Гажалэ сое, «мае Инмар огазеяз»

1, 2. Мар карыны ӧтё милемыз Еврейёслы 13:4 гожтэм кылъёс?

МИЛЯМ ваньмылэн Иеговаез сӥлы кареммы, яке гажаммы, потэ. Со милесьтым гажаммес басьтыны ярась луэ. Ми сое гажамы ке, со кылзэ сётэ милемыз но гажаны (1 Экс. 2:30; Мад. 3:9; Усьт. 4:11). Озьы ик, солэн потэ, ми мукет адямиосты но мед гажаломы шуыса, кылсярысь, соосты, кинъёс кивалтыны пуктэмын (Рим. 12:10; 13:7). Но улонлэн одӥг удысэз вань, кытын гажан тужгес но кулэ. Со семья.

² Апостол Павел гожтӥз: «Бызьыса-басьтыса улонды дун-чылкыт мед луоз, кусыпъёсты саптаськемын медаз лу» (Евр. 13:4). Озьы Павел котькуд христиан муртэ кузпалъяськыса улонэз вылӥ дунъяны ӧтиз. Юалэ асьтэлэсь: «Дунъясько-а мон кузпалъяськыса улонэз?» Та юан вылын малпаськоно тужгес но соослы, кинъёслэн кузпалзы вань.

3. Кыӵе кулэ луись косон сётӥз Иисус кузпалъяськыса улон сярысь? (Учке статья кутсконысь суредэз.)

³ Кузпалъяськыса улонэз гажаса, ми Иисус Христослэсь адӟем кариськомы. Куке фарисейёс юазы солэсь, яра-а кузпалэн люкиськыны шуыса, со соослы тодазы вайытӥз, мар вераз Инмар нырысетӥ семьяез кылдытэмез бере: «Пиосмурт аслэсьтыз атайзэ, анайзэ кельтоз но аслаз кышноез борды лякиськоз, кыкназы одӥг лулмугор луозы». Собере Иисус ватсаз на: «Мае Инмар огазеяз, сое адями медаз люкы». (Лыдӟе Марклэсь 10:2—12; Ул.-выл. 2:24).

4. Кыӵе малпанэз вал Иеговалэн кузпалъяськыса улон пумысен?

⁴ Иисус возьматӥз, кузпалъяськыса улонэз ачиз Инмар кылдытӥз шуыса, но вераз, со вань улон ӵожелы кылдытэм кусыпъёс шуыса. Инмар ӧз вера Адамлы но Евалы, соослы люкиськыны яра шуыса. Солэн малпамезъя, «кыкназы» пырак дауръёс ӵоже огазьын улыны кулэ вал.

ӜАМДЭЛЫ ВОШТӤСЬКОНЪЁС

5. Кызьы кулон кузпалъяськыса улон вылын шӧдӥськиз?

⁵ Но, кызьы тодӥськомы, Адамлэн сьӧлыкез адямиослэсь улонзэс воштӥз. Адямиос кулыны кутскизы, но со кузпалъяськыса улон вылын шӧдӥськиз. Кызьы валэктӥз апостол Павел, христиан мурт, кудӥзлэн кузпалыз кулӥз, кузпал борды думыса возись законлэсь мозмытске но выльысь кузпалъяськыны быгатэ (Рим. 7:1—3).

6. Моисейлэсь законзэ лыдэ басьтоно ке, кызьы Иегова кузпалъяськыса улон шоры учке?

⁶ Израиль калыклы Инмарен сётэм Законын гожтэмын вал кузпалъяськыса улонэн герӟаськем косонъёс. Со Закон пиосмуртлы трос кышно басьтыны лэзе вал. Адямиос Закон сётэмлэсь азьло ик ини озьы улыны кутскизы. Но со Закон кышноосты но нылпиосты уте вал. Кылсярысь, израиль пиосмуртлы, кудӥз ляльчиез кышно басьтэмын вал ини но кудӥз кыкетӥ кышно басьтэ вал, уг яра вал нырысетӥ кышнозэ сиёнтэк, дӥськуттэк кельтыны, но со соин азьвыл сямен ик кышноен карт кадь улыны кулэ вал. Инмар возьма вал, со пиосмурт кышнозэ утёз но со сярысь сюлмаськоз шуыса (Пот. 21:9, 10). Милемлы Моисейлэн законэзъя улоно ӧвӧл ке но, со Законъя ми валаськомы, Иегова кузпалъяськыса улонэз вылӥ дунъя шуыса. Со вылын малпаськон юрттэ милемлы кузпалъяськыса улон шоры Инмар кадь учкыны.

