны, кыӵе ке кузьым сётыны, нимысьтыз ужан-тыршонэ пыриськыны яке малэсь ке возиськыны. Сӥзиськонъёсты сёто ас мылкыд каремзыя, нокин косытэк. Адями Инмарлы сӥзиськон сётэ ке, Инмарлэн син азяз со сӥзиськон туж дуно луэ, но со возьма, сое одно ик быдэстозы шуыса. Сӥзиськон оскытыса сётэм кыл кадь луэ (Ул.-выл. 14:22, 23; Евр. 6:16, 17). Мар верамын Библиын, макем кулэ быдэстыны Инмарлы сётэм сӥзиськонъёсты?

³ Моисейлэн законаз тазьы верамын: «Кин ке Кузё-Инмар азьын сӥзиськиз яке... лулыныз-сюлмыныз кыл сётыса оскытӥз ке, соку со сётэм кылзэ быдэстытэк кельтыны кулэ ӧвӧл ини, ма потӥз солэн кылысьтыз-ымысьтыз, ваньзэ сое со быдэстыны кулэ» (Лыд. 30:3). Берлогес Соломон гожтӥз: «Инмар азьын сӥзиськиськод ке, сое ӝегатэк быдэсты, Инмар укылтэмъёслы ӟеч эриксэ уг возьматы уго; мар сӥзид, сое быдэсты» (Екк. 5:3). Иисус но вераз, сётэм кылэз котьку быдэстыны кулэ шуыса: «Тӥ кылӥды, вашкалаослы мар шуэмын: „Эн куштӥськы сётэм кылыдлэсь, быдэсъя Кузё-Инмар азьын сётэм кылъёстэ“» (Матф. 5:33).

4. а) Кызьы учконо Инмарлы сётэм кылмы шоры? б) Мар ми тодомы Иеффай но Анна сярысь?

⁴ Кызьы адӟиське, Иеговалы кыл сётӥськомы ке, сое одно ик быдэстоно. Со, кызьы ми учкиськомы кыл сётонъёсмы шоры, Инмарен кусыпъёсмы вылын шӧдӥське. Давид гожтӥз: «Кузё-Инмарлэн гурезь йылаз кин тубоз яке Солэн дун-чылкыт интыяз кин султоз?» Собере ачиз ик валэктӥз, Инмарлэн гурезь йылаз тубоз шуыса со, кин кыл сётыкуз уг ӧрекчаськы (Пс. 23:3, 4). Тодамы ваёмы Иеффаез но Аннаез. Мар карыны соос кылзэс сётӥзы? Капчи вал-а соослы сётэм кылзэс быдэстыны?

СООС СЁТЭМ КЫЛЗЭС БЫДЭСТӤЗЫ

5. Мар карыны кылзэ сётӥз Иеффай но мар луиз собере?

⁵ Иеффай быдэстӥз аслэсьтыз сётэм кылзэ, кудзэ со аммон калыкен ожмаськыны мынон азяз Иеговалы сётӥз. Аммон калык ӝикатыса, курадӟытыса возиз Инмарлэсь калыксэ (Суд. 10:7—9). Иеффайлэн туж потэ вал вормемез со калыкез, соин ик со, Инмарез оскытыса, солы кылзэ сётӥз: «Аммон калыкез мынам киулам сётӥд ке, Аммон музъемысь вормонэн берытскыкум, мынам пумитам юртэлэн капкатӥз кин нырысь потоз, со Кузё-Инмарлы сётэмын луоз». Мар луиз собере? Аммон калык вормемын вал. Но Иеффай вормонэн бертыку, солэн пумитаз потӥз яратоно нылыз. Ӵапак сое Иеффай Иеговалы сётоно луиз (Суд. 11:30—34). Мар кароно вал нылызлы, атаезлэсь сётэм кылзэ быдэстон понна?

