«Тодӥсько... улӟыса султон дыръя, улӟыса султоз шуыса»

1. Малы оске вал Марфа? (Учке статья кутсконысь суредэз.)

ЛАЗАРЬ кулэмен, Марфа туж юн кайгыре вал. Мар сое буйгатыны быгатысал? Марфалы вазиськыса, Иисус, солэн матысь эшез но Дышетӥсез, кылзэ сётӥз: «Тынад братэд улӟыса султоз». Иисуслэн кылъёсыз Марфаез быдэсак буйгатыны ӧз быгатэ ке но, Марфа соин соглаш луиз но вераз: «Тодӥсько, берпум нуналэ, улӟыса султон дыръя, улӟыса султоз шуыса» (Иоанн 11:20—24). Марфа оске вал, азьланяз озьы ик луоз шуыса. Собере Иисус паймымон уж лэсьтӥз: со нуналэ ик со Лазарез улӟытӥз.

2. Малы милемлы тыршоно, осконмы Марфалэн кадь мед луоз шуыса?

² Ми ум возьмаське, Иисус яке Иегова али милемлы сыӵе ик паймымон уж лэсьтозы шуыса. Но оскиськомы-а ми, Марфа сямен ик, азьланяз матысь адямиосмес, кудъёсыз кулӥзы ини, выльысь адӟомы шуыса? Оло нош, тӥ ыштӥды кузпалдэс, анайдэс яке атайдэс, песянайдэс яке песятайдэс. Яке тӥ куректӥськоды нылпидэс ыштэмен сэрен. Тӥ туж возьмаськоды, луоз, со дырез, куке нош ик матысь адямидэс ӟыгыртыны быгатоды, солэсь куаразэ яке серекъямзэ кылоды. Туж шумпотоно, милям но мугмы вань шуыса Марфа сямен вераны: «Тодӥсько, матысь адямие улӟыса султоз шуыса!» Озьы ке но, котькуд христиан муртлы малпаськоно, малы со улӟытыса султытонлы оске.

3, 4. Кызьы Иисуслэн паймымон ужъёсыз Марфалэсь улӟытонлы осконзэ юнматӥзы, вылды?

³ Марфа, кудӥз улӥз Иерусалим вӧзын, ӧз адӟы, дыр, кызьы Иисус Галилеяысь Наин кар дорын палкышнолэсь пизэ улӟытӥз. Но со кылӥз, луоз, со учырез. Озьы ик со кылӥз, луоз, Иисус Иаирлэсь нылзэ улӟытӥз шуыса. Солэн коркасьтыз адямиос ныллэсь кулэмзэ тодӥзы. Нош Иисус кулэм нылмуртэз китӥз кутӥз но солы вераз: «Нылаш! Султы». Нылаш соку ик султӥз (Лука 7:11—17; 8:41, 42, 49—55). Марфа но Мария тодо вал Иисуслэсь висисьёсты эмъяны быгатэмзэ. Соос малпало вал, Иисус вазьгес лыктысал ке, Лазарь ӧй кулысал шуыса. Нош али со кулэмын ини. Мар табере? Тодӥськоды на-а, Марфа оске вал, Лазарь азьланяз, «берпум нуналэ», улӟыса султоз шуыса? Малы со солы оске вал? Но малы ми но оскыны быгатӥськомы, азьланяз Инмар кулэмъёсты улӟытоз шуыса но соос пӧлын милям но матысьёсмы луозы шуыса?

⁴ Милям трос мугъёсмы вань солы оскыны. Ойдолэ эскеромы соос пӧлысь куд-огъёссэ. Со мугъёсты эскерыса, тӥ выль сямен учкоды, вылды, Библиысь куд-ог кылбуръёс шоры. Азьвыл тӥ уд малпаське вал, дыр, со кылбуръёс улӟытонлы осконэз юнмато шуыса.

УЧЫРЪЁС, КУДЪЁСЫЗ ОСКОНЭЗ ЮНМАТО

5. Мар юрттӥз Марфалы осконзэ юнматыны, Лазарь улӟыса султоз шуыса?

⁵ Тодамы ваёмы Марфалэсь кылъёссэ. Со ӧз шуы: «Улӟыса султоз, дыр». Со вераз: «Тодӥсько, улӟыса султоз шуыса». Марфа улӟытонлы оске вал, малы ке шуоно со тодэ вал паймымон ужъёс сярысь, кудъёсыз Иисуслэн ужаны-тыршыны кутскемезлэсь азьло ик лэсьтӥсько вал ини. Соос сярысь со пичи дыръяз кылӥз, луоз,— ас дораз но сӥнагогаын. Ойдолэ эскеромы Библиысь улӟытон сярысь куинь учыръёсты, кудъёссэ Марфа тодӥз, луоз.

