Кулэ-а мае ке сётыны Инмарлы, кудӥзлэн сотэк но ваньмыз вань?
«Инмармы, ми Тонэ, Тынэсьтыд быдӟымлыко нимдэ данъяськомы, ушъяськомы» (1 ПАР. 29:13).
1, 2. Кызьы Иегова шырыт луэмзэ возьматэ?
ИЕГОВА — шырыт сямо Инмар. Ваньзэ, мармы милям вань, Инмар сётӥз. Музъем вылысь вань азвесь но зарни, озьы ик инкуазь ресурсъёс но, ваньмыз со Иеговалэн. Со шырыт сямо луэмен, музъем вылын улыны луэ (Пс. 103:13—15; Агг. 2:8). Библиын трос учыръёс гожтэмын, куке Иегова паймымон амалэн уже кутылӥз сое, маиз солэн вань, аслаз ужась-тыршисьёсызлы юрттон понна.
2 Кылсярысь, Иегова 40 ар ӵоже Израиль калыклы манна но ву сётъяз, куке со луоё кыр дуннеетӥ ветлӥз (Пот. 16:35). Библиын верамын, «номырлы но соос ӟудыса ӧз улэ» шуыса (Неем. 9:20, 21). Елисей пророк пыр но Иегова мае ке туж паймымонзэ лэсьтӥз. Инмарлы оскымон палкышнолэн ӧжыт гинэ вӧйыз вал. Нош бератаз солэн сомында вӧйыз луиз, сое вузаса, со пунэмъёссэ тыриз, но солы но пиосызлы улыны тырмыт коньдонзы кылиз на (4 Экс. 4:1—7). Иеговалы луыса Иисус паймымон амалэн быгатӥз адямиосты сюдыны но карыны озьы, соослэн коньдонзы мед луоз шуыса (Матф. 15:35—38; 17:27).
3. Мае ми эскеромы та статьяын?
3 Иегова аслаз кылдытэмъёсызлы юрттыны быгатэ, но со понна солэн ваньмыз вань. Озьы ке но, солэн потэ, ужась-тыршисьёсыз ваньбуренызы организациезлэсь ужзэ азинтыны мед юрттозы шуыса (Пот. 36:3—7; лыдӟе Мадёнъёсты 3:9). Малы Иеговалэн потэ, ми сыӵе амалэн солы тау кареммес мед возьматомы шуыса? Кызьы вашкала дыръёсысь Иеговалэн ужась-тыршисьёсыз ваньбурен юрттылӥзы соослы, кинъёс Иеговалэн калыказ кулэ луись ужез нуизы? Но кызьы Иеговалэн организациез уже кутэ кузьмам коньдонэз? Ойдолэ эскеромы та юанъёсты.
МАЛЫ МИЛЯМ ИЕГОВАЛЫ МАЕ КЕ СЁТЭММЫ ПОТЭ?
4. Малы ми Иеговалэн организациезлы ваньбурен юрттӥськиськомы?
4 Милям Иеговалы мае ке сётэммы потэ, малы ке шуоно ми сое яратӥськомы но милям солы тау кареммес возьматэммы потэ. Малпалэ ай, мар гинэ Иегова ми понна ӧз лэсьты! Куке Давид эксэй валэктӥз, мар кулэ луоз скинияез пуктонлы, со вераз: ваньзэ, мармы милям вань, Иегова сётӥз, но ми солы сётыны быгатӥськомы сое гинэ, мае солэсь басьтӥмы. (Лыдӟе 1 Паралипоменонэз 29:11—14.)
5. Кызьы Библия возьматэ, Иеговалы мае ке сётэммы, солы йыбырттон пӧлы пыре шуыса?