6. а) Капчи-а вал Иеффайлы но солэн нылызлы Инмарлы сётэм кылэз быдэстыны? б) Мар верамын Кыкетӥ Законын 23:21, 23 но Псалтирьын 14:4 кыл сётонъёс сярысь?

⁶ Иеффай сётэм кылзэ быдэстыны мед быгатоз шуыса, солэн нылызлы быдэс улонзэ скиния бордын Иеговалы ужаны-тыршыны кулэ вал. Луоз-а вераны, Иеффай малпаськытэк кылзэ сётӥз шуыса? Уз, малы ке шуоно со тодэ вал, солэн пумитаз нылыз но потыны быгатэ шуыса. Озьы ке но, куке сётэм кылзэ быдэстоно луиз, Иеффайлы но, нылызлы но туж секыт вал. Нылзэ адӟем бераз Иеффай, вылысьтыз дӥськутсэ кесьыса, шуиз: «Тон монэ погыртӥд». Солэн нылыз бӧрдӥз, семья кылдытыны уз быгаты шуыса. Малы? Иеффайлэн пиез ӧй вал, нош со, одӥг гинэ нылыз, табере уг быгаты вал бызьыны но нылпи вордыны, кудъёсыз Иеффайлэсь выжызэ азьланьтысалзы но люкетсэ басьтысалзы. Озьы ке но, Иеффай но солэн нылыз понна валтӥсез вал мукетыз. Иеффай вераз: «Кузё-Инмар азьын ымме усьтӥ, табере сётэм кылылэсь куштӥськыны уг ни быгатӥськы». Нылыз солы соку ик шуиз: «Быдэсты ук сое, мае вераз тынад кылыд-ымыд Кузё-Инмар азьын» (Суд. 11:35—39). Иеффай но, нылыз но Инмарлы оскымон адямиос вал, соос ӧз но малпалэ Вылысь Инмарлы сётэм кыллэсь куштӥськыны, соос понна со капчи ӧй вал ке но. (Лыдӟы Кыкетӥ Законэз 23:21, 23; Псалтирез 14:4.)

7. а) Мар карыны Анна кылзэ сётӥз но малы? Кызьы Инмар солэн вӧсяськемезлы ответ сётӥз? б) Мар кароно вал Самуиллы, Анналэсь сётэм кылзэ быдэстон понна? (Учке сноскаез.)

⁷ Эшшо одӥгез адями, кудӥз Иеговалы сётэм кылзэ быдэстӥз,— со Анна. Анналэн сюлмыз туж куректӥз кык муген: со нылпи вайыны уг быгаты вал, но соин сэрен Феннана сое ӝоже уськытылӥз (1 Экс. 1:4—7, 10, 16). Анна Инмарлы вань кӧтӝожзэ вераз но кылзэ сётӥз: «Саваоф Кузё-Инмаре! Ляльчиедлэн ӝожомыса улэмез шоры учкид ке, монэ тодад вайид ке, Ас ляльчидэ ӧд ке вунэты, ляльчи кышномуртэдлы пи нуны сётӥд ке, соку мон сое вань улон даурез ӵожелы Кузё-Инмарлы сёто; йырси бордаз качы но уз йӧтӥськы» (1 Экс. 1:11)a. Инмар Анналэсь вӧсяськемзэ кылӥз но, Анна пи нуны вайиз, аслэсьтыз нырысетӥ пиналзэ. Макем со шумпотӥз! Но со Инмарлы сётэм кылзэ ӧз вунэты. Пизэ ваемез бере со шуиз: «Кузё-Инмарлэсь мон сое курыса басьтӥ» (1 Экс. 1:20).

8. а) Капчи-а вал Анналы сётэм кылзэ быдэстыны? б) Кызьы Давидлэн кылъёсыз, кудъёсыз гожтэмын 60-тӥ Псаломын, тодамы вайыто Анналэсь умой примерзэ?