6. Кыӵе паймымон уж сярысь тодэ вал Марфа?

⁶ Нырысетӥез учыр вал Илия пророк улон вакытэ, кудӥзлы Инмар паймымон ужъёс лэсьтыны кужым сётӥз. Финикияысь ярдурын сылӥсь Сарепта карын куанер палкышно улӥз, кудӥз пророкез ас дораз пыртӥз но куно кариз. Инмар паймымон уж лэсьтӥз: палкышнолэн пызез но вӧйыз ӧз быре. Солы луыса ачиз палкышно но солэн пиез улэп кылизы (3 Экс. 17:8—16). Берлогес пияш висьыны усиз но кулӥз. Илия палкышнолы юрттыны лыктӥз. Со пияшлэн мугорыз борды йӧтӥськиз но вӧсяськиз: «Кузё-Инмаре! Та пияшлэн лулыз ас пушказ мед берытскысал». Озьы ик луиз. Инмар Илияез кылӥз, но пияш улӟиз. Та нырысетӥез улӟытон учыр, кудӥз сярысь Библиын верамын. (Лыдӟы 3 Эксэйлыкъёслэсь 17:17—24.) Марфа со паймымон уж сярысь тодэ вал.

7, 8. а) Вералэ, мар кариз Елисей, Сонамысь кышномуртэз буйгатон понна. б) Мар вера Иегова сярысь Елисейлэн паймымон ужез?

⁷ Кыкетӥез улӟытон учыр, кудӥз сярысь Библиын гожтэмын, Елисей пророк улон дыръя луиз. Сонамын улӥз узыр кышномурт, кудӥз Елисей пророкез туж куно кариз. Инмар со кышномуртэз но солэсь пересь картсэ бакель кариз: соослэн пизы вордӥськиз. Кӧня ке ар ортчыса, пизы кулӥз. Малпалэ ай, макем бадӟым куректон вал со! Картэзлэсь куриськыса, Елисеен пумиськон вылысь, кышномурт 30 иськеме Кармил гурезь доры мынӥз. Елисей Гиезий нимо медозэ Сонаме ыстӥз, ачиз но бӧрсяз мынӥз. Гиезий пияшез улӟытыны ӧз быгаты. Собере Сонаме Елисеен ӵош кайгырись анаез вуиз (4 Экс. 4:8—31).

⁸ Елисей кулэм мурт доры лыктӥз но вӧсяськыны кутскиз. Но тани паймымон уж луиз — пияш улӟиз! Макем шумпотӥз солэн анаез! (Лыдӟы 4 Эксэйлыкъёслэсь 4:32—37.) Со Анналэсь кылъёссэ тодаз вайиз, луоз. Анна нырысь нылпи вайыны уг быгаты вал, нош собере со Самуил нимо пизэ вайиз но сое скиния бордын ужаны-тыршыны сётӥз. Вӧсяськыкуз Анна вераз вал, Иегова шайгуэ куштэ но ачиз ик отысь султытэ шуыса (1 Экс. 2:6). Иегова пияшез шайгуысь султытӥз шуыса вераны луоз. Озьы со возьматӥз, со адямиез улӟытыны быгатэ шуыса.

9. Вералэ, кызьы ортчиз Библиын верам куинетӥез улӟытыса султытон.

⁹ Та учыр сяна, вал на мукетыз но Елисеен герӟаськем учыр. Со 50 арлэсь кема пророк луыса ужаз-тыршиз, нош собере секыт висьыны усиз но кулӥз. Одӥг пол со палъёсын, кытын Елисей ватэмын вал, израиль пиосмуртъёс адямиез ватыны нуо вал. Ваньбурез таласьёслэсь лыктэмзэс адӟыса, соос ватоно муртсэс Елисейлэн шайгуаз куштӥзы но пегӟизы (со дырлы пророклэн лыосыз гинэ кылемын ни вал). Библиын со кулэм мурт сярысь верамын: «Усьыкуз Елисейлэн лыосыз борды йӧтӥськиз, соку со улӟиз но пыд йылаз султӥз» (4 Экс. 13:14, 20, 21). Малпалэ ай, макем бадӟым пайда вайизы Марфалы улӟытон сярысь та учыръёс: со оске вал, кулон Инмарлэн ки улаз возиське шуыса. Нош табере малпаське: тӥледлы пайда ваё-а та учыръёс? Соос оскондэс юнмато, вылды, Иеговалэн кужымез мертаны луонтэм шуыса.

НЫРЫСЕТӤ ДАУРЫН УЛӞЫТЫСА СУЛТЫТОН

10. Мар луиз Тавифа нимо христиан кышномуртэн но мар кариз Пётр?

