Иегова кутэм ужпумме бакель кариз

МОН христиан семьяын будӥ. Мынам атае но анае, Фред но Эдна Молохенъёс, Библиез Эскерисьёс (Иеговалэн Адӟись-Ивортӥсьёсыз) вал. Мон вордӥськи 1934-тӥ арын. Со дырлы соос 20 ар Инмарлы ужало-тыршо вал ини. Атае но анае дышетӥзы монэ Иеговаез яратыны. Семьямы Канзас штатлэн лымшор но шундыӝужан вискысьтыз пичи гинэ Парсонс карын улӥз. Кенешамы ваньмыз кадь зырӟем христианъёс вал. Ми кенешлэсь пумиськонъёссэ ум келляське но ялан тодытон уже пыриськиськомы вал. Кӧснуналэ нуназе бере ӟеч иворез ми урамын вераллямы. Куддыръя ми жадиськомы вал, соин ик атаймы, ужаммы-тыршеммы бере мороженой басьтыса, милемыз котьку буйгатыны тыршылӥз.

Пичи кенешмылы тодытон понна туж бадӟым инты висъямын вал. Отчы пыро вал кӧня ке пичи каръёс но трос фермаос. Фермаосын ӟеч иворез веракумы, ми ӵемысь публикациосмес бакча сиёнлы, али пузам курегпузлы, нош куддыръя улэп курегъёслы но вошъямы. Ваньмыз со милемлы бадӟым юрттэт вал, малы ке шуоно атаймы тодытонлы публикациос понна коньдон азьло ик тыре вал.

ТОДЫТОН КАМПАНИОС

Одӥг пол атае но анае ӟеч иворез веран понна патефон басьтӥзы. Мон пичи вал но соин ужаны уг быгатӥськы вал. Но мыным туж кельше вал анай-атаелы юрттыны, куке соос, адямиос доры выльысь лыктыкузы яке Библия дышетон ортчытыкузы, Рутерфорд агайлэн речьёсыныз пластинка пукто вал.

Милям 1936-тӥ арын поттэм форд машинамы вал. Отчы атае рупор пуктӥз. Сыӵе машина Эксэйлык сярысь иворез веранын бадӟым юрттэт вал. Нырысь, адямиос саклыксэс мед висъялозы шуыса, ми крезьгуръёс лэзиськомы вал, собере Библия вылэ пыкиськем речез, нош берлогес адямиослы публикациос ӵектӥськомы.

Канзас штатысь пичи Черривейл карын атае рупорен машиназэ парке пуктӥз вал, кытчы арня нуналъёсы трос адямиос шутэтскыны ветло вал. Полиция атайме машиназэ парклэн сьӧраз пуктыны косӥз. Атае соосын ӧз споръяськы, кутӥз но машиназэ вӧзысь ураме пуктӥз. Отысен лэзем патефонлэн куараез паркын шутэтскисьёслы умой кылӥське вал. Атаеным но Джерри агаеным сыӵе тодытон уже пыриськон мыным бадӟым шумпотон вае вал.

1930-тӥ аръёслэн пумаз ми пыриськимы кампаниосы, кудъёсыз радъямын вал уйылон-уллянъёс мынон интыосын ӟеч иворез веран понна. Ми пеймытэн ик султӥськомы вал (кызьы ми султӥмы Джоплин каре мынон азьын), шыпытэн гинэ брошюраосты яке буклетъёсты ӧсъёс улэ тыриськомы но кар сьӧрын пумиськиськомы вал, полиция кинэ ке ӧз кырмы-а шуыса чаклан понна.

Со аръёсы ми пыриськимы на эшшо одӥг тунсыко ужан-тыршон амалэ, кудӥз нимаськиз тодытон марш. Выламы плакатъёс дӥсяса, ми бӧрсьысь бӧрсе быдэс кар пыр ортчиськомы вал. Тодам лыктэ одӥг сыӵе марш, кудзэ милям карамы ортчытӥзы. Вын-агайёс но сузэр-апайёс нуизы плакатъёсты, кытын гожтэмын вал: «Религия — сьӧлтэт но пӧяськон». Соос одӥг но ӝыны иськем кеме мынӥзы но берен лыктӥзы отчы, кытысь кошкизы,— милям коркамы доры. Шумпотоно, ваньмыз умой ортчиз шуыса, нош куд-ог адямиос Эксэйлык сярысь иворен но тунсыкъяськизы.