⁸ Самуилэз нонтэмысь дугдытэмез бере ик — Самуиллы соку куинь-ньыль арес вал — Анна Инмарлы сётэм кылзэ быдэстӥз. Солэн йыраз ик ӧз лыкты мукет сямен лэсьтыны. Анна Самуилэз Илий священник доры нуиз, кудӥз Сӥломын скинияын ужаз-тыршиз, но вераз: «Та пие пумысен мон вӧсяськи, Кузё-Инмар мынэсьтым куронме быдэстӥз, мар мон Солэсь кури вал. Мон сое вань улон даурез ӵожелы Кузё-Инмар кие сётӥсько, Кузё-Инмарлы ужаса-тыршыса мед улоз» (1 Экс. 1:24—28). Библиын верамын, «Самуил, пинал пи, Кузё-Инмар азьын будӥз» шуыса (1 Экс. 2:21). Капчи-а вал Анналы сётэм кылзэ быдэстыны? Анна пизэ туж яратӥз ке но, со уг быгаты вал котькуд нунал соин артэ луыны. Кыӵе солэн потэ вал пизэ бордаз ӝиптэмез, соин шудэмез но сое будэтэмез! Солэн туж потэ вал адӟемез, кызьы будэ солэн пиез, но тодаз воземез солэсь пичи дырзэ. Озьы ке но, Анна ӧз жаля, Инмарлы кылзэ сётӥз шуыса. Солэн сюлмыз Иегова бордын шумпотэ вал (1 Экс. 2:1, 2; лыдӟы Псалтирез 60:2, 6, 9).

9. Кыӵе юанъёсты ми эскеромы та статьяын?

⁹ Кызьы ми адӟимы, Инмарлы сётэм кылъёсмес одно ик быдэстоно. Соин ик, ойдолэ эскеромы таӵе юанъёсты: мар сярысь ми, христианъёс, Инмарлы кыл сётыны быгатӥськомы? Но мар кароно луэ, сётэм кылмес быдэстон понна?

ИНМАРЛЫ СӤЗИСЬКЫКУ СЁТЭМ КЫЛ

10. Кыӵе кыл сётон христиан муртлэн улоназ самой кулэез луэ но мае со возьматэ?

¹⁰ Самой кулэ луись кыл сётон, кудзэ сётэ христиан мурт,— со аслэсьтыз улонзэ Иеговалы сӥзьыны кыл сётон. Малы озьы вераны луоз? Адями, ас понназ вӧсяськыса, кыл сётэ, мар гинэ медам луы, со Иеговалы вань улытозяз ужалоз-тыршоз шуыса. Кызьы вераз Иисус, сыӵе адями аслэсьтыз ачиз куштӥське но Инмарлы кыл сётэ нырысь ик Инмарлэсь эриксэ быдэсъяны (Матф. 16:24). Та дырысен со быдэсак Иеговалэн луэ (Рим. 14:8). Котькудӥзлы, кин сӥзиськыкуз кылзэ сётэ, учконо сётэм кылзы шоры озьы ик, кызьы со шоры псаломъёсты гожъясь учкиз, кудӥз гожтӥз: «Мыным вань ӟеч лэсьтэмъёсыз понна Кузё-Инмарлы маин берыктом? Кузё-Инмарлы сӥзиськонъёсме Солэн калыкез азьын быдэсто» (Пс. 115:3, 5).

11. Мае возьматэ тынад пылатӥськемед?

¹¹ Сӥзиськиды-а тӥ Иеговалы, но, сӥзиськемдэс возьматыса, вуын пылатӥськиды-а? Озьы ке, соку со туж умой! Пылатӥськыкуды тӥлесьтыд ваньмыз азьын юазы: «Валаськод-а тон, Инмарлы сӥзиськыса но пылатӥськыса, Иеговалэн Адӟись-Ивортӥсез луиськод шуыса но Инмарлэн организацияз пыриськод шуыса, кудӥныз со аслаз духеныз кивалтэ?» Та юанэн соглаш кариськыса, тӥ ватытэк верады, быдэсак Инмарлы сӥзиськиды но, солэн ужась-тыршисез луон понна, пылатӥськыны дась луиськоды шуыса. Макем тӥ Иеговаез шумпоттӥды!