¹⁰ Христиан Грек Гожтэмъёсын но верамын со сярысь, кызьы Инмарлэн оскымон ужась-тыршисьёсыз кулэмъёсты улӟытъязы. Ми верамы ини, кызьы Иисус Иаирлэсь нылзэ но Наин карысь палкышнолэсь пизэ улӟытӥз. Эшшо одӥг муртэ улӟытӥз на апостол Пётр. Со улӟытӥз Тавифа, яке грек кылын Дорка, нимо христиан кышномуртэз. Пётр лыктӥз отчы, кытын солэн мугорыз кылле вал, но вӧсяськыны кутскиз. Собере со вераз: «Тавифа! Султы!» Тавифа соку ик султӥз, но Пётр мукет христианъёсты ӧтиз возьматыны, со улэп шуыса. Со бере «тросэз Кузё-Инмарлы оскыны кутскизы». Та выль дышетскисьёс мукетъёсызлы вераны быгатӥзы Христос сярысь ӟеч иворез но Иеговалэн адямиез улӟытыны быгатэмез сярысь (Ап. уж. 9:36—42).

11. Лукалэн верамезъя, мар луиз одӥг пияшен? Кызьы та учыр мукетъёсыз вылын шӧдӥськиз?

¹¹ Мукетыз улӟытыса султытон вал Троадаын, туала Турциялэн уйпал но шундыпуксёнпал висказ. Одӥг коркалэн бадӟым палаз христианъёслэн пумиськонзы ортче вал. Отын вал апостол Павел но. Со лыктэмъёсты уйшорозь дышетыса улӥз. Кылзӥсьёс пӧлын Евтих нимо пияш вал, кудӥз укно дурын пукиз. Со умме усиз но куинетӥ этажысь ум йылтӥз музэ усиз. Евтих доры нырысь ик бызьыса лыктӥз, луоз, Лука, кудӥз эмъясь вал. Со учкиз сое но вераз: Евтих йырсазьзэ гинэ ӧз ышты — со кулӥз! Павел васькиз но кулэм пияшез ӟыгыртӥз. Собере Павел ваньзэс паймытӥз, пияш улэп шуыса вераменыз. Макем паймизы, луоз, тае адӟисьёс! Соослэн син азязы Евтих кулӥз, нош собере сое улӟытӥзы. Соос «ваньзы туж шумпотӥзы»! (Ап. уж. 20:7—12).

ЮН ОСКОН

12, 13. Кыӵе юанъёс кылдо, улӟытон сярысь учыръёсты эскерыса?

¹² Эскерем учыръёс юртто милемлы Марфа сямен ик оскыны. Ми оскиськомы, Инмармылэн но Кылдытӥсьмылэн кулэм адямиез улӟытыны кужымез вань шуыса. Тунсыко соиз: куке Иегова адямиосты улӟытъяз, отын одӥгез ке но оскымон ужась-тыршисез вал, кылсярысь, Илия, Иисус яке Пётр. Нош мар вераны луоз со вакытъёс сярысь, куке паймымон ужъёс ӧз лэсьтӥське? Быгато вал-а оскыны Инмарлэн со вакытъёсы улӥсь ужась-тыршисьёсыз, азьланяз Инмар кулэмъёсты улӟытоз шуыса? Оско вал-а соос, Марфа кадь ик, кудӥз вераз: «Тодӥсько, [Лазарь] берпум нуналэ, улӟыса султон дыръя, улӟыса султоз шуыса»? Малы со солы оске вал но малы тӥ но солы оскыны быгатӥськоды?

¹³ Инмарлэн Кылаз трос кылбуръёс вань, кудъёсыз возьмато, Иеговалэн оскымон ужась-тыршисьёсыз азьланяз луоно улӟытон сярысь котьку тодӥзы шуыса. Эскеромы со кылбуръёс пӧлысь куд-огъёссэ.

14. Мае ми тодӥськомы улӟытон сярысь Авраамен луэм учырысь?

¹⁴ Тодамы ваёмы, мар карыны косӥз Инмар Авраамез Исаак пиеныз, кудӥзлэсь вордӥськемзэ со туж кема возьмаз. Иегова вераз: «Басьты аслэсьтыд одӥг гинэ яратоно Исаак пидэ но... сое тылын сутӥськись курбонлы сёт» (Ул.-выл. 22:2). Малпалэ ай, кыӵе шӧдонъёсыз кылдӥзы Авраамлэн, та кылъёсты кылыса. Иегова кылзэ сётӥз вал, вань калыкъёс солэн кидысэз пыр бакель каремын луозы шуыса (Ул.-выл. 13:14—16; 18:18; Рим. 4:17, 18). Со сяна, Иегова вераз, Авраамез Исаак пыр бакель кароз шуыса (Ул.-выл. 21:12). Нош кызьы Авраам бакель каремын луоз, Исаак курбонлы сётэмын луиз ке? Святой духлэн кивалтэмез улсын Павел валэктӥз: Авраам оске вал, Инмар Исаакез кулэмысь улӟытыны быгатоз шуыса. (Лыдӟы Еврейёслы 11:17—19.) Но Библиын верамын ӧвӧл, Авраам возьма вал, пиез, кулэмез бере кӧня ке час, нунал яке арня ортчыса, улӟытэмын луоз ини шуыса. Авраамлы тодмо ӧй вал, ку Инмар солы пизэ берыктоз. Но со оске вал, Иегова сое одно ик берыктоз шуыса.