7, 8. а) Кыкетӥ Закон 24:1 верамъя, кыӵе учыре пиосмурт кышноеныз люкиськыны быгатэ вал? б) Кызьы Иегова люкиськон шоры учке?

⁷ Нош мар верамын вал Законын люкиськон сярысь? Иеговалэн кузпалъяськыса улон шоры учконэз ӧз воштӥськы ке но, со лэзиз израиль пиосмуртлы кышноеныз люкиськыны, со кышноезлэсь «урод палъёссэ» шедьтӥз ке. (Лыдӟе Кыкетӥ Законэз 24:1.) Законын верамын ӧй вал, мар пыре вал со «урод палъёс» пӧлы. Но со кыӵе ке пичи гинэ янгыш ӧй вал. Со бадӟым янгыш луыны кулэ вал яке мар ке но юрӟымез, кырсез, мар семьяез сантэманы быгатэ вал (К. Зак. 23:14). Жаляса верано луэ, со дыръёсы, куке Иисус музъем вылын улӥз, тросэз иудейёс кышноосынызы «котькыӵе мугъя но» люкиськылӥзы (Матф. 19:3). Милемлы соослэсь адӟем карыны уг яра.

⁸ Со сярысь, кызьы Инмар люкиськон шоры учке, Малахия пророк гожтӥз. Со улон нуналъёсы пиосмуртъёс, егит дыръязы ваем кышнооссэс ӧрекчаса, соосын люкисько вал. Соослэн мукет калыкысь егит кышно басьтэмзы потэ вал, вылды. Малахия Иеговалэсь кылъёссэ гожтӥз: «Мон люкиськонэз адӟемпотостэм карисько» (Мал. 2:14—16, ВД). Со кылъёс соглаш луо Инмарлэн Кылаз нырысетӥ кузпалъёс сярысь верам кылъёсын: «Адями... кышноез борды лякиськоз: кыкназы одӥг лулмугор луозы» (Ул.-выл. 2:24). Иисус но кузпалъяськыса улон шоры Атаез кадь учке вал. Со вераз: «Мае Инмар огазеяз, сое адями медаз люкы» (Матф. 19:6).

ЛЮКИСЬКОН ПОННА ОДӤГ ГИНЭ МУГ

9. Мае возьмато Иисуслэн кылъёсыз, кудъёсыз гожтэмын Марклэсь 10:11, 12?

⁹ Кин ке но юалоз: «Вань-а кыӵе ке муг, кудӥз христиан муртлы право сётэ люкиськыны но выльысь кузпалъяськыны?» Иисус вераз: «Кин, кышноеныз люкиськыса, мукетсэ кышно басьтэ ке, со пыр со азон-калгон сьӧлыке пыре. Кышномурт, картэзлэсь люкиськыса, мукетызлы бызе ке, со азон-калгон сьӧлыке пыре» (Марк 10:11, 12; Лука 16:18). Адӟиське, Иисус кузпалъяськыса улонэз гажа вал но возьма вал, мукетъёсыз но сое гажалозы шуыса. Пиосмурт, кыӵе ке муг малпаса, калгымтэ кышноеныз люкиське но выльысь кузпалъяське вал ке, озьы со азон-калгон сьӧлыке пыре вал. Сое ик вераны луоз кышномурт сярысь но, кудӥз калгымтэ картэныз люкиське вал. Адямиос ог-огенызы люкисько ке но, Инмарлэн син азяз соос озьы ик «одӥг лулмугор» луо. Со сяна, Иисус вераз на, пиосмурт, калгымтэ кышноеныз люкиськыса, кышнозэ азон-калгон сьӧлыке донге шуыса. Кызьы? Азьло дыръёсы, улыны коньдонтэк медаз кыльы шуыса, люкиськем кышномурт выльысь бызёно луэ вал. Нош со азон-калгон сьӧлыкен лыдъяське вал.