12. а) Мае аслэсьтыд юаны луоз? б) Пётрлэн верамезъя, кыӵе сямъёсмес милемлы будэтоно?

¹² Нош пылатӥськон — со кутсконэз гинэ. Пылатӥськеммы бере ми тыршиськомы, Инмарлы оскымон кыльыса, ужаны-тыршыны но озьы возьматыны, ми солы сӥзиськемын шуыса. Соин ик умой луысал аслэсьтыд юаны: юнмазы-а мынам Иеговаен кусыпъёсы пылатӥськеме бере? Азьло кадь ик лулысь-сюлмысь мон солы ужасько-тыршисько-а? (Кол. 3:23). Ӵем-а мон вӧсяськисько? Лыдӟисько-а Библиез котькуд нунал? Уг кельтылӥськы-а кенешлэсь пумиськонъёссэ? Пыриськисько-а мон тодытон уже котьку, ку быгатӥсько? Яке кудаз ке удысын азьло кадь ик уг тыршиськы ни? Апостол Пётр валэктӥз, мар кароно, Инмарлы ужан-тыршонын мылкыдмы медаз сӥя шуыса. Со гожтӥз, милемлы осконмес, тодон-валанмес, чиданмес но Инмарлы оскымон луэммес будэтоно шуыса. (Лыдӟы 2 Пётрлэсь 1:5—8.)

13. Мае валаны кулэ солы, кин Иеговалы сӥзиськиз но пылатӥськиз?

¹³ Инмарлы сӥзиськыкумы сётэм кылмылэсь куштӥськыны уг луы. Кин ке жадиз ке Иеговалы ужаны-тыршыны яке солэн христиан мурт луэмез уг поты ни ке, со уг быгаты вераны, со ассэ Иеговалы ӧз сӥзьы вал но солэн пылатӥськемез зэмос ӧй вал шуысаb. Малы ке шуоно пылатӥськеменыз со котькинлы возьматӥз, ассэ быдэсак Инмарлы сӥзиз шуыса. Со секыт сьӧлыказ ке, Инмар азьын но кенеш азьын со кыл кутоз (Рим. 14:12). Ноку но эн лэзе, тӥляд яратонды, кудӥз кутсконаз вал, мед сӥялоз шуыса. Улэ озьы, Иисус тӥ сярысь но тазьы вераны мед быгатоз шуыса: «Тодӥсько тынэсьтыд ужъёстэ, яратондэ но, ужан-тыршондэ но, оскондэ но, чидандэ но тодӥсько. Тодӥсько сое но: кутсконаз сярысь, берло дыре тон бадӟымесьгес-вылӥесьгес ужъёс лэсьтӥськод» (Усьт. 2:4, 19). Юн мылкыд каре азьланяз но сӥзиськыкуды сётэм кылдыя улыны но озьы Иеговалэсь сюлэмзэ шумпоттыны.

КУЗПАЛЪЯСЬКЫКУ СЁТЭМ КЫЛ

14. Кыӵе кулэ луись кыл сётон адямилэн улоназ кыкетӥ интыын луэ но малы озьы вераны луоз?

