Дунъялэ сое, мае Инмар сётэ

1, 2. а) Кыӵе духовной ваньбур кузьмаз милемлы Иегова? б) Мае ми эскеромы та статьяын?

БЫДЭС Дуннеын Иеговалэсь узырез нокин но ӧвӧл (1 Пар. 29:11, 12). Ӟеч Атай кадь, со жалятэк сётэ аслэсьтыз духовной узырлыксэ котькудӥзлы, кин вала, макем со дуно луэ. Ми туж тау кариськомы солы, со милемлы духовной ваньбур кузьмаз шуыса! Сыӵе ваньбур пӧлы пыре: 1) Инмарлэн Эксэйлыкез, 2) ужан-тыршонмы, кудӥз уте милемыз но мукет адямиосты, но 3) Библиысь дуно зэмлыкъёс. Нош ми сак ӧм луэ ке, со ваньбур милемлы дуно уз поты ни но ми со понна тау каремысь дугдыны быгатомы. Озьы медаз луы шуыса, милемлы котьку тыршоно соосты дунъяны но чакланы, духовной ваньбурез яратонмы медаз сӥя шуыса. Иисус вераз: «Кытын тӥляд ваньбурды, отын ик луоз сюлэмды но» (Лука 12:34).

² Та статьяын ми эскеромы, кызьы ми Эксэйлык понна, ужан-тыршон понна но зэмлык понна тау каронмес будэтыны но сое утьыны быгатомы. Тырше малпаськыны со вылын, мар юрттоз тӥледлы эшшо но юнгес яратыны духовной ваньбурез.

ИНМАРЛЭН ЭКСЭЙЛЫКЕЗ ДУНО МАРӞАНЛЫ УКША

3. Мар кариз Иисуслэн мадёнысьтыз вузчи, туж дуно марӟанэз басьтон понна? (Учке статья кутсконысь суредэз.)

³ Лыдӟы Матфейлэсь 13:45, 46. Иисус марӟан басьтыны утчась вузчи сярысь мадён вераз. Трос аръёс ӵоже солэн киыз пыр трос марӟан ортчиз, вылды, кудзэ со басьтэ но вуза вал. Но тани, вузчи паймымон чебер марӟан шедьтӥз, кудӥз шоры учкыса гинэ, солэн сюлмыз шумпотыса жугиськыны кутске вал. Сое басьтон понна, вузчи маиз вань, ваньзэ вузаз. Макем вылӥ со сое дунъяз!

4. Ми дунъяськомы ке Инмарлэсь Эксэйлыксэ, мар карыны со милесьтым мылкыдмес ӝутоз?

⁴ Малы ми дышетскыны быгатӥськомы та мадёнысь? Инмарлэн Эксэйлыкез со дуно марӟанлы укша. Ми дунъяськомы ке сое озьы ик, кызьы вузчи марӟанэз дунъяз, соку ми дась луомы куштӥськыны ваньмызлэсь, мар милемлы люкетысал Эксэйлыклэн кивалтэмез улсын улыны. (Лыдӟы Марклэсь 10:28—30.) Ойдолэ эскеромы кык адямиослэсь примеръёссэс, кудъёсыз озьы ик лэсьтӥзы.

5. Мар карыны дась вал Закхей Инмарлэн Эксэйлыкез понна?

⁵ Закхей выт бичасьёслэн йырзы вал. Со, адямиосты пӧяса, соослэсь коньдонзэс талалляз. Озьы со аслыз узырлык люказ (Лука 19:1—9). Нош куке со пӧяськись адями Иисуслэсь Эксэйлык сярысь иворзэ кылӥз, со валаз, макем со дуно, но соку ик воштӥськон понна вамышъёс лэсьтыны кутскиз. Закхей Иисуслы шуиз: «Ӝыны ваньбурме кураськисьёслы сёто, кинэ ке маин ке ӝоже уськытӥськем ке, пунэмме ньыль полэс берыкто». Со чик жалятэк ваньбурезлэсь куштӥськиз, кудзэ со пӧяськыса люказ, но тырмостэм сямзэ вормыны быгатӥз.

6. Мар кариз Роуз, Эксэйлыклэн кивалтэмез улсын улон понна, но малы?

