Иегова котькыӵе куректон-кайгуосмы дыръя асьмеды буйгатэ
«Котькыӵе куректон-кайгуосмы дыръя Со [котькыӵе буйгатсконлэн Инмарез] асьмеды буйгатэ» (2 КОР. 1:3, 4).
1, 2. Кызьы Иегова буйгатэ милемыз, шуг-секытъёсын пумиськыкумы, но кыӵе оскытон ми солэн Кылысьтыз шедьтыны быгатӥськомы?
ОДӤГ ПОЛ егит вын-агаймы, нималом сое Эдуардо, аслэсьтыз сюлмаськонъёссэ Стивен нимо кышнояськем тӧролы вераз, кудӥз трослы солэсь бадӟымгес вал. Эдуардо малпаськиз 1 Коринфъёслы 7:28 таӵе кылъёс вылын: «Бызем-басьтэм муртъёс трос куректон-кайгуос чидано луозы». Со юаз Стивенлэсь: «Кыӵе со куректон-кайгуос но, мон кышнояськи ке, мар кароно, соосты вормон понна?» Юанэзлы валэктон сётон азьын, Стивен Эдуардолэсь саклыксэ висъяз апостол Павеллэн мукет кылъёсызлы. Павел гожтӥз, Иегова «котькыӵе буйгатсконлэн Инмарез» луэ но «котькыӵе куректон-кайгуосмы дыръя Со асьмеды буйгатэ» шуыса (2 Кор. 1:3, 4).
2 Зэмзэ но, Иегова — яратӥсь Атай, кудӥз буйгатэ милемыз, шуг-секытъёсын пумиськыкумы. Тӥ тодӥськоды на, дыр, учыръёсты, куке Иегова буйгатылӥз тӥледыз яке кулэ луись визь-кенеш сётъяз аслаз Кылыз пыр. Ми оскыны быгатӥськомы, Иегова милемлы умойзэ гинэ сӥзе шуыса, озьы ик, кызьы со вашкала дыръёсы ужась-тыршисьёсызлы сӥзиз. (Лыдӟы Иеремиялэсь 29:11, 12.)
3. Кыӵе юанъёсты ми та статьяын эскеромы?
3 Ми тодӥськомы ке, мар бордысь шуг-секытъёсмы пото, милемлы капчигес соосты вормыны. Озьы ик луэ шуг-секытъёсын но, кудъёсыз кузпалъяськонэн герӟаськемын. Нош мар бордысь потыны быгато куректон-кайгуос, кудъёсыз сярысь вераз Павел? Инмарлэн кыӵе ужась-тыршисьёсызлэн примеръёссы, кызьы вашкала дыръёсысь, озьы ик асьме нуналъёсысь но, милемыз буйгатыны быгато? Та юанъёслы валэктонъёс юрттозы милемлы шуг-секытъёсмес вормыны.
«КУРЕКТОН-КАЙГУОС»
4, 5. Маин сэрен кузпалъёслэн куректон-кайгуоссы кылдыны быгато?
4 Нырысетӥ кышномуртэз кылдытэмез бере Иегова сое пиосмурт доры вайиз но, со солэн кышноез луиз. Собере Иегова шуиз: «Адями аслэсьтыз атайзэ, аслэсьтыз анайзэ кельтоз но кышноез борды лякиськоз: кыкназы одӥг лулмугор луозы» (Ул.-выл. 2:24). Вань адямиос тырбыдэстэмесь, соин ик паймонэз ӧвӧл, кузпалъяськемъёс шуг-секытъёсын пумисько шуыса (Рим. 3:23). Ӵем дыръя, быземез бере нылмуртлы картэз йыр луэ, нош анай-атаез уг ни. Инмар пиосмуртэз йыр карыса пуктӥз (1 Кор. 11:3). Куд-ог егит кузпалъёслы секыт таӵе воштӥськонъёслы дышыны. Озьы ке но, кызьы адӟиське Инмарлэн Кылысьтыз, кышнолы валаны кулэ, табере со картэзлэсь кылзӥськыны кулэ шуыса, нош анай-атаезлэсь ӧвӧл. Куддыръя капчи ӧвӧл огкыл шедьтыны выль ӵыжы-выжыосын. Со егит семьялы бадӟым шуг-секыт кылдытэ.