¹⁴ Кыкетӥез кулэ луись кыл сётон, кудзэ адями сётыны быгатэ,— со кузпалъяськыку сётэм кыл. Малы озьы вераны луоз? Малы ке шуоно кузпалъяськон святой луэ. Кузпалъяськисьёс Инмар азьын но адямиос азьын кылзэс сёто ог-огзэс яратыны, гажаны, ог-огзы сярысь сюлмаськыны котьку, куке соос улозы «музъем вылын, огазеяськыса кузпалъяськонэн, кудзэ кылдытӥз Инмар». Куд-огъёсыз ӵапак та кылъёсыз уг верало ке но, соос озьы ик Инмар азьын кылзэс сёто. Собере соосты карт но кышно луо шуыса яло. Инмарлэн малпамезъя, соослэн кузпалъяськонзы вань улытозязы кыстӥськыны кулэ (Ул.-выл. 2:24; 1 Кор. 7:39). Кызьы вераз Иисус, «мае Инмар огазеяз», сое адями — карт но, кышно но, нокин мукетыз но — люкыны кулэ ӧвӧл. Соин ик кузпалъяськисьёслы валано, люкиськыны уг яра шуыса (Марк 10:9).

15. Малы христианъёс мукет сямен учко кузпалъяськон шоры?

¹⁵ Кузпалъяськон шектэм уг луы, малы ке шуоно огазе карисько кык тырбыдэстэм адямиос. Соин Библиын верамын: «Бызем-басьтэм муртъёс трос куректон-кайгуос чидано луозы» (1 Кор. 7:28). Жаляса верано луэ, та дуннеын тросэз адямиос кузпалъяськонэз уг дунъяло. Кузпалъёслэн кусыпъёссы сӧрисько ке, соос уг тыршо соосты тупатыны, соос куто но люкисько. Нош христианъёс озьы уг каро. Кузпалъяськыку сётэм кыллэсь куштӥськон Инмарез пӧям луэ, нош пӧяськисьёсты со адӟемпотостэм каре (Лев. 19:12; Мад. 6:16—19). Апостол Павел гожтӥз: «Кышнояськемын-а тон? — Люкиськон эн утча» (1 Кор. 7:27). Малы Павел озьы вераны быгатэ вал? Со тодэ вал, Иегова адӟемпотостэм каре шуыса, куке кин ке кузпалэныз люкиськыса, мукетыз доры кошке (Мал. 2:13—16, ВД).

16. Мар верамын Библиын люкиськон но люкиськытэк нимаз улон сярысь?

¹⁶ Иисус вераз, одӥг гинэ муг вань шуыса, малы адямиос люкиськыны быгато,— со азон-калгон сьӧлык, кудзэ янгыш луисьтэм кузпаллэн простить каремез уг поты (Матф. 19:9; Евр. 13:4). Нош мар вераны луоз люкиськытэк нимаз улон сярысь? Библиын верамын, озьы но улыны луоз шуыса. (Лыдӟы 1 Коринфъёслы 7:10, 11.) Но отын шонерак верамын ӧвӧл, кыӵе муг вань со понна. Озьы ке но, куд-ог христианъёс малпало, нимаз улыны соослэн мугзы вань шуыса, кылсярысь, соослэн кузпалзы зэмос кышкытлык вае улонзылы яке Инмарен кусыпъёссылы, туж лек ассэ возьыса яке зэмос йыбырттонлэсь куштӥськиськысаc.

17. Кызьы христиан кузпалъёс кусыпъёссэс юнматыны быгато?

¹⁷ Кузпалъёс, кудъёсызлэн кусыпъёссы сӧриськизы, тӧроослэсь визь-кенеш курыны быгато. Сыӵе учыре умой луоз, тӧроос нырысь юазы ке, кемалась-а ини соос «Мар со сыӵе зэмос яратон?» фильмез (ӟуч) учкизы но «Тӥляд семьяды шудо луыны быгатэ» брошюраез ӵош эскеризы. Малы? Малы ке шуоно со фильм но брошюра тодамы вайыто Инмарлэсь возетъёссэ, кудъёсыз трос адямиослы семьязэс юнматыны юрттӥзы. Тани мар вераз одӥг семья: «Куке ми та брошюраез эскерыны кутскимы, милям кусыпъёсмы эшшо но юнгес луизы». Нош одӥг сузэрмы, кудӥз 22 ар быземын вал ини но соос картэныз люкиськон калэ вуэмын вал ини, вераз: «Ми кыкнамы но пылатӥськем христианъёс вал, нош сямъёсмы туж пӧртэмесь вал. Та фильм ӵапак дырыз дыръя луиз! Табере милемлы капчи огкылысь улыны». Тӥ кузпалъяськемын ке, ноку но эн вунэтэ Иеговалэсь возетъёссэ. Соос юрттозы тӥледлы кузпалъяськыкуды сётэм кылдыя улыны но семьяяды шудо луыны.