5 Озьы ик, ми Иеговалы мае ке сётӥськомы, малы ке шуоно со Инмарлы йыбырттон пӧлы пыре. Одӥг пол апостол Иоаннлы адӟон сётэмын вал, кудаз Инмарлэн инмысь ужась-тыршисьёсыз Инмарез таӵе кылъёсын данъязы: «Тон, Кузё-Инмаре, данлыкез, сӥ-данэз, кужымез басьтыны ярась, уго Тон ваньзэ кылдытӥд, ваньмыз Тынад эрикедъя улэ-вылэ, кылдытэмын» (Усьт. 4:11). Тӥ соглаш луоды, дыр, Иегова зэмзэ но вань данлыкез но сӥ-данэз басьтыны ярась шуыса. Соин ик милям солы ваньзэ умойзэ сётэммы потэ. Моисей пыр Иегова Израиль калыкез араз куинь пол праздникъёсы люкаськыны косӥз. Но израиль пиослы верамын вал: «Одӥг адями но Кузё-Инмар азе буш киын лыктыны кулэ ӧвӧл» (К. Зак. 16:16). Туннэ но Инмарлы йыбырттонмы герӟаськемын солы мае ке сётонэн. Инмарлы мае ке мылысь-кыдысь сётыса, ми возьматӥськомы, солэсь организацизэ дунъяськомы но солы юрттӥськеммы потэ шуыса.
6. Кыӵе пайда вае, ми мукетъёсызлы мае ке сётӥськомы ке? (Учке статья кутсконысь туспуктэмъёсты.)
6 Куке ми ум возьмаське, милемлы гинэ мае ке сётозы шуыса, нош асьмеос жалятэк мукетъёсызлы сётӥськомы, со милемыз умойгес каре. (Лыдӟе Мадёнъёсты 29:21.) Пуктэ ай син азяды, макем шумпото анай-атайёс, куке нылпизы солы аслыз маке басьтыны сётэм коньдонэн соослы кузьым басьтэ. Яке малпалэ таӵе югдур сярысь: пилэн яке ныллэн, кудӥз пионер луыса ужа-тырше но анай-атаеныз улэ, анай-атаезлы коньдон сётэмез потэ улон инты понна тырыны но сиён-юон басьтыны. Анай-атайёс сое уг возьмало, луоз, но соос шумпотозы, вылды, нылпиоссылэн юрттэмзылы. Малы ке шуоно озьы нылпиоссы соослы тау каремзэс возьматыны быгатозы ваньмыз понна, мар каро соослы анай-атайёссы. Озьы ик Иегова но тодэ: куке ми сётӥськомы сое, мар милемлы дуно потэ, со милемлы пайда вае.
МАЕ ВАШКАЛА ДЫРЪЁСЫ ИЕГОВАЛЫ СЁТЪЯЗЫ
7, 8. Кызьы Иеговалэн вашкала дыръёсысь ужась-тыршисьёсыз ваньбуренызы юртто вал: а) нимысьтыз ужъёсты быдэстыны? б) Инмарлэн калыкезлы ужан-тыршонзэ азьланьтыны?
7 Библиын трос учыръёс гожтэмын, куке Иеговалэн ужась-тыршисьёсыз Иеговалы кузьымъёс-саламъёс сётъязы. Куддыръя озьы соос юрттӥзы кыӵе ке нимысьтыз ужез быдэстыны. Кылсярысь, Моисей куриз калыкез кузьымъёс-саламъёс вайыны скинияез лэсьтыны, нош Давид — Инмар корка пуктыны (Пот. 35:5; 1 Пар. 29:5—9). Иоас эксэй кивалтыку, священникъёс люкам коньдонэз Иеговалэсь корказэ тупатонэ кутӥзы (4 Экс. 12:4, 5). Нырысетӥ даурын христианъёс тодӥзы, Иудеяын вын-агайёссы но сузэр-апайёссы, сютэм ар вуэмен, ёрмыса улыны кутскизы шуыса. Соин ик соос отчы юрттэт ыстыны малпазы, «котькудӥз аслаз луонлыкезъя» (Ап. уж. 11:27—30).
8 Мукет учыръёсы Иеговалэн ужась-тыршисьёсыз ваньбуренызы юрттӥзы соослы, кинъёс Инмарлэн калыказ кулэ луись ужъёсты нуо вал. Моисейлэн законэзъя, улыослы-бечеослы музъем люкет сёто вал, нош левитъёслы — уг. Соин ик израиль калык левитъёслы ялан ваньбуреныз юрттэ вал, соослы скиния бордын ужаны-тыршыны номыр медаз люкеты шуыса (Лыд. 18:21). Берлогес Иисус но солэн апостолъёсыз туж шумпотӥзы кышномуртъёслэн шырыт сямо луэмзылы, кудъёсыз соослы «асьсэлэн ваньбуренызы юрттӥськыса улӥзы» (Лука 8:1—3).
9. Кытысь ваньбур потто вал Иеговалэн ужась-тыршисьёсыз вашкала дыръёсы, Инмарлы кузьымъёс-саламъёс сётон понна?