5 Мукет шуг-секытъёс кылдыны быгато, куке кышноез картэзлы вера, соослэн пиналзы вордӥськоз шуыса. Ӵем дыръя кузпалъёслэн шумпотонзы вылэ егит анайлэн но вордӥськоно нылпилэн тазалыксы сярысь сюлмаськон ватсаське на. Со сяна, пинал ваён но сое вордон трос коньдон кулэ каре. Семьяын пинал вордскем бере бадӟым воштӥськонъёс ортчо. Табере кышно трос дырзэ но саклыксэ висъя пиналэзлы. Со быдэсак со сярысь сюлмаськонэ вые. Соин сэрен тросэз картъёс асьсэды куштэмын шуыса шӧдо. Мукет ласянь учконо ке, картлэн но выль сюлмаськонъёсыз кылдо, малы ке шуоно табере солы, кышноез сяна, пиналэз сярысь но сюлмаськоно.
6—8. Кыӵе шӧдонъёссы луыны быгато кузпалъёслэн, кудъёсызлэн нылпи вайыны малпанзы уг быдэсмы?
6 Куддыръя кузпалъёс мукет шуг-секытъёсын но пумисько. Соослэн туж потэ пинал ваемзы, но уг быгато. Соин сэрен куд-ог кышноос туж куректо. Кызьы кузпалъяськон но пиналлэн вордскемез шуг-секытъёс ваё, озьы ик быдэсмымтэ малпанъёс но выль «куректон-кайгуос» вайыны быгато (Мад. 13:12). Вашкала дыръёсы туж возьыт вал, кышномурт пинал вайыны уг быгаты вал ке. Рахиль, Иаковлэн кышноез, кема дыр ӵоже пинал вайыны ӧз быгаты. Со туж куректӥз, апаезлэн нылпиосыз шоры учкыса (Ул.-выл. 30:1, 2). Миссионеръёслэсь, кудъёсыз ужало-тыршо со шаеръёсын, кытын семьяос трос нылпи вордо, ӵемысь юало, малы соослэн нылпиоссы ӧвӧл. Кузпалъёс лякытэн но ваньзэ валамон валэктыны тыршо ке но, куддыръя соослы верало: «Ми тӥ понна вӧсяськомы!»
7 Нош тани мар луиз Англиысь сузэрен, кудӥзлэн туж потэ вал нылпи ваемез, но уг быгаты вал. Куке со валаз, та дуннеын нылпи вайыны уз быгаты ни шуыса, туж ӝоже усиз. Соку соос картэныз вордос пинал басьтыны малпазы. Озьы ке но, со сузэрмес соку ик ӧз буйгаты. Со вера: «Мон тодӥсько вал: вордос пинал аслад кадь ӧвӧл».
8 Библиын верамын, христиан кышномурт «нылпи ваён пыр утиськоз» шуыса (1 Тим. 2:15). Но та кылъёс уг возьмато, нылпи ваён но сое вордон пырак улонэз басьтыны луонлык сёто шуыса. Соку мае соос возьмато? Нылпиосыз но юртъерез сярысь сюлмаськон кышномуртэз супыльтыса ветлонлэсь но котьмаин тунсыкъяськонлэсь уте (1 Тим. 5:13). Нош семьяын кылдэм шуг-секытъёслэсь со сое уг утьы.
9. Кыӵе бадӟым кайгуэн пумиськыны быгато кузпалъяськемъёс?
9 Семьяын кылдэм шуг-секытъёс пӧлын вань на соиз но, кудӥз соку ик йыре уг лыкты. Со матысь адямилэн кулэмез. Трос адямиослы бадӟым кайгу вайиз яратоно картсылэн яке кышнозылэн кулэмез. Соос ӧз но малпалэ, дыр, Бадӟым куректон вуэмлэсь азьло собыдӟа кайгуэз чидано луозы шуыса. Христианъёс юн оско, Иисус кулэмъёсты улӟытыса султытоз шуыса. Со соослы куректонзэс чиданы юрттэ (Иоанн 5:28, 29). Библиын трос кыл сётонъёс вань, кудъёсыз буйгато но юртто соослы, кинъёс шуг-секытъёсын пумисько. Нош али ойдолэ эскеромы кӧня ке примеръёсты, кытысь адӟомы, кызьы Иегова аслэсьтыз ужась-тыршисьёссэ буйгатылӥз.
Кытысь буйгатскон шедьтоно, кузпалмы кулӥз ке? (Учке 9-тӥ но 12-тӥ абзацъёсты.)
КУРЕКТОНЭН ПУМИСЬКЫКУ БУЙГАТСКОН
10. Кызьы Анна буйгатскон шедьтӥз? (Учке статья кутсконысь суредэз.)