ВАНЬ ДЫРЗЭС СЁТЫСА НИМЫСЬТЫЗ УЖАСЬ-ТЫРШИСЬЁСЛЭН СЁТЭМ КЫЛЗЫ

18, 19. а) Мар карыны нылпиоссылэсь мылкыдзэс ӝуто христиан луись анай-атайёс? б) Кызьы уло соос, кинъёс вань дырзэс сётыса нимысьтыз ужан-тыршонэ пырисько?

¹⁸ Адӟиды-а тӥ, мар эшшо огкадез вал на Иеффайлэн но Анналэн? Иеффайлэсь сётэм кылзэ быдэстон понна, солэн нылыз вань улонзэ скиния бордын нимысьтыз ужан-тыршонлы сӥзьыны кулэ вал. Озьы ик Анналэн Самуил пиез но. Соослэн зэмзэ ик шудо улонзы вал. Туннэ тросэз анай-атайёс нылпиоссылэсь мылкыдзэс ӝуто вань дырзэс сётыса ужась-тыршись луыны но вань кужымзэс солы сётыны. Анай-атайёс но нылпиос, кудъёсыз озьы лэсьто, ушъямон луо (Суд. 11:40; Пс. 109:3).

¹⁹ Али быдэс дунне вылын Иеговалэн Адӟись-Ивортӥсьёсыз пӧлысь нимысьтыз ужась-тыршисьёслэн дунневыл вынлыказы ог 67 000 адями. Куд-огъёсыз соос пӧлысь тыршо Вефильын, конгрессъёсты ортчытон юртъёсын яке библейской школаосты ортчытон юртъёсын, мукетъёсыз лэсьтӥськонын юрттӥсько, библейской школаосын дышето, нимысьтыз пионеръёс, миссионеръёс яке ёросэз чакласьёс луыса ужало-тыршо. Ваньзы соос кылзӥськон но ваньбур люкатэк улон сярысь кыл сётӥзы: соос соглаш кариськизы Иеговалэн организацияз котькыӵе ужез быдэсъяны, огшоры улыны но юатэк-вератэк мукет уже интыяськытэк улыны. Малы соосты вань дырзэс сётыса нимысьтыз ужась-тыршисьёс шуыса нимало? Соослы, огшоры адямиослы, нимысьтыз ужан-тыршон оскемын. Соос валало, кыӵе уж соослы оскемын, соин ик тыршо зӥбыт-востэм кыльыны но сётэм кылзэс быдэстыны.

20. Мар кароно милемлы «нуналлы быдэ» но малы?

²⁰ Вылӥын верам кыл сётонъёс пӧлысь кӧнязэ тӥ Инмарлы сётӥды — одӥгзэ, кыксэ яке куиньзэ ик? Веранэз ӧвӧл, тӥ валаськоды, туж умой малпаськыса, кыл сётоно шуыса, но кароно ваньзэ, мае быгатӥськоды, сое быдэстон понна (Мад. 20:25). Кин ке сётэм кылызлэсь куштӥськиз но ӧз быдэсты ке сое, секыт бервылъёсын пумиськоз (Екк. 5:5). Ойдолэ адӟем каромы псаломъёсты гожъясьлэсь, кудӥз гожтӥз: «Аслэсьтым сӥзиськонъёсме нуналлы быдэ быдэсъяса, Тынэсьтыд нимдэ пумтэм вапумъёс ӵоже кырӟаса данъяло»! (Пс. 60:9).