9 Кытысь ваньбур потто вал адямиос вашкала дыръёсы, Инмарлы кузьымъёс-саламъёс сётон понна? Кылсярысь, скиния пуктон понна, израиль калык сётӥз сое, мае Египетысь сьӧраз вайиз (Пот. 3:21, 22; 35:22—24). Нырысетӥ даурын куд-ог христианъёс асьсэлэсь коркаоссэс, музъемъёссэс но мукет улэм-вылэмзэс вузазы но поттэм коньдонзэс апостолъёслы сётӥзы. Нош апостолъёс «ӟудыса улӥсьёслы сое сётылӥзы-люкылӥзы» (Ап. уж. 4:34, 35). Мукет христианъёс уждунзылэсь оглюкетсэ нимаз поныса кельтылӥзы, ялан Инмарлы сётыны мед быгатозы шуыса (1 Кор. 16:2). Озьы котькудӥз мар ке но сётыны быгатэ вал — узырез но, туж куанерез но (Лука 21:1—4).
МАЕ МИ АСЬМЕ ДЫРЪЁСЫ ИЕГОВАЛЫ СЁТӤСЬКОМЫ
10, 11. а) Кызьы ми адӟем карыны быгатӥськомы Иеговалэн шырыт сямо ужась-тыршисьёсызлэсь, кудъёсыз вашкала дыръёсы улӥзы? б) Кызьы тӥ учкиськоды Иеговалэн организациезлы юрттӥськыны луонлык шоры?
10 Туннэ но асьмеос коньдонэн юрттӥськиськомы. Кылсярысь, коньдон кулэ, куке кенештылэсь Эксэйлык юртсэ тупатоно луэ яке выльзэ пуктоно; филиаллэсь юртсэ выльдоно яке конгресс ортчытонэн герӟаськем тыриськонъёсты тыроно. Куддыръя ми кылӥськомы ялонъёс, вын-агайёсмылы юрттэт кулэ шуыса, кудъёсыз инкуазь шимучыръёсын сэрен шуге-леке сюризы. Со сяна, коньдон сётыса, ми юрттыны быгатӥськомы соослы, кинъёс дунневыл валтӥсь кивалтонниын но быдэс дунне вылысь филиалъёсын тыршо. Милям шырыт сямо луэммы юрттэ миссионеръёслы, нимысьтыз пионеръёслы но ёросэз чакласьёслы ужан-тыршонзэс азьланьтыны. Озьы ик, тӥляд кенешты ужпум кутӥз, луоз, кӧня ке коньдон ыстыны, быдэс дунне вылын конгрессъёсты ортчытон юртъёсты но Эксэйлык юртъёсты пуктон понна.
11 Котькудӥз асьме пӧлысь юрттӥськыны быгатэ Иеговалэн организациезлы ужез нуыны, кудзэ со быдэстэ та дуннелэн берпуметӥ нуналъёсаз. Ӵем дыръя кин кӧня коньдон сётэ, нокин уг тоды: ми коньдон понӥськомы нимысьтыз дасям ящикъёсы, кудъёсыз сыло пумиськонъёсмес ортчытъян интыосын. Ми малпаны быгатӥськомы, трос коньдон сётыны ум быгатӥське шуыса. Нош трос коньдон пичиен-пичиен люкаське, одӥг пол трос коньдон сётыса уг. Вын-агайёсмы, туж куанеръёсыз но, адӟем каро Македониын улӥсь христианъёслэсь, кудъёсыз сярысь Библиын верамын, соос «туж куанер-начар улонзы дыръя но шырыт сямзэс» возьматӥзы но «сюлмысьтызы куризы бичам юрттэтсэс басьтыны» шуыса (2 Кор. 8:1—4).
12. Мар каре Иеговалэн организациез, сётэм коньдонэз тужгес но пайдаё уже кутон понна?