⁶ Кӧня ке ар талэсь азьло одӥг кышномурт, нималомы сое Роуз, Эксэйлык сярысь ӟеч иворез кылӥз. Со лесбиянка вал но гомосексуалистъёслэн правозы понна нюръяськись организациен кивалтэ вал. Библиез дышетыса, Роуз адӟиз, Инмарлэн Эксэйлыкез дунъяны луонтэм шуыса. Со валаз: солы быдэс улонзэ воштоно (1 Кор. 6:9, 10). Роуз аслэсьтыз ужзэ куштоно кариськиз но эшеныз кырсь кусып воземысь дугдӥз. 2009-тӥ арын со пылатӥськиз, нош вуоно араз пионер луыса ужаны-тыршыны кутскиз. Иеговаез но Эксэйлыкез яратонэз солэн юнгес вал лулмугорызлэн кулэяськонъёсыз сярысь (Марк 12:29, 30).

7. Мар ӝокатыны быгатэ Эксэйлыкез яратонмес?

⁷ Асьмеос пӧлысь тросэз улоназы бадӟым воштӥськонъёс лэсьтӥзы, Инмар Эксэйлыклэн кивалтэмез улсын улон понна (Рим. 12:2). Но таин ужмы ӧз быры. Азьланяз но чаклано, ваньбур люкан мылкыд, кырсь мыл потонъёс яке мар ке но мукетыз Эксэйлыкез яратонмес медаз ӝокатэ шуыса (Мад. 4:23; Матф. 5:27—29). Инмар Эксэйлыкез яратонмы медаз кысы шуыса, Иегова милемлы кузьмаз на эшшо мае ке но, мар дунъяны луонтэм ваньбур пӧлы пыре.

ДУНО УЖАН-ТЫРШОНМЫ

8. а) Малы Павел ужан-тыршонмес ӵошатӥз ваньбурен, кудӥз «горд сюйлэсь лэсьтэм сосудъёс... пушкын... возиське»? б) Кызьы Павел возьматӥз, ужаны-тыршыны яратэ шуыса?

⁸ Иисус Христос милемлы уж сётӥз Инмар Эксэйлык сярысь ӟеч иворез адямиослы вераны но соосты зэмлыклы дышетыны (Матф. 28:19, 20). Апостол Павел вала вал, макем дуно луэ со оскем уж. «Выль Сӥзёнлэсь ужан-тыршонзэ» со ваньбурен нимаз, кудӥз «горд сюйлэсь лэсьтэм сосудъёс... пушкын... возиське» (2 Кор. 4:7; 1 Тим. 1:12). Милемыз, тырбыдэстэм адямиосты, горд сюйлэсь лэсьтэм огшоры сосудъёсын ӵошатыны луэ. Нош ивор, кудзэ ми вераськомы, пырак улон басьтыны юрттэ милемлы но, милемыз кылзӥсьёслы но. Тӥни малы Павел ӟеч иворез пӧртэм амалъёсын вера вал. Со шуиз: «Тае мон Ӟеч Иворез вӧлмытон понна... лэсьтӥсько» (1 Кор. 9:23). Зэм, Павел яратӥз ужаны-тыршыны, соин ик со, кужымзэ жалятэк, дышетскисьёсты дасяз. (Лыдӟы Римъёслы 1:14, 15; 2 Тимофейлы 4:2.) Ужаны-тыршыны яратонэз юрттӥз солы туж лек уйылон-уллянъёсты чиданы (1 Фес. 2:2). Кызьы ми возьматыны быгатӥськомы, Павел сямен ик, ужан-тыршонэз яратӥськомы шуыса?

9. Кызьы ми возьматыны быгатӥськомы, ужаны-тыршыны яратӥськомы шуыса?

⁹ Ужан-тыршонэз яратэмез Павеллэсь мылкыдзэ ӝутэ вал адямиосын Эксэйлык сярысь вераськыны котьку, ку сыӵе луонлык кылдэ вал. Апостолъёс но нырысетӥ даурысь христианъёс сямен, ми но ӟеч иворез вераськомы мар ке карыку, трос калыко интыосын но коркась корка ветлыса (Ап. уж. 5:42; 20:20). Луэ ке, ми Инмарлы тросгес ужаны тыршиськомы, кылсярысь, пионер яке юрттӥсь пионер луыса. Со сяна, ми быгатӥськомы мукет кылэз дышетыны яке мыныны отчы, кытын ивортӥсьёс уг тырмо,— асьме шаерамы ик яке кунгож сьӧры но (Ап. уж. 16:9, 10).