10. Кыӵе учыре христиан мурт быгатэ люкиськыны но выльысь кузпалъяськыны?

¹⁰ Озьы ке но, Иисус валэктӥз, кузпалъёс люкиськыны быгато шуыса. Кыӵе учыре? Со вераз: «Кин, азон-калгон сьӧлыке [грек кыл порне́йа] пырымтэ кышноеныз люкиськыса, мукетсэ кышно басьтэ ке, со азон-калгон сьӧлыке пыре» (Матф. 19:9). Со сярысь ик со вераз, Гурезь йылын тодытыкуз (Матф. 5:31, 32). Кыказ ик учыръёсы Иисус «азон-калгон сьӧлык» сярысь вераз. Азон-калгон пӧлы пыро пӧртэм та выллем сьӧлыкъёс: кузпалъяськем муртъёслэн калгыса улэмзы, проституция, бызьымтэ-басьтымтэ муртъёслэн ог-огенызы кӧламзы, пиосмурт пиосмуртэн яке кышномурт кышномуртэн кӧлан но пудо вылэ тубан. Шуом, кышнояськем пиосмурт азон-калгон сьӧлыке пыре. Соку кышноез ачиз ужпум кутэ, люкиськоно-а картэныз яке ӧвӧл-а. Соос люкиськизы ке, Инмарлэн син азяз соос кузпалъёс уз луэ ни.

11. Малы христиан мурт ужпум кутыны быгатоз семьязэ утьыны, солэн люкиськыны Библия вылэ пыкиськем мугез вань ке но?

¹¹ Висъялэ саклыктэс: Иисус ӧз вера, кузпалъёс пӧлысь кудӥз ке азон-калгон сьӧлыке (порне́йа) пыре ке, соин одно ик люкиськоно шуыса. Кылсярысь, кышно малпаны быгатоз, умойгес луоз шуыса семьязэ утьыны. Оло нош, со азьвыл сямен ик яратэ картсэ, соин ик со ужпум кутоз сое простить карыны но кусыпъёссэс тупатыны. Со сяна, кышно вала, вылды, со люкиськиз ке но выльысь ӧз бызьы ке, шуг-секытъёсын пумиськоз шуыса. Кылсярысь, быгатоз-а со аслыз коньдон поттыны? Мар вераны луоз картэн кӧланы кулэяськонэз сярысь? Мӧзмыт уз луы-а солы? Кызьы люкиськон нылпиосыз вылын шӧдӥськоз? Солы секытгес уз луы-а нылпиоссэ Библиысь зэмлыкъёслы дышетыны? (1 Кор. 7:14). Зэм, люкиськон бадӟым шуг-секытъёсы вуттыны быгатэ.

12, 13. а) Мар луиз Осиялэн семьяяз? б) Малы Осия Гомерез дораз берыктӥз но малы со дышетэ кузпалъёсты?

¹² Сое, кызьы Инмар учке кузпалъяськон шоры, умойгес валаны юрттоз Осия пророклэн примерез. Иегова косӥз Осияез: «Азыса-калгыса улӥсез аслыд кышно вай». Со ватсаз на: «Со кышно тыныд нылпи мед ваёз». Осия Гомер нимо кышномуртэз кышно басьтӥз но, со «солы пи нуны вайиз» (Ос. 1:2, 3). Собере солэн, азыса-калгыса улэменыз, кык пиналъёсыз вордӥськизы на — ныл но пи. Гомер трос пол калгыса ветлӥз ке но, Осия соин ӧз люкиськы. Бератаз Гомер, пророк дорысь кошкыса, ляльчи луиз, но Осия дун тырыса сое ляльчиысь мозмытӥз (Ос. 3:1, 2). Осиялэн примерез вылын Иеговалэн возьматэмез потэ вал, со Израильлэсь оскымон луымтэзэ одӥг пол гинэ простить ӧз кары шуыса. Малы со милемыз дышетэ?