12 Ужпум кутыкуз, кытчы но кӧня кузьмам коньдонэз кутоно, Кивалтӥсь кенеш оскиськымон но визьмо луыны тырше. Вын-агайёс вӧсяськыса ваньмыз сярысь пыр-поч малпасько (Матф. 24:45). Соос коньдонэз юнме уг ширъяло, нош сомында гинэ куто, кӧня кутыны луэ (Лука 14:28). Вашкала дыръёсы кузьмам коньдон понна кыл кутӥсьёс чаклало вал, коньдонэз отчы гинэ мед кутозы шуыса, малы со сётэмын вал. Кылсярысь, Ездра, Иерусалиме берытскыкуз, вае вал зарни, азвесь но мукет дуно арбериосты — Персиялэн эксэезлэсь кузьымзэ. Со кузьымлэсь дунзэ туала коньдонэ берыктоно ке, со 100 миллион долларлэсь тросгес луоз. Сюрес кышкыт вал, но сьӧраз басьтэм дуно арбериоссэ тушмонъёс таланы быгатысалзы. Ездра со кузьым шоры, Иеговалы кузьым шоры кадь, учке вал, соин ик со кариз ваньзэ, мае быгатӥз, сое утён но Иерусалиме вуттон понна (Езд. 8:24—34). Апостол Павел Иудеяын ёрмыса улӥсь вын-агайёслы юрттэт бичаз. Со чаклаз, Иудеяе коньдон вуттӥсьёс, «Кузё-Инмар азьын гинэ ӧвӧл, адямиос азьын но» коньдонзэс ӧрекчаськытэк мед радъялозы шуыса. (Лыдӟе 2 Коринфъёслы 8:18—21.) Соин ик туннэ но Иеговалэн организацияз сётэм коньдонэз туж эскериськыса уже куто, кызьы кутӥзы Ездра но Павел улон нуналъёсы.
13. Малы кемалась ӧвӧл Иеговалэн организацияз воштӥськонъёс ортчытэмын вал?
13 Куке семьяын коньдон басьтэмлэсь тросгес кошкыны кутске яке семья огшоры улыны ужпум кутэ, азьланяз Иеговалы тросгес ужан-тыршон понна, сыӵе семьяослы куддыръя эскероно луэ, кӧня соослэн коньдонзы кылемын, кытчы но кӧня со кошке. Озьы ик Инмарлэн организацияз но. Берпум аръёс ӵоже со трос туж умой малпанъёсты улонэ пыӵатӥз, но соин сэрен куддыръя коньдон лыктэмлэсь тросгес кошке вал. Соин ик организация утча амалъёсты, кудъёсыз юрттозы ӧжытгес коньдон быдтыны но ужез капчиятыны, мылысь-кыдысь сётэм коньдондэс пайдаё уже кутон вылысь.
СЁТЭМ КОНЬДОНДЫЛЭН ПАЙДАЕЗ
Коньдон сётыса, ми юрттӥськомы Эксэйлыклы быдэс дунне вылын ужзэ нуыны (Учке 14—16-тӥ абзацъёсты.)
14—16. а) Кытчы куто тӥлесьтыд сётэм коньдондэс? б) Кыӵе пайда вае со тӥледлы?
14 Тросэз соос пӧлысь, кинъёс Иеговалы кема дыр ӵоже ини ужало-тыршо, верало, али Инмарлэн организациез ми сярысь азьвыллэсь но умой сюлмаське шуыса. Малпалэ ай: берпум аръёсы Иеговалэн Адӟись-Ивортӥсьёсыз ӵем уже кутыны кутскизы интернет-ресурсъёсты. «Выль дуннелэн берыктэмез» тросгес но тросгес кылъёсы берыктӥське. 2014-тӥ но 2015-тӥ аръёсы быдэс дунне вылын 14 каръёслэн самой бадӟым стадионъёсазы куинь нуналъем калыккуспо конгресс ортчиз, кудӥз нимаськиз «Нырысь ик Инмарлэсь Эксэйлыксэ утчалэ!». Отчы лыктэмъёс туж бадӟым шумпотон басьтӥзы.
15 Тросэз вын-агайёс но сузэр-апайёс туж бадӟым тау каро ваньмыз понна, мар каре соослы Иеговалэн организациез. Тани мар гожтӥзы интернет-телевиденимы сярысь Азиын ужась-тыршись кузпалъёс: «Ми пичи гинэ карын ӟеч иворез вераськомы но куддыръя милемлы дунне пыдсын улӥськомы кадь потэ. Соин сэрен туж капчи вунэтыны, макем бадӟым уж нуэ Иеговалэн организациез. Интернет-телевидениысь видеороликъёс тодамы вайыто, ми дунневыл вынлыклэн люкетэз луиськомы шуыса. Озьы ик татысь вын-агайёс но сузэр-апайёс туж шумпото интернет-телевиденимылы. Ми ӵемысь соослэсь верамзэс кылӥськомы, котькуд толэзе потӥсь программаез учкыса, соос асьсэды Кивалтӥсь кенешысь вын-агайёслы матынгес шӧдо шуыса. Али соос туж данъясько, Инмарлэн организациезлэн люкетэз луэменызы!»