10. Кызьы Иегова Айринлэсь тыршемзэ бакель кариз?

¹⁰ Эскеромы Огазеяськем Штатъёсысь бызьымтэ Айрин сузэрмылэсь примерзэ. Солэн бадӟым мылкыдыз вал шаеразы лыктэм ӟуч кылын вераськись адямиослы ӟеч иворез вераны. 1993-тӥ арын, куке со Нью-Йоркысь ӟуч группае потӥз, отын 20 пала гинэ ивортӥсьёс вал. Айрин 20 арлэсь кема ини ӟуч кылын вераськись адямиослы мылысь-кыдысь ӟеч иворез вера. Со шуэ: «Мон уг быгатӥськы вераны, ӟуч кылэз туж умой тодӥсько шуыса». Озьы ке но, Иегова бакель кариз та сузэрлэсь но мукет ивортӥсьёслэсь мылысь-кыдысь тыршемзэс. Али Нью-Йоркын куать ӟуч кенеш. Дас вить адями, кудъёсыныз Айрин Библиез дышетӥз, пылатӥськизы но пӧртэм сямен Иеговалы ужаны-тыршыны кутскизы: кин ке но Вефильын, кин ке но пионер, кин ке но тӧро луыса. Айрин вера: «Зэм, мон быгатысал мукет ужпумъёс пуктыны но тыршыны соосты быдэстыны, но одӥгез но соос пӧлысь мыным собыдӟа шумпотон ӧй вайысал». Адӟиське, Айрин ужаны-тыршыны луонлыксэ дуноен лыдъя шуыса.

11. Кыӵе пайда вае, уйылон-уллянъёс шоры учкытэк, ӟеч иворез вераммы?

¹¹ Ми ужаны-тыршыны луонлыкмес дуноен лыдъяськомы ке, апостол Павел сямен, уйылон-уллянъёс шоры учкытэк, ӟеч иворез вераны азьланьтомы (Ап. уж. 14:19—22). 1930-тӥ аръёсы но 1940-тӥ аръёслэн кутсконаз Огазеяськем Штатъёсысь вын-агайёсмы туж лек уйылон-уллянъёсын пумиськылӥзы. Озьы ке но, Павел сямен ик, соос Инмарлы оскымон кылизы но ужамысь-тыршемысь ӧз дугдэ. Ӟеч иворез вераны правомы понна вын-агайёсмы трос пол судъёсын нюръяськизы. 1943-тӥ арын Нейтан Норр агаймы аслаз речаз США-ысь Верховной судын одӥгез вормон сярысь вераз. Со вераз, вын-агайёсмы ӟеч иворез тодытэмысь дугдысалзы ке, судын одӥгез но уж эскеремын ӧй луысал шуыса; нош судъёсын эскериськем ужъёслы луыса, ивортӥсьёс трос шаеръёсын номырлэсь кышкатэк ӟеч иворез вераны право басьтӥзы. Мукет шаеръёсын но Иеговалэн Адӟись-Ивортӥсьёсыз юн кылизы. Со юрттӥз соослы судъёсын вормыны. Зэмзэ но, ужан-тыршонмес яратӥмы ке, ми ум сётэ уйылӥсь-уллясьёслы милемыз вормыны.

12. Кызьы тӥ ужан-тыршонды шоры учкиськоды?

¹² Ужан-тыршонмы Иеговалэн дунъяны луонтэм кузьымез луэ шуыса лыдъяськомы ке, отчётэ гожтоно часъёсмы сярысь гинэ ум малпаське. Нош, вань кужыммес поныса, тыршомы Ӟеч Иворез калык доры вуттыны (Ап. уж. 20:24; 2 Тим. 4:5). Нош кыӵе зэмлыкъёслы ми адямиосты дышетӥськомы? Ойдолэ вераськомы эшшо одӥг дуно мар ке сярысь, мар Инмарен сётэм ваньбур пӧлы пыре.