¹³ Христиан мурт кузпалызлэсь калгемзэ тодӥз ке, солы малпано, мар кароно. Одӥг ласянь, Иисуслэн верамезъя, солэн мугез вань люкиськыны но выльысь кузпалъяськыны. Мукет ласянь, христиан мурт кузпалзэ простить карыны быгатэ. Со шонертэм уз луы. Осия Гомерез дораз берыктӥз но вераз, со калгыса медаз ветлы ни шуыса. Кӧня ке дыр ӵоже Осия соин ӵош ӧз кӧла (Ос. 3:3, ВД). Нош дыр ортчыса, выльысь соин кӧланы кутскиз, шӧдске. Со выллем Иегова дась вал калыксэ простить карыны но соин матысь кусыпъёссэ тупатыны (Ос. 1:11; 3:3—5). Малы татысь дышетскыны быгато кузпалъёс? Христиан мурт азон-калгон сьӧлыке пырем кузпалэныз выльысь ӵош кӧланы кутске ке, озьы со возьматэ, аслэсьтыз кузпалзэ простить кариз шуыса (1 Кор. 7:3, 5). Соку солэн люкиськыны Библия вылэ пыкиськем мугез ӧвӧл ни. Табере кузпалъёслы юрттоно ог-огзылы кузпалъяськыса улон шоры Инмар сямен учкыны.

СЕМЬЯЫН БАДӞЫМ ШУГ-СЕКЫТЪЁС КЫЛДО КЕ

14. 1 Коринфъёслы 7:10, 11 верамъя, кыӵе югдур кылдыны быгатэ семьяын?

¹⁴ Вань христианъёс кузпалъяськыса улонэз Иегова но Иисус сямен гажаны кулэ. Но тырбыдэстэм луэменымы сэрен кинлы ке но со туж секыт кадь потэ (Рим. 7:18—23). Соин ик паймоно ӧвӧл, нырысетӥ даурын куд-ог христианъёслэн семьяосазы шуг-секытъёс кылдылӥзы шуыса. Павел гожтӥз, «кышномуртлы картэныз люкиськыны уг яра» шуыса. Озьы ке но куддыръя адямиос люкисько вал. (Лыдӟе 1 Коринфъёслы 7:10, 11a.)

15, 16. а) Мар кароно кузпалъёслы, куспазы бадӟым шуг-секытъёс кылдо ке но? Малы? б) Мар кароно христиан муртлы, семьяяз шуг-секытъёс кылдо ке, нош кузпалыз Иеговалы уг оскы?

¹⁵ Павел ӧз валэкты, малы кышно картэз дорысь кошкыны но нимаз улыны быгатэ вал. Картэз мукет кышномуртэн сьӧлыкасал ке, кышнолэн правоез луысал люкиськыны но выльысь бызьыны. Озьыен, нимаз кариськон понна татын мукет мугез вал. Павел гожтӥз, картэз дорысь кошкись кышнолы бызьытэк улоно яке картэныз тупано шуыса, малы ке шуоно Инмарлэн син азяз соос озьы ик кузпалъёс на. Апостоллэн кылъёсызъя, карт но кышно вискын бадӟым шуг-секытъёс кылдо ке, но соос ог-огзылы оскымон кылё ке, соослы кусыпъёссэс тупатоно. Соос быгатозы тӧроослы юрттэт курыса вазиськыны, нош тӧроос, нокин пала пырытэк, соослы Библиысь визь-кенешъёс сётозы.