НЫРЫСЕТӤ КОНГРЕССЪЁСЫ

Милям семьямы ӵем ветлылӥз Канзасысь Техасэ конгрессэ. Атае Миссури—Канзас—Техас чугун сюрес вылын ужаз, соин ик ми конгрессъёсы яке ӵыжы-выжыосмы доры дун тырытэк ветлыны быгатӥськомы вал. Анаелэн агаез, Фред Уисмар, но солэн Юлейли кышноез Техас штатысь Темплын улӥзы. Фред ӵужмуртэ зэмлыкез быдэ вуэмезлэсь азьло ик тодӥз, 1900-тӥ аръёслэн кутсконаз. Со пылатӥськиз но зэмлыкез аслаз сузэръёсызлы вераны кутскиз, озьы ик анаелы но. Фред ӵужмуртме Техаслэн шор люкетаз умой тодӥзы, отын со зональной ужась-тыршись вал (азьло озьы нимазы ёросэз чакласез). Со лякыт, капчи мылкыдо адями вал, но соин котьку шулдыр вал. Фред ӵужмурт зэмлыкез вань сюлмысьтыз яратэ вал. Быдэ вуымтэ дыръям со мыным умой пример возьматӥз.

1941-тӥ арын семьямы поездэн Миссури штатысь Сент-Луисэ мынӥз, кытын бадӟым конгресс ортчыны кулэ вал. Пичи нылпиосты но, быдэ вуымтэосты но — ваньзэс, нош соос 15 000-лэсь тросгес вал, пуксьыны куризы нимысьтыз висъям интые Рутерфорд агайлэсь «Эксэйлэн нылпиосыз» речьсэ кылзыны. Речь бырем бере котькудӥзлы ми пӧлысь Рутерфорд агай но солэн юрттӥсез кузьым кузьмазы — «Нылпиос» выль книгаез.

1943-тӥ арын оштолэзе ми ветлӥмы «Ужаны дыр вуиз» конгрессэ Коффивилл каре (Канзас штат). Отын ялэмын вал, табере котькуд кенешын Инмарлы ужан-тыршон школа ортчытӥськоз шуыса. Со сяна, юри со Школалы поттэмын вал 52 урокен брошюра. Берлогес со арын ик мон нырысетӥ дышетскон ужме возьматӥ. Та конгресс мон понна нимысьтыз вал, малы ке шуоно отын мон но эшшо кӧня ке адями матысь фермаысь кезьыт тыметын пылатӥськимы.

МЫНАМ УЖПУМЕ — ВЕФИЛЬЫН УЖАН-ТЫРШОН

1951-тӥ арын мон школаме йылпумъяй, но мыным малпано вал, мар кароно азьланяз. Мынам Джерри кадь Вефильын ужаме-тыршеме потэ вал. Соин ик мон Бруклинысь Вефиле заявление гожтӥ, но 1952-тӥ арын 10-тӥ оштолэзе монэ отын ужаны-тыршыны ӧтизы. Со кутэм ужпуме юрттӥз мыным Инмарлы тросгес ужаны-тыршыны.

Мынам туж потэ вал публикациосты поттонын юрттӥськеме, но мон возьмасько вал, монэ типографие ужаны ӧтёзы шуыса. Монэ пуктӥзы официантын ужаны, нош берлогес сиён пӧранние ыстӥзы. Со уже мыным туж кельше вал, отын мон тросэзлы дышетски. Типографие мон озьы ик ӧй сюры. Пӧртэм сменаосын ужанлэн но пайдаез вал: нуназе чалмыт азьын Вефильлэн узыр библиотекаяз мон быгатӥсько вал ас поннам Библиез дышетыны. Со юрттӥз мынэсьтым осконме но Иеговаен кусыпъёсме юнматыны. Нош Вефильын ужаны-тыршыны мылкыды эшшо но юнгес луиз. Джерри 1949-тӥ арын Вефильысь кошкиз. Со Патришияез кышно басьтӥз но, соос улыны кутскизы Бруклинын, Вефильлэсь кыдёкын ӧвӧл. Ужан-тыршонэлэн нырысетӥ аръёсаз соос мыным туж юрттӥзы.