16 Асьме нуналъёсы быдэс дунне вылын 2 500 пала Эксэйлык юртъёсты пукто яке тупатъяло. Гондурасысь одӥг кенешысь вын-агайёс но сузэр-апайёс, кудъёсыз выль Эксэйлык юртын люкаськыны кутскизы, гожтӥзы: «Макем шумпотоно, ми но Иеговалэн семьяезлэн люкетэз луиськомы шуыса! Кӧня вын-агайёсмы милям быдэс дунне вылын! Соослэн юрттэменызы, милям табере асьмелэн кема возьмам Эксэйлык юртмы вань». Тросэз вын-агайёс но сузэр-апайёс сюлмысь тау каро Библия но публикациос понна, кудъёссэ соос асьсэ кылынызы лыдӟыны быгато, нош озьы ик юрттэт понна, кудзэ соослы сётӥзы инкуазь шимучыръёсы сюремзы бере. Со сяна, соосты туж паймытэ, кыӵе емышъёс вае трос калыко интыосын тодытон.
17. Малы ми оскиськомы, Иегова организациезлэсь ужзэ нуыны юрттэ шуыса?
17 Иеговалэн Адӟись-Ивортӥсез луисьтэм адямилы секыт оскыны, ваньмыз, мар сярысь вылӥын верамын вал, ас мылкыд каремъя сётэм коньдонлы луыса лэсьтӥське шуыса. Одӥг пол одӥг бадӟым компанилэн кивалтӥсез типографиямы экскурсие ветлӥз. Со туж паймемын вал, вань ужез быдэсто шуыса соос, кинъёслы уждун уг тыро, ваньмыз ас мылкыд каремъя сётэм коньдонэн возиське шуыса но коньдон бичанъя нокыӵе ужрадъёс уг ортчытъяло шуыса. Со верамъя, ваньмыз со быдэстонтэм кадь потэ. Ми соин соглаш: ваньзэ сое ми лэсьтыны быгатӥськомы, Иеговалэн юрттэмезлы луыса гинэ (Иов 42:2).
КЫЗЬЫ ИЕГОВА БАКЕЛЬ КАРЕ, МИ СОЛЫ МАЕ КЕ СЁТӤСЬКОМЫ КЕ
18. а) Кыӵе бакель каронъёс ми басьтӥськомы, Эксэйлыклы юрттӥськыса? б) Кызьы дышетоно нылпиосты но Библиез дышетӥсьёсты Эксэйлыклы юрттӥськыны?
18 Иегова милемлы дан сётӥз пыриськыны уже, кудзэ нуэ солэн Эксэйлыкез туннэ. Со кылзэ сётэ, ми солы юрттӥськимы ке, трос бакель каронъёс басьтомы шуыса (Мал. 3:10). Иегова оскытэ, кин жалятэк сётъя, солы эшшо но тросгес сётэмын луоз на шуыса. (Лыдӟе Мадёнъёсты 11:24, 25.) Шырыт сям милемыз шудогес каре, малы ке шуоно «басьтон сярысь, сётыны умойгес» (Ап. уж. 20:35). Кылъёсынымы но ужъёсынымы ми юрттӥськомы нылпиосмылы но соослы, кинъёс Библиез дышето, валаны, соос но Эксэйлыклы юрттӥськыны быгато шуыса но со соослы трос бакель каронъёс ваёз шуыса.
19. Мар карыны мылкыддэс ӝутэ та статья?
19 Ваньзэ, мармы милям вань, Иегова сётӥз. Но ми солы тау кареммес но яратэммес возьматыны быгатӥськомы, солы мае ке сётыса (1 Пар. 29:17). Инмарлы корка пуктон понна кузьымъёс-саламъёс сётъяса, израиль пиос шумпотӥзы, «уго соос, вань сюлмысьтызы тыршыса, Кузё-Инмарлы сётъязы» (1 Пар. 29:9). Ойдолэ котьку шумпотомы, сётыса Иеговалы сое, мае со ачиз куке но асьмелы сётӥз вал!