10 Елканалэн яратоно Анна кышноез нимысьтыз шуг-секытэн пумиськиз. Со нылпи вайыны уг быгаты вал, нош Феннаналэн, Елканалэн кыкетӥ кышноезлэн, нылпиосыз трос вал. (Лыдӟы 1 Эксэйлыкъёслэсь 1:4—7.) Феннана арлы быдэ «Аннаез ӝоже уськытылӥз». Соин сэрен Анна юн куректӥз но курадӟиз. Буйгатскон шедьтыны тыршыса, Анна вань сюлэм куректонъёссэ Инмарлы вӧсяськыса вераз. Библиын верамын, со «Кузё-Инмар азьын кема вӧсяськыса» улӥз шуыса. Оскиз-а со, Инмар солэсь куронзэ быдэстоз шуыса? Оскиз, луоз. Вӧсяськемез бере Анналэн «азьло кадь ымнырыз ӝож тусъем ӧй ни вал» (1 Экс. 1:12, 17, 18). Со оскиськиз Иеговалы но оскиз, со солы нылпи сётоз яке кызьы ке мукет амалэн солы юрттоз шуыса.
11. Кызьы вӧсяськон милемыз буйгатыны быгатэ?
11 Ми тырбыдэстэмесь но Шайтанлэн дуннеяз улӥськомы, соин ик шуг-секытъёсын пумиськиськомы (1 Иоанн 5:19). Нош макем шумпотоно тодыны, Иегова «котькыӵе буйгатсконлэн Инмарез» луэ шуыса! Ми шуг-секытъёсмес вормыны быгатомы, солы юрттэт курыса вӧсяськимы ке. Анна, Иеговалы вӧсяськыса, вань сюлэмшугзэ кисьтӥз но юрттэт куриз. Озьы ик милемлы но, вӧсяськонын шӧдонъёсмы сярысь вераса гинэ, тырмыт уг луы. Милемлы тэльмырыса куроно Инмарлэсь юрттэтсэ но верано солы вань сюлэмшугъяськонъёсмес ӟырдыт, сюлмысь вӧсяськонын (Флп. 4:6, 7).
12. Мар юрттӥз Анна нимо палкышнолы шумпотыса улыны?
12 Нылпиосмы ӧвӧлэн яке матысь адямимес ыштэмен юн куректыкумы но, ми буйгатскон шедьтыны быгатӥськомы. Иисус улон нуналъёсысь Анна нимо пророк, быземез бере сизьым ар ортчыса, палкышно кылиз. Библиын номыр верамын ӧвӧл, солэн нылпиосыз вал шуыса. Лукалэсь 2:37 верамын, Анналы 84 арес вал ке но, «со храм дорысь кошкылытэк, уй но нунал визяса, вӧсяськыса, Инмарлы ужаса-тыршыса улӥз» шуыса. Иеговалы ужаса-тыршыса, Анна шумпотон басьтӥз но буйгатскон шедьтӥз.
13. Кызьы оскымон эшъёсмы милемыз буйгатыны быгато, куке ӵыжы-выжыосмы ӝоже уськыто?
13 Вын-агайёс но сузэр-апайёс пӧлысь, кудъёсыныз ми матысь кусыпъёс возиськомы, оскымон эшъёс шедьтыны луэ (Мад. 18:25). Пола тодаз вае, макем ӝож вал солы, куке вить арес дыръяз солэн анаез Иеговалы ужамысь-тыршемысь дугдӥз. Пола понна со вакыт туж секыт вал. Солы туж юрттӥз пионер луыса ужась-тыршись Энн нимо сузэр, кудӥз солы саклык висъяз но Инмарен кусыпъёссэ юнматыны юрттӥз. «Энн милям ӵыжы-выжымы ӧй вал ке но, солэн яратонэз туж юнматӥз монэ,— шуэ Пола.— Солы луыса мон Иегова дорысь ӧй палэнскы». Пола туннэ ке но Инмарлы оскымон ужа-тырше. Со туж шумпотэ, солэн анаез выльысь Иеговалы ужаны-тыршыны кутскиз шуыса. Энн но туж шумпотэ, малы ке шуоно со Полалы юрттыны быгатӥз Иеговалы оскымон кыльыны.
14. Кыӵе пайда ми басьтӥськомы, куке мукетъёссэ буйгатӥськомы?
14 Ми яратыса мукетъёсыз сярысь сюлмаськиськомы ке, со юрттэ милемлы асьмелы но урод малпанъёслэсь мозмытскыны. Сузэр-апайёс, быземъёсыз но, бызьымтэосыз но, ӟеч иворез мукет адямиослы вераса, туж бадӟым шумпотон басьто, малы ке шуоно соос валало, озьы Инмарен ӵош ужало шуыса. Инмарлэсь эриксэ быдэсъяса, соослэн сое данъямзы потэ. Куд-огъёсызлы ужан-тыршон эмъюм интые луиз. Веранэз ӧвӧл, ми сюлмаськиськомы ке вын-агайёсмы, сузэр-апайёсмы сярысь но со адямиос сярысь, кудъёссэ ми пумитаськомы, со милемыз огъя оскисьёсынымы матэ каре (Флп. 2:4). Та удысын апостол Павел милемлы туж умой адӟем карон кельтӥз. Фессалоникаысь христианъёслы со «нунызэ нонтӥсь анай кадь» луиз. Озьы ик со соосты визьнодаз но буйгатылӥз, ассэ возиз озьы, «кызьы атай аслаз вордэм нылпиосыныз ассэ возе». (Лыдӟы 1 Фессалоникаослы 2:7, 11, 12.)