Ӝоген Бруклинэ лыктэме бере Вефильын бырйизы вын-агайёсты, кудъёсыз Вефильлэсь 320 иськемлы кыдёкегес интыяськем кенешъёсы ветлысалзы. Соослы кулэ вал со кенешъёсын речь вераны но кенешен ӵош тодытон уже пыриськыны. Мыным дан сётэмын вал, но мон со вын-агайёс пӧлы сюри. Нырысетӥ речьме вераку, мон туж сюлмаськи. Соку речь час котыр кыстӥське вал. Ӵем дыръя кенеше мон поездэн ветлылӥ. Умой тодӥсько на, кызьы 1954-тӥ арын толалтэ мон кенешысь Нью-Йорке бертыны поездэ пукси. Со вал арня нуналэ нуназе бере, нош ӝытазеяз мыным Вефильын луоно ни вал. Шӧдтэк шорысь туж зол тӧл ӝутскиз но, вистэм-вожтэм лымыяны ӧдъяз. Собере, замыкание луэмен сэрен, поездмы дугдӥз. Нью-Йорке мон вуи 5 часын ӵукна гинэ. Бызьыса метрое пукси, нош отысен шонерак Вефильысь сиён пӧранние мынӥ. Дырызлэсь мон ӧжыт бергес вуи. Мон туж жадемын вал, малы ке шуоно быдэс уйзэ поездын ортчытӥ, солэсь вырӟемзэ возьмаса. Та выллем шуг-секытъёс шоры учкытэк, мон бадӟым шумпотон басьтӥ, кенешысь вын-агайёслы юрттыса но отысь выль эшъёс шедьтыса.

Вефильын ужан-тыршонэлэн нырысетӥ аръёсаз мон пыриськыны кутски WBBR радиостанциысь Библия дышетон передачаосы. Радиостанция Колумбия-Хайтсын 124-тӥ юртын вал. Со передачаосы ялан пыриськылӥз Макмиллан агай, кудӥз кема дыр ӵоже Вефильын ужаз-тыршиз. Эшъёсыз пӧлын со Мак агай шуыса тодмо вал, но милемлы, Вефильын егит ужась-тыршисьёслы, со котьку адӟем карымон вал, малы ке шуоно, шуг-секытъёс шоры учкытэк, со оскымон кылиз.

1958-тӥ арын мыным ӵектӥзы Галаад школалы юрттӥськыны. Мыным кулэ вал юрттыны школаез йылпумъясьёслы виза басьтыны со шаере, кудаз соосты ыстӥзы, но юрттыны соослы ыстэм интыязы мыныны. Со дыръёсы самолётэ билетъёс туж дуно вал, куд-огез гинэ миссионеръёс самолётэн лобазы. Ӵем дыръя Африкае но Азие соос груз нуллӥсь корабльёсын ветлылӥзы. Нош аръёс ортчыса, куке самолётэ билетъёслэн дунзы кулэсмиз, миссионеръёсты ӵемгес самолётэн келяллязы.

КОНГРЕССЪЁСЫ ВЕТЛОН

1960-тӥ арын монэ куризы юрттӥськыны США-ысь вын-агайёсты но сузэр-апайёсты калыккуспо конгрессъёсы самолётэн нуллонэз радъянын. Со конгрессъёс ортчыны кулэ вал 1961-тӥ арын Европаын. Мон мынӥ одӥгаз сыӵе конгрессэ Гамбурге (Германия). Конгресс бере ми Вефильысь куинь агайёсын огдырлы машина басьтӥмы но Италие кошкимы. Отын Римысь филиалэ ветлӥмы. Италиысь Пиреней гурезьёс пыр ми мынӥмы Францие, собере Испание, кытын Иеговалы ужаны-тыршыны уг лэзё вал. Барселонае ми вайимы публикациосты, кудъёссэ кузьымъёсты кадь бинялтӥмы. Макем ми шумпотӥмы Испаниысь вын-агайёсты адӟыны! Со бере ми мынӥмы Амстердаме но отысь берен Нью-Йорке.