ДУХОВНОЙ ЗЭМЛЫК ВОЗЁН ШЫКЫСМЫ

13, 14. Кыӵе «шыкыс» сярысь вераз Иисус Матфейлэсь 13:52? Кызьы ми отчы ваньбур люканы быгатӥськомы?

¹³ Инмарен сётэм ваньбур пӧлы пыро на духовной зэмлыкъёс но. Иегова — зэмлыклэн Инмарез (2 Экс. 7:28; Пс. 30:6). Ӟеч Атай сямен, со жалятэк усьтэ аслэсьтыз зэмлыкъёссэ ваньмызлы, кинъёс сое ярато. Зэмлыкез нырысетӥзэ кылэм бере ми духовной ваньбур люканы кутскимы: Библиез но со вылэ пыкиськыса гожтэм публикациосты лыдӟыны, конгрессъёсы но кенешлэн пумиськонъёсаз ветлыны. Дыр ортчыса, милям озьы нимаськись «шыкысмы» кылдӥз, кудаз ми, Иисус верамъя, вужъёссэ но выльёссэ зэмлыкъёсты возиськомы. (Лыдӟы Матфейлэсь 13:52.) Ми тыршимы ке со зэмлыкъёсты дуно ваньбурез кадь утчаны, Иегова милемлы соосты люканы юрттоз. (Лыдӟы Мадёнъёсты 2:4—7.) Нош кызьы соосты шедьтоно?

¹⁴ Милемлы ялан сак эскероно Библиез но публикациосмес. Со юрттоз милемлы выльёссэ зэмлыкъёсты шедьтыны (Иис. Н. 1:8, 9; Пс. 1:2, 3). Нырысетӥяз «Возьмаськон башняын», кудзэ поттӥзы 1879-тӥ арын пӧсьтолэзе, зэмлык жаг турын пӧлын будӥсь сяськаен ӵошатэмын вал. Сое шедьтон понна, адямилы сак луоно но трос кужым пононо. Нош сяськаез шедьтыса, дугдоно ӧвӧл, утчано на мукетъёссэ но. Озьы ик, одӥг зэмлыкез шедьтыса, мукет зэмлыкъёсты утчамысь дугдоно ӧвӧл. Милям юн мылкыдмы луыны кулэ шыкысамы Инмарлэсь зэмлыкъёссэ люканы.

15. Малы куд-ог зэмлыкъёсты вуж зэмлыкъёс шуыса ниманы луоз но кудъёсыз соос пӧлысь тӥледлы тужгес но дуно пото?

¹⁵ Куд-ог зэмлыкъёсты, кудъёсыз милемлы туж дуно луизы, ми тодӥмы Инмарлэн калыкеныз кусып возьыны кутскем бере ик. Соин соосты вуж зэмлыкъёс шуыса ниманы луоз. Кыӵе со зэмлыкъёс? Ми тодӥмы, Иегова милям Кылдытӥсьмы луэ шуыса но солэн адямиос пумысен малпанэз вань шуыса. Озьы ик ми тодӥмы, Инмар аслэсьтыз Пизэ сётӥз, со ми понна кулыса, милемыз сьӧлыклэсь но кулонлэсь мед мозмытоз шуыса. Озьы Инмар милемыз яратэмзэ возьматӥз. Со сяна, ми тодӥмы на, Инмарлэн Эксэйлыкез вань курадӟонъёсты быдтоз шуыса но милям осконмы вань шуыса пырак улыны дуннеын, кудаз номыр но милемлы шудо луыны уз люкеты (Иоанн 3:16; Усьт. 4:11; 21:3, 4).

16. Мар милемлы кароно, кыӵе ке зэмлыкез выль сямен валэкто ке?

¹⁶ Куддыръя кудъёссэ ке азьпалзэ ивортыса веранъёсты яке Библиысь кылбуръёсты валанмы воштӥське. Куке мае ке выль сямен валэкто, милемлы дыр висъяны кулэ сое рос-прос эскерон но со вылын малпаськон понна (Ап. уж. 17:11; 1 Тим. 4:15). Милемлы валтӥсь воштӥськонъёсты гинэ адӟоно ӧвӧл, нош пыр-поч адӟыны тыршоно, маин пӧртэм луэ вылез валан вужезлэсь. Соку со зэмлык одно ик милям шыкысамы кылёз. Малы сыӵе тыршеммы юнме уз луы?