СЕМЬЯЫН БУЙГАТСКОН
15. Кин кыл кутэ нылпиосты дышетон понна?
15 Кызьы ми кенешысь семьяосты буйгатыны быгатӥськомы? Куддыръя соос, кинъёс кемалась ик ӧз пылатӥське на, быгатӥсь ивортӥсьёсты юрттыны куро соослы нылпиоссэс зэмлыклы дышетыны яке нылпиосынызы Библиез дышетыны. Библия верамъя, анай-атайёс нылпиоссэс дышетыны но будэтыны кулэ (Мад. 23:22; Еф. 6:1—4). Нош куд-ог учыръёсы анай-атайёслы одно ик юрттэт кулэ луэ. Соос туж дунъяло сое. Озьы ке но, анай-атайёс асьсэос кыл куто нылпиоссэс дышетон понна. Соослы туж кулэ котькуд нунал нылпиосынызы вераськыны.
16. Мае тодамы возёно, нылпиосын Библиез дышетыкумы?
16 Анай-атайёс кинэ ке куро ке нылпиосынызы Библиез дышетыны, соку христиан муртлы, кудӥз нылпиосынызы дышетоз, кулэ ӧвӧл ассэ анай-атай кадь возьыны. Куддыръя Адӟись-Ивортӥсез куро дышетыны нылпиен, кудӥзлэн анаез но атаез зэмлыкен уг тунсыкъясько. Сыӵе учыре вын-агайлы яке сузэр-апайлы тодазы возёно, со солы анай но, атай но ӧвӧл шуыса. Умой луысал Библиез дышетыны нылпилэн дораз, куке вӧзаз анаез яке атаез, яке мукет быдэ вуэм христиан. Яке дышетоно кытын ке мукет тупась интыын, кытын адямиос вань. Соку нокин но умойтэм малпанэ уз вуы. Нош дыр ортчемъя, анай-атайёс асьсэос быгатозы, дыр, нылпиоссэс Иегова сярысь дышетыны, озьы Инмарен сётэм ужзэс быдэстыны.
17. Кызьы нылпиос ӵыжы-выжыоссэс буйгатыны быгато?
17 Нылпиос, озьы ик егитъёс но, кудъёсыз тыршо зэмос Инмарез яратыны но солэсь кылзӥськыны, асьсэлэсь ӵыжы-выжыоссэс буйгатыны но мылкыдзэс ӝутыны быгато. Кызьы? Кылсярысь, асьсэлэсь анай-атайёссэс гажаса, озьы ик соослы ужъёсын но коньдонэн юрттыса. Со сяна, нылпиос Иеговалы оскымон кылё ке, со быдэс семьязэс юнматэ. Тани мар вераз Ламех, кудӥз Ву тудӟонлэсь азьло улӥз но Иеговалы ужаз-тыршиз, Ной пиез сярысь: «Асьмеос ужаку, Кузё-Инмарен каргам музъемез ас киынымы утялтыкумы, со асьмеды буйгатоз». Та азьпалзэ ивортон быдэсмиз, куке Инмар каргам кылзэ берен басьтӥз (Ул.-выл. 5:29; 8:21). Туннэ но нылпиос, ӵыжы-выжыоссылы шуг-секытъёссэс вормыны юрттыса, соосты буйгатыны быгато. Нош азьланяз соос юрттыны быгатозы соослы куректон пыр потыны, кудӥз Ву тудӟонлэсь кышкытгес луоз.
18. Мар юрттоз милемлы котькыӵе шуг-секытъёсмы дыръя оскымон кыльыны?
18 Вӧсяськон, Библиысь примеръёс вылын малпаськон но Инмарлэн калыкеныз матысь кусыпъёс возён трос миллион адямиослы шуг-секытъёссы дыръя буйгатскон шедьтыны юрттэ. (Лыдӟы Псалтирез 144:18, 19.) Кыӵе гинэ шуг-секытъёсын медам пумиське, Иегова гинэ милемыз зэмзэ ик буйгатыны быгатэ шуыса тодамы возимы ке, со юрттоз милемлы оскымон кыльыны.