Ар ортчыса монэ куризы юрттыны ваньзэ дасяны, вын-агайёс но сузэр-апайёс «Дауръёс ӵоже улӥсь ӟеч ивор» калыккуспо конгрессъёсы мыныны мед быгатозы шуыса. Со конгрессъёс ортчыны кулэ вал 1963-тӥ арын быдэс дуннеысь пӧртэм интыосын. Отчы мыныны быръемын вал 583 адями. Соослы вуылоно вал Европае, Азие, Чус океанлэн лымшор палаз но собере Гонолулуэ (Гавай шормуӵъёс) но Пасадинае (Калифорния штат). Со сяна, конгрессъёсы мыныны быръемъёслы вуылыны кулэ вал Ливанэ но Иордание, кытын соослы дасямын вал Библиын верам интыостӥ экскурсиос. Вефильысь отдел, кудаз мон тырши, юрттэ вал билет, виза басьтыны но улон инты утчаны.

ВЫЛЬ ЭШЕ

Мон понна 1963-тӥ ар нимысьтыз вал эшшо одӥг муген. 29-тӥ инвожое мон Лайла Роджерсэз кышно басьтӥ. Со куинь ар ӵоже Вефильын ужа-тырше вал ини. Сюанмы бере арня ортчыса, ми азьвыл верам калыккуспо конгрессэ мынӥсь вын-агайёс но сузэр-апайёс борды итӥськимы. Соосын ӵош ми вуылӥмы Грецие, Египетэ но Ливанэ. Бейрутысь ми Иордание мыныны дасяськиськомы вал, кытын Иеговалы ужаны-тыршыны быдэсак эрик уг сёто вал. Милемлы веразы, Иеговалэн Адӟись-Ивортӥсьёсызлы со шаере мыныны виза уг сёто шуыса, но ми туж сюлмаськимы, мар милемын луоз отчы вуэммы бере. Макем ми паймимы, куке аэропортысь вын-агайёсты адӟимы! Соослэн киязы плакат вал, кытын гожтэмын: «Гажаса ӧтиськомы тӥледыз, Иеговалэн Адӟись-Ивортӥсьёсыз». Ми туж шумпотӥмы вуылыны музъемъёсы, кудъёсыз сярысь Библиын гожтэмын. Ми ветлӥмы интыосы, кытын патриархъёс улӥзы, кытын Иисус но солэн апостолъёсыз ӟеч иворез веразы но кытысен христиан оскон быдэс музъем вылэ вӧлмиз (Ап. уж. 13:47).

55 ар ӵоже ини Лайла мынам оскымон эше. Со котьку юрттэ мыным со ужын, кудзэ милемлы сёто. Ми трос пол ветлӥмы Испание но Португалие, куке отын Иеговалы ужаны-тыршыны уг лэзё вал. Отын ми быгатӥмы вын-агайёсты но сузэр-апайёсты буйгатыны, соослы публикациос но мукет кулэ луись арбериос вайыны. Со сяна, ми быгатӥмы адӟиськыны Кадис карын (Испания) пытсэт сьӧрын пукись вын-агайёсын. Макем мон шумпотӥ соослы Библия вылэ пыкиськем речь вераны но осконзэс юнматыны!

1963-тӥ арысен кутскыса, мон юрттӥ радъяны калыккуспо конгрессъёсы ветлонэз. Со конгрессъёс ортчизы Австралиын, Африкаын, Гавай шормуӵъёсын но Азиын, Европаын, Выль Зеландиын, Пуэрто-Рикоын, нош озьы ик Шор но Лымшор Америкаын. Ми Лайлаен трос конгрессъёсын вал, озьы ик со конгрессын но, кудӥз ортчиз 1989-тӥ арын Варшаваын (Польша). Отчы СССР-ысь трос вын-агайёс но сузэр-апайёс лыктӥзы. Соослэн улоназы со вал нырысетӥез бадӟым конгресс! Ми тодматскимы куд-ог вын-агайёсын, кудъёсыз осконзы понна трос аръёс ӵоже СССР-ын тюрьмаосын пукизы.