¹⁶ Югдур секытгес луэ, куке одӥгез кузпал Библиысь возетъёсъя уг улы. Сыӵе учыре христиан муртлэн нимаз улыны правоез вань-а? Кызьы верамын вал ини, Библиын валэктэмын, люкиськон понна одӥг гинэ муг вань шуыса — кузпаллэн азон-калгон сьӧлыке пыремез. Нош кыӵе учыре кузпалъёс люкиськытэк нимаз улыны быгато, Библиын верамын ӧвӧл. Павел гожтӥз: «Кышномурт но, кудӥзлэн кузпалыз Инмарлы оскисьтэм ке, но со соин улыны соглаш ке, солы картсэ кельтыны уг яра» (1 Кор. 7:12, 13). Та визь-кенеш али ке но пайдаё.

17, 18. Малы куд-ог христианъёс, семьяязы кылдэм шуг-секытъёс шоры учкытэк, кузпалзы дорысь уг кошко?

¹⁷ Зэм, куддыръя «Инмарлы оскисьтэм» карт аслаз ужъёсыныз возьматэ, Иеговалы оскись кышноен улэмез уг поты шуыса. Оло нош, со туж зол жуге кышнозэ, но кышноез малпа, со солэн тазалыкезлы но улонэзлы кышкытлык вае шуыса. Оло нош, со пумит луэ семьязэ сюдыны-дӥсяны яке кышноезлы Инмарлы ужаны-тыршыны люкетэ. Сыӵе учыре христиан кышномурт малпаны быгатоз, озьы картэз возьматыны тырше, солэн соин ӵош улэмез уг поты шуыса (со сое шонерак уг вера ке но) но солы картэзлэсь нимаз улыны умойгес луоз шуыса. Нош куд-ог христиан кышномуртъёс та выллем учыръёсы ужпум куто картсы дорысь кошкытэк улыны но тыршыны кусыпъёссэс тупатыны. Малы?

¹⁸ Кузпалъёс нимаз улыны ужпум кутӥзы ке но, соос озьы ик кузпалъёс кылёзы. Котькудӥз соос пӧлысь азьвыл верам шуг-секытъёсын пумиськоз. Апостол Павел семьяез утён понна эшшо одӥг муг сярысь вераз на: «Уго оскисьтэм пиосмурт оскись кышноез пыр дун-чылкыт луэ. Оскисьтэм кышномурт но оскись картэз пыр дун-чылкыт луэ. Озьы ке ӧй луысал, тӥляд нылпиосты сьӧлыкоесь луысалзы, нош али соос дун-чылкытэсь луэмын» (1 Кор. 7:14). Тросэз Инмарлы оскымон христианъёс, бадӟым шуг-секытъёсын пумиськыса но, ужпум кутӥзы Иеговалы оскисьтэм кузпалъёсынызы кыльыны. Бератаз соослэн кузпалъёссы Иеговалэн Адӟись-Ивортӥсьёсыз луизы. Со христианъёс туж шумпото, сыӵе шуг-секытъёслы ӧз сётске шуыса. (Лыдӟе 1 Коринфъёслы 7:16; 1 Пётр 3:1, 2.)

19. Малы христианъёс пӧлын трос шудо семьяос?

¹⁹ Иисус валэктӥз, кыӵе учыре люкиськыны яра, нош апостол Павел визь-кенеш сётӥз люкиськытэк нимаз улон пумысен. Иисуслэн но, Павеллэн но потэ вал, Инмарлэн ужась-тыршисьёсыз кузпалъяськыса улонэз мед гажалозы шуыса. Туннэ быдэс дунне вылысь кенешъёсын трос шудо семьяос, кудъёсаз оскымон картъёс кышнооссэс ярато, нош кышноос картъёссэс гажало. Тӥляд кенешады но сыӵе семьяос вань, дыр. Асьсэлэн примеренызы соос возьмато, кузпалъяськыса улонэз гажаны луэ шуыса. Ми туж шумпотӥськомы, трос миллион картъёс но кышноос асьсэлэн улонэнызы возьмато, Иеговалэн та кылъёсыз зэм луо шуыса: «Адями аслэсьтыз атайзэ, анайзэ кельтоз но аслаз кышноез борды лякиськоз, соос кыкназы одӥг лулмугор луозы» (Еф. 5:31, 33).