17, 18. Кызьы милемлы святой дух юрттэ?

¹⁷ Иисус Христос вераз, Инмарлэн духез милемлы тодамы вайытоз шуыса со зэмлыкъёсты, кудъёссэ ми куке но тодӥмы вал (Иоанн 14:25, 26). Кызьы Инмарлэн духез, ӟеч иворез веракумы, милемлы юрттыны быгатоз? Тани мар луиз 1970-тӥ арын Питер нимо вын-агаен. Соку солы 19 арес вал, но со соку гинэ Великобританиысь Вефильын ужаны-тыршыны кутскиз. Коркась корка ӟеч иворез вераса ветлыкуз, ӧсэз усьтӥз тушо пиосмурт, кудӥзлы витьтон арес пала вал. Питер юаз солэсь, потэ-а солэн Библиез умойгес валамез шуыса. Юамзэ кылыса, пиосмурт туж паймиз но вераз, та коркан иудей раввинъёс уло шуыса. Питерез эскерон понна, раввин юаз: «Вера ай, пие, кыӵе кылын Данииллэн книгаез гожтэмын вал?» — «Куд-ог люкетъёсыз арамей кылын»,— шуиз Питер. «Раввин туж паймемын вал, мон сое тодӥсько шуыса. Мон ачим но туж пайми! Кытысь мон сое тодӥсько? Дорам бертыса, мон азьвыл толэзьёс понна „Возьмаськон башня“ но „Сайкалэ!“ журналъёсты эскерыса потӥ но шедьтӥ статьяез, кудаз верамын вал, Даниил книгалэн куд-ог люкетъёсыз арамей кылын гожтэмын вал шуыса»a. Кызьы адӟиське та учырысь, святой дух милемлы юрттыны быгатэ тодамы вайыны сое, мае ми азьло лыдӟимы но шыкысамы кельтӥмы (Лука 12:11, 12; 21:13—15).

¹⁸ Ми Иеговаен сётэм визьлыкез дунъяськомы ке, милям вань сюлмысьтымы потоз шыкысамы духовной зэмлыкъёс люкаммы. Со зэмлыкъёсты яратонмес юнматыса но соос понна тау каронмес будэтыса, ми эшшо но умойгес быгатомы ӟеч иворез вераны.

УТЕ СОЕ, МАЕ ИНМАР СЁТЭ

19. Малы милемлы Инмарен сётэм ваньбурез утьыны кулэ?

¹⁹ Шайтан но солэн дуннеез милесьтым мылкыдмес быдтыны тыршо Инмарен сётэм ваньбурез утчаны, кудӥз сярысь ми та статьяын вераськимы. Ми саклыкмес ыштӥмы ке, капчиен сётскыны быгатомы бадӟым уждунэн уж сярысь, майбыр улон сярысь яке мукетъёссэ узырлыкенымы паймытон сярысь малпанъёслы. Апостол Иоанн гожтӥз, таиз дунне но солэн ортчыт кужмо кулэ каронъёсыз ортчо-быро шуыса (1 Иоанн 2:15—17). Соин ик милемлы вань кужмысьтымы тыршоно Инмарен сётэм ваньбурез яратыны но со понна тау карыны.

20. Мар карыны тӥляд юн мылкыдды вань, Инмарен сётэм ваньбурдэс утён понна?

²⁰ Дась луэ куштӥськыны ваньмызлэсь, мар тӥледлы люкетыны быгатэ Инмарлэсь Эксэйлыксэ ӟырдыт яратыны. Котьку мылысь-кыдысь ужан-тыршонэ пыриське но дунъялэ сое. Вань кужымдэс понэ, выльёссэ зэмлыкъёсты утчан понна. Озьы тӥ инме ваньбур дасялоды, кытчы лушкаськись но матаз уг мыны, кудзэ кей но уг сиы, «уго кытын тӥляд ваньбурды, отын ик луоз сюлэмды но» (Лука 12:33, 34).