Со сяна, мыным туж кельше вал Вефильын ужась-тыршисьёс но миссионеръёс доры ветлыны но соосты юнматыны. Берпуметӥзэ ми ветлӥмы Лымшор Кореяысь филиалэ. Отын ми пумиськимы Сувонын тюрьмаын пукись 50 вын-агайёсын. Ваньзылэн соослэн туж умой мылкыдзы вал, но соос туж возьмало вал дырез, ку соос нош ик ӟеч иворез эрикын вераны быгатозы. Кылъёсын вераны но уг луы, макем юнматӥз милемыз соосын пумиськон! (Рим. 1:11, 12).

ИВОРТӤСЬЁСЛЭН ЙЫЛЭМЗЫ ШУМПОТОН ВАЕ

Трос аръёс ӵоже мон ас синмыным адӟи, кызьы Иеговалэн калыкезлэн лыдыз будэ. Куке 1943-тӥ арын мон пылатӥськи, дунне вылын 100 000 пала ивортӥсьёс вал. Нош табере Иеговалы 240 шаеръёсын но интыосын 8 000 000-лэсь тросгес адямиос ужало-тыршо ини. Та удысын бадӟым уж лэсьтӥзы Галаад школаын дышетскемъёс. Мон шумпотӥсько, мыным сыӵе дан сётэмын вал шуыса, соосын ӵош ужаны но юрттыны соослы мукет шаеръёсы мыныны.

Мон туж шумпотӥсько, егит дыръям ик Иеговалы тросгес ужаны-тыршыны ужпум кутӥ но Вефиле мыныны заявление гожтӥ шуыса. Вань со аръёс ӵоже Иегова монэ трос бакель кариз. Со сяна, ми Лайлаен трос аръёс Бруклинысь кенешъёсын ужамы-тыршимы. Отын ми трос оскымон эшъёс шедьтӥмы, кудъёсыныз туннэ но эшъяськиськомы на.

Мон али ке но Вефильын ужасько-тыршисько. Мон туж тау карисько Лайлалы юрттэмез понна. Мыным 84 арес ке но, мон шумпотыса филиалын гожтэтъёсын ужасько.

Макем бадӟым шуд со Иеговалэн паймымон организациезлэн оглюкетэз луыны но адӟыны, макем яркытгес луэ пӧртэмлыксы соослэн, кинъёс Инмарлы ужало-тыршо но соослэн, кинъёс солы уг йыбыртъяло! Али ми эшшо умойгес валаськомы Малахиялэн 3:18 гожтэм кылъёсты: «Соку тӥ нош ик адӟыны быгатоды шонер улӥсьлэсь но сьӧлыклэсь кышкатэк улӥсьлэсь маин ог-огзылэсь висъяськемзэс, Инмарлы ужаса улӥсьлэсь но Солы ужатэк-тыршытэк улӥсьлэсь пӧртэмлыксэс». Котькуд нунал ми яркытгес но яркытгес адӟиськомы, кызьы Шайтанлэн дуннеяз тупаса улон быре но адямиос осконзэс но шумпотонзэс ышто. Нош Иеговаез яратӥсьёс но солы ужаса-тыршыса улӥсьёс та секыт дыръёсы но шумпотыса уло но шудо вуоно улонлы оско. Макем бадӟым дан со Эксэйлык сярысь ӟеч иворез вераны! (Матф. 24:14). Ми ӵыдытэк витиськомы нуналэз — нош со ӝоген вуоз ини,— куке Инмарлэн Эксэйлыкез та дуннеез быдтоз но ми рае вуомы, кытын Иеговалэсь оскымон ужась-тыршисьёссэ бакель каронъёс возьмало, кудъёсыз пӧлын туж умой тазалык но пырак улон.