15. Малы оске вал Иов?

¹⁵ Шонерлыко Иов но улӟытон дырез возьмаз. Со вала вал, корам писпу гинэ но пушйыса выльысь будыны быгатэ шуыса. Но адямиен озьы ӧвӧл (Иов 14:7—12; 19:25—27). Кулэм бераз адями уг быгаты шайгуысь ӝутскыны но выльысь улыны (2 Экс. 12:23; Пс. 88:49). Но со уг вера, Инмар адямиез улӟытыны уг быгаты шуыса. Иов оске вал: Иегова сое тупатэм дыре тодаз ваёз. (Лыдӟы Иов книгаез 14:13—15.) Но со уг тоды вал, ку со тупатэм дыр вуоз. Иов оске вал, Кылдытӥсьлэн, кудӥз адямиослы улон кузьмаз, сое улӟытыны кужымез вань шуыса но со одно ик сое улӟытоз шуыса.

16. Кыӵе кылъёсын кылчин Даниилэз юнматӥз?

¹⁶ Иеговалэн эшшо одӥгез оскымон ужась-тыршисез, кудӥз сярысь ми Еврей Гожтэмъёсысь тодӥськомы, вал Даниил. Трос аръёс ӵоже со Инмарлы оскымон ужаз-тыршиз, но Иегова солы юрттылӥз. Одӥг пол кылчин Даниилэз «Инмарлы яратыны ярамон мурт» шуыса нимаз но вераз солы: «Каньыллык тыныд сӥзисько; юнматскы, юнматскы!» (Дан. 9:22, 23; 10:11, 18, 19).

17, 18. Мар сӥземын вал Данииллы?

¹⁷ Данииллы 100 арес котыр вал ини, но со малпаськылӥз, луоз, мар возьма сое азьланяз. Даниил улӟытэмын луоз-а? Одно ик! Даниил книгалэн пумаз гожтэмын кылъёс, кудъёсыныз Инмар пророкезлы вазиськиз: «Нош тон мын шутэтскы, буйгалод» (Дан. 12:13). Мӧйы Даниил тодэ вал, кулэмъёс «шутэтско» шуыса, малы ке шуоно шайгуын «малпаськон но, тодон-валан но, визьлык но ӧвӧл» (Екк. 9:10). Ӝоген Даниил но отчы вуыны кулэ вал ини. Но со понна ваньмыз быремын ӧй вал на — Инмар солы туж умой азьпал улон сӥзиз.

¹⁸ Данииллы верамын вал: «Люкеттэ басьтон понна нуналъёс бырон азьын султод». Инмар солы нуналзэ но, дырзэ но ӧз вера. Даниил вала вал, со кулоз но шайгуын «шутэтскоз» шуыса. Нош «люкетсэ басьтон понна» со султыны кулэ шуыса верам возьматэ вал: азьланяз — «нуналъёс бырон азьын» — со улӟытэмын луыны кулэ.

19, 20. а) Кызьы эскерем учыръёс герӟаськемын Марфалэн кылъёсыныз, кудъёссэ со Иисуслы вераз? б) Мар сярысь ми вераськомы вуонояз статьяын?

¹⁹ Озьыен, Марфалэн мугъёсыз вал оскыны, Лазарь «берпум нуналэ, улӟыса султон дыръя, улӟыса султоз шуыса». Иеговалэн Данииллы сётэм кылыз но оскон, кудӥз Марфалэн кылъёсысьтыз адӟиське, туннэ но христианъёсты юнмато. Улӟытыса султытон одно ик луоз.

²⁰ Ми эскеримы учыръёсты, кудъёсыз возьмато, улӟытыса султытон одно ик луоз шуыса,— кулэм адямиос зэмзэ ик выльысь улыны быгатозы! Вашкала дыръёсы Инмарлы ужась-тыршись пиосмуртъёс но кышномуртъёс азьланяз улӟытонлы оско вал. Вань-а милям мугъёсмы оскыны, улӟытон одно ик луоз шуыса, со сярысь туж кемалась верамын вал ке но? Та юанлы валэктон юрттоз милемлы, Марфа сямен ик, улӟытыса султытонэз ӵыдытэк возьманы. Нош ку со луоз? Ойдолэ вераськомы со сярысь вуонояз статьяын.